Исай 20 - Библи

Эзэнэй дүлгэ тэмдэг – нюсэгэн лүндэншэ

¹ Ассириин хаан Саргооной захирһанай ёһоор, сэрэгэй жанжиниинь Ашдоод хотодо ерэжэ добтолоод, эзэлээ бэлэй. Тэрэ жэл

² Эзэн Амооцой хүбүүн Исайда: «Үмдэжэ байһан гашуудалай таар хубсаһаа, хүлһөө шаахайгаа тайла», – гэжэ захирһан байгаа. Тэрэ захиралтыень дүүргэжэ, салдаган, хүл нюсэгэн ябадаг болобо.

³ Эзэн иигэжэ айладхал буулгаба: – Минии зараса Исайн гурбан жэлэй туршада салдаган, хүл нюсэгэн ябаһаниинь Египет болон Эфиопитой юун болохо байһанайнь дүлгэ тэмдэг юм.

⁴ Ассириин хаан тэдэ хоёр орон нютагуудай, Египедэй болон Эфиопиин зониие олзолон абажа, баряанда салдага нюсэгөөр туун абаашаха. Залуу, хүгшэншье зон салдаган гуяа харуулаад, хубсаһагүй, хүл нюсэгэн туугдан ошохо. Иигэжэ Египет доромжолуулагдаха.

⁵ Эфиопидо этигэн найдажа байгаашад, Египедые туһалха гэжэ һайрхагшад туһа хүргэхэ юумэгүй болоһоноо ойлгожо, айха, тиигээд найдаха юумэниинь үгы болохо.

⁶ Тэрэ үе сагай морилходо, далайн эрьеэр ажаһуугшад иигэжэ хэлсэхэ: «Маанадта туһалха, Ассириин хаанһаа абарха гэжэ бидэ тэдэ орон түрэнүүдтэ найдажа, гуйхаяа гүйдэлөөрөө ошодог бэлэйбди. Теэд харыт, манай найдаха юумэн үгы болоол! Яажа абарагдаха гээшэбибди?»