Исай 2 - Библи

Амгалан тайбан мандаха

¹ Иудын хан түрэ болон Иерусалим тушаа Амооцой хүбүүн Исайда Бурханай үзүүлэн айладхаһан үгэ гэбэл, энэ.

² Һүүлшын үдэрнүүдтэ иимэ юумэн болохо: Эзэнэй үргөөгэй оршодог хада бусад хадануудһаа эгээл үндэр болохо, толгойнуудһаа эгээл үндэрынь болон тодорхо. Тэрээн руу бүхы үндэһэтэд урдан хүүехэл.

³ Тиигээд олон арадууд ошожо, иигэжэ хэлэхэ: «Эзэнэй хада руу, Яковай Бурханай нангин үргөө тээшээ үгсэн ошоё. Юу хэхыемнай Бурхан һургаха, зааһан замаарнь ябахабди». Юуб гэбэл, Хуули Сионһоо гараха, Эзэнэй үгэ – Иерусалимһаа.

⁴ Үндэһэтэдэй хоорондохи арсалдаае Тэрэ болюулха, олон арад түмэниие шүүхэ. Тэдэ һэлмэнүүдээ анзаһанай шүдэн болгон, жадануудаа хадуур болгон дабтаха. Үндэһэтэн нүгөө үндэһэтэнэй урдаһаа һэлмэ бэшэ далайхагүй, дайнай эрдэм шудалхаяа болихо.

⁵ Яковай үри һадаһад, ерэгты, Эзэнэй гэрэл туяа соо алхалан ябая!

Хүнэй бардамлахань болюулагдаха

⁶ Теэд Та, Эзэн Бурхан, Өөрынгөө арад түмэн болохо Яковай үри һадаһадые орхёот! Юуб гэхэдэ, тэдэ зүүн зүгэй заншалтай, пилиштүүд шэнги үзэлшэ мэдэлшэдтэй болонхой, хариин зонтой холилдоно.

⁷ Тэдэнэй газар нютагта тоолошогүй ехэ алта мүнгэн нөөсэлэгдөө, морид дүүрэн, гоё һайхан тэргэнүүдынь тоолохын аргагүй олон.

⁸ Газар нютагынь шүтөөнүүдөөр дүүрэнхэй, өөрын гараар бүтээһэн бүтээлнүүдтээ тэдэ мүргэнэ.

⁹ Хүн бүхэниинь иигэжэ доройтожо, нэрээ гутаана, Та тэдэниие хүлисэхэгүйт.

¹⁰ Эзэнэй уур хилэнһээ, һүр жабхаланта хүсэ шадалһаа тэрьедэжэ, хадын хабшалда шурган гү, али газарта нүхэ малтан хоро!

¹¹ Хүнэй бардам харасын үгы болохо, хүнэй дээрэлхүү зангай номгодохо саг дүтэлжэ байна. Тэрэ үдэр Эзэн лэ гансаараа үндэр зандаа үлэхэл.

¹² Энэ хадаа бардам ба дээрэлхүү, биб гэһэн хүн бүхэниие панхаруутуулха үдэр – Түмэн Сэрэгтэ Эзэнэй үдэр!

¹³ Тэрэ Ливаанай үндэр, өөдөө ербыһэн үнэтэ хуша мододые болон Башаан газарай бүхы сарса мододые үгы хэхэ.

¹⁴ Тэрэ бүхы үндэр хада уулануудые, гүбээнүүдые жэгдэлэн набтар болгохо.

¹⁵ Ямаршье үндэр самхаг, яажашье бүхэлэгдэһэн хэрэм хана Тэрэ унагааха.

¹⁶ Таршиишай ямаршье томо, гоё һайхан уһанай онгосонуудые Тэрэ шэнгээхэ.

^17-18 Хүнэй бардам, дээрэлхүү зан тиихэдэ галхаагдан номгорхо. Шүтөөнүүд оро һэегүй үгы болохо, иигэжэ тэрэ үдэр Эзэн гансаараал үндэр зандаа үлэхэ.

¹⁹ Эзэнэй газар дэлхэйе доһолгохоёо ерэхэдэ, уур хилэнһээнь, һүр жабхаланта хүсэ шадалһаань тэрьедэхэ гэжэ зон хадын агынууд руу, газарай габа руу хорохо.

²⁰ Тэрэ үдэрэй мандахадань, зон мүргэхэеэ өөһэдтөө хэһэн алта, мүнгэн шүтөөнүүдөө хаяжа, мана һохорнууд, һарьһан эрбээхэйнүүд руу шэдэхэ.

²¹ Эзэнэй газар дэлхэйе доһолгохоёо ерэхэдэ, уур хилэнһээнь, һүр жабхаланта хүсэ шадалһаань тэрьедэхэ гэжэ зон хабсагайн хабшал руу, хадын агынууд руу хорохо.

²² Хүнэй ами наһан – амисхал гээшэ, үхэхэ табисууртай нэгэндэ найдаһанай дэмы. Тэрэ юуншье бэшэ бшуу.