Исай 27 - Библи

Эзэн могойе хюдаха

¹ Тэрэ үдэр зугадагша могой Левиатаниие, мушхардаг могой Левиатаниие – далайн абарга лууе Эзэн асари томо, үхэлтэ һэлмээрээ сабшан хюдаха.

² Тэрэ үдэр Эзэн иигэжэ айладаха: «Үзэм жэмэсэй һайхан сэсэрлиг тухай дуу дуулагты!

³ Би тэрэниие харууһалжа, таһалгаряагүй уһалжа байнаб. Хэншье тэрэниие бү гэмтээг гэһэндээ Би тэрэниие үдэр, һүнигүй харууһалнаб.

⁴ Уур хилэн намда үгы. Гэбэшье хадхуур, үүргэнэ ургуулжа, урдаһаам тулахаар бодоболнь, Би дайлан гарахаб, тэрэниие дууһан шатаахаб!

⁵ Минии дали доро орохоёо тэрэ оролдог, Намтай эбтэй байха тухай хэлсээ баталаг, мүн даа, Намтай эбтэй эетэй байха тухай хэлсээ баталаг!»

⁶ Ерэхэ сагта Израилиин улад зон, Яковай үри һадаһад, модон мэтэ үндэһэлжэ, сэсэглэжэ, үрэ үгэхэ. Бүхы юртэмсэ тэдэнэй жэмэсээр дүүрээд байхал.

⁷ Дайсадтаал адляар тэдэ Эзэндэ хэһээгдээ бэшэ. Алууршадтаал адляар тэдэ Эзэндэ алуулагдаа бэшэ.

⁸ Эзэн Өөрын арад түмэниие сүлэлгэдэ эльгээжэ хэһээгээ. Дорно зүгэй халуун һалхяар Тэрэ тэдээн руу үлеэн хаяа.

⁹ Гэбэшье үргэлэй шэрээнүүдэй шулуунай бутаржа, шохой болоходо, Ашэраа бурханда һүгэдэлгын зүйлнүүдэй үгы болоходол Яковай нүгэл арюудхагдаха.

¹⁰ Бүхэлэгдэһэн хото һандаран хооһоржо, гэр байранууд орхигдохо, элһэн сүл губидал тэрэ хаясаанай болохо. Тэндэ тугал бэлшэжэ, хэбтэжэ, набшаһа намаа зулгааха.

¹¹ Тэрэнэй мүшэрнүүд хатажа хухарха. Тиихэдэнь эхэнэрнүүд ерэжэ, түлеэн мэтээр шатааха. Зоной юушье ойлгоогүй һэн тула Байгуулагшань тэдэниие хайрлахагүй, Бүтээгшэнь нигүүлэсхы зан гаргахагүй.

¹² Тэрэ үдэр Эзэн таряа сохин орооһо илгаһандал, Евфрадһаа Египедэй хилэнүүд хүрэтэр таанадые, Израилиин арад түмэниие, нэгэ нэгээр суглуулха.

¹³ Тэрэ үдэр ехэ бүреэгэй дуун дуулдажа, Ассири болон Египет руу сүлэгдэгшэ Израилиин зон бусан ерэхэ. Тиигээд тэдэ нангин уула дээрэ, Иерусалимда Эзэндэ мүргэхэ.