Исай 11 - Библи

Амгалан тайбан хаан түрэ

¹ Ишайн уг отологдоһон модоной түгсүүл мэтэ, гэбэшье түгсүүлһээ шэнэ эшэ ургаха, түгсүүлһээ шэнэ мүшэр урган гараха.

² Эрдэмэй болон Эзэнһээ бэшэрхэ һүр һүлдэ, ойлголтын болон хүсэнэй һүр һүлдэ, сэсэн мэргэнэй болон оюун ухаанай һүр һүлдэ, Эзэнэй һүр һүлдэ Тэрээн дээрэ оршохо.

³ Тэрэ Эзэнһээ бэшэрһэн мэдэрэлээр дүүрэхэ, миин шагнаһанай гү, али миин обёорһоной ашаар хэрэгүүдые шүүбэрилжэ байхагүй.

⁴ Үгытэй ядуу зоной хэрэгүүдые үнэн зүбөөр шиидхэжэ, бэеэ аршалжа шадахагүй хүнүүдэй эрхэнүүдые хамгаалжа тэрэ байха. Үгэ хүүрээрээ газарые хюдажа, эшхэрхэдээ, муу хүниие һалгаажа байха.

⁵ Тэрэ үнэн зүбөөр бүһэлхэ, үнэн сэхэ Тэрэнэй бүһэ болохо.

⁶ Шоно хурьгантай хамта амгалан тайбан амидарха, ирбэс эшэгэнтэй хамта хэбтэхэ, тугал залуу арсалантай хамта хоолложо тиихэдэ байхал. Бишыхан хүбүүн тэдэниие адуулан байха.

⁷ Үнеэн баабгайтай хамта бэлшэжэ, тэдэнэй түл хамта амгалан хэбтэжэ, арсаланшье үхэртэл адли һолоомо эдижэ байхал.

⁸ Хорото могойн хажуугаар наадагша үхибүүн ямаршьегүй үлэхэ.

⁹ Бурханай нангин хада дээрэ ямаршье муу юумэн болохогүй. Уһан далайе дүүргэдэгтэл, газар дэлхэй хадаа Эзэн тухай мэдэсээр дүүрэнхэй байха.

Эзэнэй арад һөөргөө бусаха

¹⁰ Тэрэ үдэр Ишайн үри һадаһан арадуудта туг болохо, тэдэ арадууд тэрээн руу эрьехэ, оршодог газарынь алдар суутай болохо.

¹¹ Тэрэ үдэр Эзэн хоёрдохёо гараа һунгажа, Өөрын арад түмэнэй үлдөөсые бусааха, Ассириһээ, Египедһээ, Патроосһоо, Күүшһээ, Элаамһаа, Шинаарһаа, Хамаадһаа болон далайн аралнуудһаа асарха.

¹² Дэлхэйн найман зүгөөр сүлэгдэн тараагдаһан Израилиин болон Иудын хан түрэнүүдэй улад зониие дахин суглуулан бусаажа байһан тухайгаа үндэһэ яһатанда гэршэлэн харуулхын тула Бурхан дохёо тэмдэг – туг үргэн байха.

¹³ Эпрааимай хан түрын атаархал болихо, Иудын хан түрын дайсан мэтэ байхань үгы хэгдэхэ, тэдэ эбтэй эетэй болохо.

¹⁴ Хамта тэдэ баруун зүгтэ пилиштүүдэй гүбээнүүдтэ добтолхо, зүүн зүгтэ ажаһуугшадые тонохо. Эдоом болон Моһааб руу гараа һунгаха, Аммооной зон тэдээнэй мэдэлдэ орохо.

¹⁵ Эзэн Египедэй далайн хоолойе хатааха, Евфрат мүрэн хатаахаяа халуун һалхяар үлеэлгэхэ, хүнэй шаахайгаа тайлангүй тэрэниие гаталдаг болотор долоон багахан горхон болгон хубааха.

¹⁶ Израилиин зоной Египедэй орон нютагһаа гараһандал адли Ассиридэ амиды мэндэ үлэһэн Тэрэнэй арад түмэндэ һөөргөө бусаха ехэ зам харгы нээгдэхэ.