Исай 25 - Библи

Магтаал дуун

¹ Эзэн, Та – минии Бурханта. Таниие ехэ хүндэлэн, нэрыетнай магтан-дуулан байнаб. Та эртэнһээ түсэблэһэн гайхамшагта хэрэгүүдээ түгэс найдамтайгаар дүүргэбэт.

² Хотонуудые эбдэрхэй шулуун обоо, бүхэлэлтэнүүдыень һандархай шулуун болгобот. Хариин зоной ордонгууд һандараа, хэзээдэшье һэргээгдэхэгүй.

³ Тиимэһээ хүсэтэй арадуудай улад зон Таниие магтан, алдар соло дуудан байха. Хархис хэрзэгы үндэһэ яһатанай хотонуудта зон Танһаа айн байхал.

⁴ Та үгытэйшүүлдэ хамгаалалтань, ядуу зондо түшэг тулгуубаринь боложо, шуурганһаа хоргодохо газар, халуунһаа халхалха һүүдэрынь болоо бэлэйт. Хэрзэгы дайсадай добтолгонь шулуун ханын урдаһаа ороһон бороо шуургандал һэн.

⁵ Ган гасуур газарай ааяма халуундал адли, үүлэнэй һүүдэрэй бүгшэм халууниие нам болгодогтол, Та хариин дайсадай шууяа шурхираа болюулбат, дарлагшадые аниргүй болгобот.

Бурхан найр бэлдэхэ

⁶ Түмэн Сэрэгтэ Эзэн энэ уула дээрэ бүхы арадуудта найр наада бэлдэхэ – баян дэлгэр шэрээтэй, эрхим үзэмэй дараһан архитай. Тэндэ хурса һайн хоол, шанар һайтай үзэмэй дараһан архи байха.

⁷ Бүхы үндэһэ яһатан дээгүүр хүшэгэ мэтээр татаатай уйдхар гашуудалай үүлэ Эзэн гэнтэ үгы хэхэ.

⁸ Эзэн Бурхан үхэл хаталые хэтын хэтэдэ усадхаха. Бүхы зоной нюурһаа Тэрэ нулимса аршажа, Өөрын арад түмэнэй нэрээ гутааһан ушарые бүхы дэлхэйгээр зайлуулха. Энээн тушаа Өөрөө Эзэн айладхаа бэлэйл.

⁹ Эдэ бүгэдын тохёолдоһон үдэр зон иигэжэ хэлэхэ: «Энэл даа, манай Бурхан! Тэрээндэ этигэн найдаа бэлэйбди, тиихэдэмнай Тэрэ маанадые абараа. Энэл даа, Эзэн! Бидэ Тэрээндэ этигэн найдаа һэмди, маанадые абарһандань баясан сэнгэел!»

Бурхан Моһаабые хэһээхэ

¹⁰ Эзэн энэ Сион уулые аршалха, гэбэшье һолоомын шабааһа шэбхэ руу гэшхэгдэдэг мэтэ Моһаабай улад зон байһан газартаа гэшхэгдэн һалаха.

¹¹ Уһанда тамаржа байһан хүндэл адли тэдэ гараа һарбайха, теэд Эзэн тэдэниие доромжолхо, тиихэдэнь гарнуудынь һал унашахал.

¹² Үндэр ханатай Моһаабай хэрэмүүдые Тэрэ бута сохихо, шорой шохойтой адли болгохо!