Исай 26 - Библи

Эзэн Өөрын арадта илалта туйлуулха

¹ Иудын хан түрын газар дайдада иимэ дуу дууладаг болохо саг дүтэлжэ байна: «Манай хото хүсэтэй! Бурхан Өөрөө хана хэрэмынь болон хамгаалжа байна!

² Хотын бартаануудые нээгыт! Бурхандаа үнэн сэхэ, зүб шударга үндэһэтэн орог лэ!

³ Бурхан, Тандаа этигэдэг, хатуу зоригтой зондо Та тэгшэ энхэ тайбан байдал үршөөнэт.

⁴ Хэтэ мүнхэдөө Эзэндэ этигэн байгыт. Юуб гэхэдэ, мүнхэ хабсагай бол Эзэн, Эзэн!

⁵ Дээрэлхүү, бардам зантайшуул Тэрээндэ хамараа сохюулаа, тэдэнэй ажаһуудаг хүсэ ехэтэй хотые Тэрэ һандаргаа. Ханануудыень унагаажа, тооһо шоройтой худхаа.

⁶ Дарлагдажа байгаашад мүнөө болоходо өөһэдөө эдэ бүгэдые дэбһэжэ, ула дороо гэшхэнэ».

⁷ Зүб шударга зоной харгы тэгшэ – Та замыень дардам һайн болгонот.

⁸ Тиимэ, Танай тогтоолнуудай замаар ябанабди, Эзэн, Тандаа найданабди! Танай нэрэ дуудаха гээшэ сэдьхэлэймнай хүсэл мүн.

⁹ Һүниндөө минии сэдьхэл Тан руу тэгүүлдэг, үглөөнһөөшье эхилээд, Таниие бэдэрнэм. Газарта Танай шүүхэ сагай ерэхэдэ, дэлхэйн зон зүб ябадалда һурана.

¹⁰ Нүгэлтэй зондо энэрэл хайраяа Танай үзүүлдэгшье хада, тэдэ зүб ябадалда һурахагүй. Зүб шударга зоной газарта тэдэ буруу юумэ үйлэдэн лэ байха, Танай һүр жабхалангые мэдэрхэгүй.

¹¹ Эзэн! Та гараа далайгаад байнат, харин тэдэ энээниие харанагүй. Танай арад түмэнөө халхалан байхые үзэхэдөө тэдэ эшхэбтэр байдалда орохо! Тэдээндэ бэлдээтэй гал дүлэн дайсадыетнай үрэбхихэ!

¹² Эзэн, Та бидэндэ һайн байдал үршөөгыт! Манай хэһэн бүхы хэрэгүүд Танай ашаар бүтэнэ.

¹³ Эзэн Бурхамнай! Хэзээдэшьеб Танһаа ондоо эзэд бидэниие зонхилдог байгаашье хадань мүнөө бидэ гансал Таниие магтан дууланабди!

¹⁴ Мүнөө тэдэ эзэд үхэнхэй, дахин амидырха бэшэ. Тэдэнэй һүнэһэншье дахин эрьехэгүй. Ушарынь гэхэдэ, Та тэдэниие хэһээн һалгаагаат. Хэншье тэдээн тушаа һанахагүй.

¹⁵ Эзэмнай, Та арад түмэниие олошоруулаат, ороной газар дэбисхэр үргэдхөөт. Иигэжэ Өөрыгөө алдаршуулаат.

¹⁶ Өөһэдынгөө арад түмэниие Танай хэһээхэдэ, бидэ зобон-тулин, Эзэн, Тандаал зальбараа бэлэйбди.

¹⁷ Эхэнэрэй үхибүү түрэхэдөө зобон хашхардагтал, бидэ зобон хашхаран байгаа бэлэйлди, Эзэмнай!

¹⁸ Үбдэн-зобон байгаабди, гэбэшье юушье түрэжэ шадаагүйбди. Газар дэлхэйгээ сүлөөлжэ шадаагүйбди, юушье хээгүйбди.

¹⁹ Үхэһэн зомнай дахин амидырха! Хумхаа тооһон бологшод һэргэн бодожо, баяртай дуулалдаха. Газар дайдые шүүдэрэй һэргээдэгтэл, Эзэн нүгшэһэн зониие амидыруулха!

Эзэнэй арад түмэн нютагаа бусаха

²⁰ Минии арад түмэн, гэртээ орожо, үүдэеэ хаагты. Эзэнэй уур хилэнгэй үнгэртэр түр зуура бэеэ нюугаад байгты.

²¹ Гэм хэһэнэйнь түлөө дэлхэйн зониие хэһээхэеэ Эзэн Өөрынгөө огторгойн ордонһоо гаража байна. Дэлхэй дээрэ нюусаар хүниие алаһан ушарнууд эли тодо боложо, дахин далдалагдахагүй.