Исай 17 - Библи

Араам болон Израиль хэһээгдэхэ

¹ Дамааск тухай Эзэн иигэжэ айладхал буулгаба: «Дамааск саашадаа хото гэгдэхэгүй, эбдэрһэн-һандарһан шулуун болоод лэ һалаха.

² Араамай хотонууд орхисооной болоод, тэндэ мал һүрэг бэлшэхэ, хэншье тэдэниие үргөөхэгүй.

³ Эпрааимай бүхэлэлтэнүүд һалаха, Дамааскын хаан түрэ мүн лэ һалаха. Израилиин уладай алдар солоёо алдаһандал адли амиды мэндэ үлэһэн Араамай арад зон нэрэ түрэгүй болохо. Энэ болбол Би, Түмэн Сэрэгтэ Эзэн, айладхана мүн!»

⁴ Эзэн иигэжэ айладхана: «Яковай алдар солын буураха, баялигынь хожоржо, үгытэй ядуу болохо сагынь дүтэлжэ байна.

⁵ Израиль орооһо таряанай хуряагдаһан хооһон хубхай талмайдал, таряа хадаһанай удаа Рэпаиимэй хүнды ямар хооһон болоод байдаг бэ – тон тиимэ болоод байхал.

⁶ Нэгэ хэдыл зон амиды мэндэ үлэхэ. Оливын модо сохиходо, эгээл дээдэ мүшэрэйнь оройдо хоёр-гурбан жэмэсэй үлэдэгтэл гү, али доодо һайн мүшэрнүүдтэнь нэгэ хэдыл жэмэсэй үлэдэгтэл адли Израиль болоод байха. Энэ болбол Би, Израилиин Бурхан, айладхана мүн!»

⁷ Тэрэ сагай ерэхэдэ, зон туһа эрижэ, Бүтээгшэдээ, Израилиин арюун Бурханда, эрьехэ.

⁸ Тэдэ өөһэдынгөө гар бүтээл болохо үргэлэй шэрээнүүдээ ойшохогүй, өөһэдынгөө бүтээһэн Ашэраа бурханай дүрсэнүүдтэ, шүтөөнүүдтэнь найдахагүй.

⁹ Тэрэ сагай ерэхэдэ, һайса бүхэлэгдэһэн хотонуудынь хооһоржо, орхисооной болохо. Израилиин зоной өөһэдэйнь урдаһаа хиив болон эмоор арадуудай тэрьедэһэндэл адли хотонуудынь мүн лэ тиимээр хооһорхо.

¹⁰ Израилиин улад зон, таанад абарагша Бурханаа, хабсагай мэтээр таанадые аршалдаг Бурханаа мартаат. Таанад шүтөөнэй мододые тарижа, хариин бурхадта зальбардаг болоот.

¹¹ Тэрэ үдэртөө урган сэсэглэхыень хүсэжэ һуулгаашье хадатнай юумэн ургахагүй. Харин гансал уй гашуудал тохёолдохо.

Дайсад дарагдаха

¹² Оо, олон үндэһэтэнэй хүл үймөөн далайн хүнхинэн шааяһан дуун мэтэ, ехэ долгинуудай хүүеэн мэтэ!

¹³ Үндэһэтэдэй ехэ шууяан мантан долгинуудай хүүеэн мэтэ, теэд Бурханай тэдэниие зэмэлхэдэ, һалхинда хиидэһэн хада уулын тооһо шорой мэтэ, хуй шуурганай тооһон мэтэ туугдан, тэдэ аяар холуур хиидэнэ.

¹⁴ Манай газар дайда хооһоруулагша дайсад үдэшэ алалсаа-хюдалсаа үүдхэнэ, харин үглөө болоходо, үгы болошоно. Тэдэ иимэл хубитай юм.