Исай 22 - Библи

Иерусалим тушаа мэдээсэл

¹ Үзэгдэлэй Нюруу тушаа зүн. Энэ хадаа юун болоод, хотын бүхы зон гэрэй хушалтанууд дээрэ гараа гээшэб?

² Урдандаа хото ехэ шууяатай, хүл үймөөтэй, жаргалтай бэлэйл. Харин мүнөө тад ондоо. Зонтнай дайнда наһа бараа бэшэ.

³ Удамаршадтнай бултадаа зугадаа, тэдэ һурша номшье хэрэглэнгүй, нэгэшье дахин харбангүй баряанда баригдан абтаа.

⁴ Тиимэһээ намайе гансаарым орхигты, хосорһон өөрынгөө арад зон тушаа гашуудан уйлахаб, аргадажа-һамааруулжа бү байгты.

⁵ Энэ болбол Үзэгдэлэй Нюрууда эхи эмхигүй үймөөнэй, хүл хөөрсэгэнөөн, һамараанай болохо үе сагые Түмэн Сэрэгтэ Эзэн тодорхойлон, маанад руу эльгээ! Хотын хэрэм хананууд эбдэгдэжэ, «абарыт!» гэһэн хашхараан хада уулаар сууряатана.

⁶ Элаам нютаг ороной зон номо һаадагаа абажа, мори унан, тэргэлэн, ерэбэ. Киир орон нютагай сэрэгшэд бамбайнуудаа байлдаанда бэлдэбэ.

⁷ Танай эгээл һайн, эгээл үрэжэлтэй нюруу намжаа газарнууд дайшалхы тэргэнүүдээр дүүрэнхэй, Иерусалим хотынтнай бартаануудай урда мори унанхай дайсанай сэрэг жагсанхай.

⁸ Тиигэжэ танай Иудын хан түрын тулаха хүсэн буураба. Тиихэдэнь таанад ой соохи гэр соо нөөсэлэгдэһэн дайнай зэбсэгүүдые абажа асараат.

^9-10 Давидай хотын хэрэм ханануудай олон газарта һандарһые хараад, Иерусалим хотын гэрнүүдые шэнжэлжэ, заримыень зорюута һандаргаад, шулуугаарнь хотын ханануудые бүглэн бүхэлбэт. Доодо сөөрэм соо уһа нөөсэлбэт.

¹¹ Хоёр ханын хоорондо уһан сан барибат. Тэндэ хуушан сөөрэмэй уһан нөөсэлэгдэхэ. Теэд таанад эдэ бүгэдые үнинэй түсэблэһэн, эртэ урдын сагта энээниие һанаашалһан Бурхан руу анхаралаа хандуулбагүйт.

¹² Түмэн Сэрэгтэ Эзэн Бурханай та бүгэдые таар нэмэрэн, үһэеэ хюһан, гашуудан уйлахые дуудаһаншье һаань,

¹³ таанад орондонь зугаалан сэнгэжэ, баяр наада дэлгэжэ, үхэр үүсэлжэ, хони гаргажа, мяха эдижэ, үзэмэй дараһан архи уужа байнат. «Үглөөдэр үхэхэмнай магадгүй, тиимэһээ эдеэлэе, ууял!» гэжэ байнат.

¹⁴ Түмэн Сэрэгтэ Эзэн намда айладхаба: «Үхэтэртнай энэ нүгэлтнай сагааруулагдахагүй!» Иигэжэ Түмэн Сэрэгтэ Эзэн айладхана мүн.

Шэбнаада һэргылгэ

¹⁵ Түмэн Сэрэгтэ Эзэн хаанай ордоной захирагша Шэбнаада минии ошожо, иигэжэ хэлэхыемни захирба:

¹⁶ «Ши хэн гээшэбши? Түрэлхидшни хэн бэ? Хэн аад, үндэр хада хабсагай соо өөртөө бунхан сабшажа байнабши? Үндэртэ бунхан сабшааш, хабсагайда өөртөө байра зохёогоош.

¹⁷ Харин Эзэн шамайе абажа, шэдэхэ! Тэрэ шамайе шангаар барижа,

¹⁸ бүмбэгэ мэтээр шанга эрьелдүүлэн, танай орон нютагһаа үшөө ехэ орон нютаг руу хаяха. Үзэсхэлэнтэ тэргэнүүдшни тэндэ үлэхэ, ши өөрөө тэндэ үхэхэш. Ши өөрынгөө эзэнэй гэрэй эшэхэ зүйлынь болоод лэ һалахаш.

¹⁹ Эзэн шамайе тушаалһааш буулгаха, дээгүүр һууриһааш хүмэрюулхэ!»

²⁰ Эзэн Шэбнаада иигэжэ айладхаа: «Эдэ бүгэдын тохёолдоһон тэрэ үдэр Би Хилкияагай хүбүүн, Өөрын зараса Элиакиимые дуудахаб.

²¹ Би тэрээндэ шинии дэгэл үмдэхүүлжэ, шинии бүһөөр бүһэлэн, шинии эрхэ түлөөлгэнүүдые үгэхэб. Иерусалимай улад зондо, Иудын уг удамда тэрэ эсэгэ болохо.

²² Давидай ордоной түлхюур тэрэнэй мүр дээрэ табихаб: нээһэн үүдыень хэншье хаахагүй, хааһан үүдыень хэншье өөрын мэдэлээр нээхэгүй.

²³ Хадааһа шааһандал Би тэрэниие найдамтайгаар нэгэ газартань бүхэлэн байлгахаб, тиигээд тэрэ уг унгидаа хүндэтэй, алдар солотой оршохо.

²⁴ Бүхы түрэлхидынь – ехэ, багагүй, бүхы уг обогойнь, бултанайнь нэрэ түрэ тэрээнһээ дулдыдадаг байха.

²⁵ Тэрэ сагай ерэхэдэ, найдамтай шангаар шааһан хадааһан хүдэлжэ-найгажа эхилхэ, тиигээд унаха, тиихэдэнь тэрээн дээрэ үлгөөтэй ашааншье унажа һалаха». Энэ болбол Түмэн Сэрэгтэ Эзэн айладхаа мүн.