Исай 24 - Библи

Эзэн газар хэһээхэ

¹ Анхарыт! Эзэн газарые һандарган, тэрэниие хооһоруулха гэжэ байна. Тэрэ шарайень тад ондоо болгожо, дээрэнь ажаһуугшадые хаа-хаанагүй тараахань.

² Хүн бүхэндэ тэрэл үйлэ заяан тудаха – санаарта ба юрэ буса хүндэшье, богоол ба эзэндэшье, худалдан абагша ба наймаалагшадашье, мүнгэ зээлеэр абагша ба мүнгэ урьһалагшадашье, баян, үгытэйшье хүндэшье.

³ Газар дэлхэй дууһан хооһорхо, бүхыдөө тонуулаатай юумэн хэбтэхэ. Ушарынь гэбэл, Эзэн иимэ айладхал буулгаа бшуу.

⁴ Газар зобон мүхэнэ, дэлхэй хатан мүхэнэ, дэлхэйн удамаршадшье мүхэн байна.

⁵ Зон Бурханай хуули ёһонуудые эбдэжэ, тогтоолнуудыень хазагайруулжа, хэтэ мүнхын хэлсээ эбдэн, дэлхэйе бузарлаба.

⁶ Тиимэһээ дэлхэй Бурханай хараалда хүртэжэ, дээрэнь амидарагша улад зон нүгэлөө эдлэжэ байна. Газар дээр амидарагшад үгы болоно. Зон үсөөрһөөр үсөөрнэ.

⁷ Үзэм жэмэсэй мүшэр хатажа, үзэмэй дараһан архишье хомор болобо. Жарган-сэнгэн байгаашад мүнөө болоходо һанаа үнөөндэ абтанхай.

⁸ Хэнгэрэгэй баяртай абяанууд замхаа, баясан байгаашадай дуунууд таһалдаа, хүхюутэй ятаг дуугүй болоо.

⁹ Зон үзэмэй дараһан архи уухаа, дуу дуулахаа болинхой. Шара айрагай амтан гашуун болонхойл!

¹⁰ Хото һандаржа хооһоронхой, гэрнүүд шэбхэдээтэй, орохын аргагүй.

¹¹ Үзэмэй дараһан архи дэлгүүрээр бэдэрээд, оложо ядахадаа, зон бархиралдана. Бүхы баяр баясхалан таһалдаа, ямаршье зугаа наадан газар дэлхэй дээр үгы болоо.

¹² Хото угаа һандараа, бартаануудынь унаад эбдэрээ.

¹³ Олива хуряагаад, үзэм суглуулаад байха үедэ хооһон хогоосон, нэгэ хэдыл жэмэс үлөөд байгша. Тон тиимэ байдал дэлхэйн бүхы арадуудта үзэгдэхэ.

¹⁴ Амиды мэндэ үлөөшэд баярлан хөөрэн байха. Баруун зүгтэ байгаашад Эзэнэй һүр жабхалангые магтан дуулаха.

¹⁵ Дорно зүгэйхид, Эзэндэ алдар соло дуудагты! Далайн эрьеэр ажаһуугшад, Израилиин Эзэн Бурханай нэрые алдаршуулагты!

¹⁶ Дэлхэйн алас холоһоо «Зүб Шударга ябадалтайда алдар соло!» гэһэн магтаал дуу соносонобди. Теэд минии досоо ехэ муу байна. Би иигэжэ байжа шадахагүйб! Урбагшад урбаһан зандаа, бүри хэтэрэн урбажа байнал.

¹⁷ Дэлхэйн хүн бүхэн намайе шагнаг лэ! Һүрдэмөөр аймшагтай зүйлнүүд, нүхэ, занганууд таанадые амадан хүлеэнэ.

¹⁸ Айха һүрдэхэ зүйлһөө тэрьедэгшэд нүхэн руу унаха, нүхэнһөө абиран гарагшад зангада орохо. Огторгойн сонхонууд нээгдэбэ! Дэлхэйн һууринууд доһолбо!

¹⁹ Газар бутаран эбдэрбэ, доһолбо, ехээр гантан хахарба.

²⁰ Газар дэлхэй архинша мэтэ гуйбалзан найгана, үхибүүнэй үлгыдэл һэнжэлзэнэ. Нүгэл хилэн дээрэнь улам хүндэ боложо байна, тиимэһээ газар унажа, дахин хэзээдэшье бодохогүй!

²¹ Огторгойн сэрэг, газарай хаашуулые Эзэнэй хэһээхэ сагынь тэрэ үдэр!

²² Нүхэн соо тэдэ хаашуул суглуулагдажа, шорондо хаюулагдаха. Тиигээд олон хоногой удаа тэдэ зарга шүүхэдэ орохо.

²³ Түмэн Сэрэгтэ Эзэнэй Сион хада уулаһаа Иерусалимые зонхилон-захиран хаан шэрээ эзэлжэ залархада, һүр жабхалангынь арадай удамаршадай урда угаа ехээр яларжа-толоржо, һара, наранай гэрэл тэрэниие диилэжэ шадахагүй.