Исай 12 - Библи

Магтаал дуун

¹ Тэрэ үдэр ши иигэжэ хэлэхэш: «Эзэн, Таниие магтанаб! Хэды намда уурлаашье һаа, уураа татажа, минии һанаа амаруулаат.

² Оо, Бурхан – минии абарал! Тэрээндэ найданаб, юунһээшье айнагүйб. Юуб гэбэл, Эзэн – минии хүсэн, минии шадал! Тэрэ – минии абарал!»

³ Абаралай булагһаа баяртайгаар уһа удхан байхат!

⁴ Тэрэ үдэр иигэжэ хэлэхэт: «Эзэниие магтан дуулагты! Нэрыень дуудагты! Бүтээһэн хэрэгүүдынь зондо мэдүүлэгты! Агууехэ байһыень зондо һануулагты!

⁵ Гайхамшагта хэрэгүүдые үйлэдэһэн Эзэниие магтан дуулагты! Бүхы дэлхэй энээн тухайнь мэдэг лэ!

⁶ Сионой ажаһуугшад, баясагты, шангаар дуулагты! Израилиин арюун Бурхан танай дунда агууехэ!»