Исай 15 - Библи

Моһааб үгы хэгдэхэ

¹ Энэ болбол Моһааб тушаа зүгнэлгэ. Һүниин туршада дээрмэдүүлээд, Аар-Моһааб аниргүй болоо. Һүниин туршада дээрмэдүүлээд, Киир-Моһааб анираа хатаа.

² Дибоон хотын зон гашуудан уйлаһаар мүргэлэй газарнууд өөдэ гарана. Моһаабай улад зон Нэбоо болон Мэдэбаа тушаа сурхирса уйлана. Гашуудалай тэмдэг – хүн бүхэнэйнь толгой, һахал хюһагданхай.

³ Үйлсэнүүдээр зон гашуудалай таар хубсаһа үмдэнхэй ябана. Гэрэй хушалтанууд дээрэ болон хотын талмайнуудаар хүн бүхэн сурхирса уйлана, нулимса унагаана.

⁴ Хэшбоон болон Элэалээ хотонуудай ажаһуугшад шангаар уйлалдажа, абяаниинь Яаһац хүрэтэр дуулдана. Моһаабай сэрэг һалганана, сэдьхэлынь шэшэрнэ.

⁵ Моһааб тушаа зүрхэ сэдьхэлни уйлана. Моһаабай зон Цооһар болон Эглаат-Шэлишияа руу гүйлдэнэ. Лүхиит руу үгсэхэдөө, уйлалдан гарана, гай тухайгаа шангаар бархиралдан, Хоронааһим руу ошоно.

⁶ Нимриим шэргэшоо, ногоон шарлаа, хатаа, ногоорһон юуншье үгы болоо.

⁷ Зон нөөсэлһэн баялигтаяа хамта тэрьедэхэ гэжэ нюруу газар Аравиимаар хүндэлэн гаран ябана.

⁸ Моһаабай бүхы хилэнүүдээр шашхаан-хашхараан! Эглааим болон Бээр-Элиим хотонуудташье эдэ бүгэдэ дуулдана.

⁹ Димооной уһан шуһаар дүүрэн. Бурхан тэрээндэ үшөөшье гай тодхор татаха түсэбтэй: амиды үлэһэн моһаабууд руу, энэ орон нютагта амиды үлэгшэ зон руу арсалангуудые эльгэхэ!