Исай 10 - Библи

¹ Үнэн зүб бэшэ хуулинуудые зохёодог, буруу шиидхэбэринүүдые бэшэдэг таанадта гай гасалан тудаха!

² Таанад үгытэй ядуу зоной хэрэгые буруу шиидхэнэт, эрхэнүүдыень хаһанат. Бэлбэһэн эхэнэрнүүдэй ба үншэн үхибүүдэй зөөри өөрын олзо болгонот.

³ Бурханай хэһээлтын үдэр таанад яахабта? Таанад дээрэ алас холоһоо гай тодхор Тэрэнэй асархада, яаха болонот? Хэнһээ туһаламжа эрин гүйхэбта? Баялигаа хаана нюухабта?

⁴ Алуулхат, үгышье һаа, баряанда абтахат. Энээнэйшье удаа Эзэнэй уур хилэн буурахагүй, хэһээхэ гэжэ гарынь һунгаатай зандаа байха.

Ассириин хаан тушаа

⁵ Эзэн иигэжэ айладхаба: «Оо, Ассири! Сухалым хүргөөһэн зониие Ассириин гараар, ташуур мэтээр тэрэниие хэрэглэн, хэһээхэм.

⁶ Би Ассириие бурхангүй үндэһэтэнэй урдаһаа, Минии уур хилэн хүдэлгэһэн арад түмэнэй урдаһаа ябуулхаб. Дээрмэдэхэ, тонохын тула, гудамжын шабар шабхай мэтээр зониие гэшхэхын тула эльгээхэб».

⁷ Гэбэшье Ассири иихэеэ һананагүй, энээн тушаа бодоногүй, тэрэ олон үндэһэ яһатаниие хюдаха, һалгааха һанаатай.

⁸ Тэрэ иигэжэ һайрхана: «Минии ударидагшад бултадаа хаашуул!

⁹ Калноо ба Кархэмииш, Хамаат ба Арпаад хотонуудые би диилэн абаа һэм. Самари ба Дамааскые диилээ һэм.

¹⁰ Шүтөөнүүдтэ мүргэдэг хан түрэнүүдые хюдан һандаргаагаа бэлэйб. Иерусалимай болон Самариин шүтөөнүүдтэ мүргэдэг зонһоо тэдэ угаа олон һэн.

¹¹ Тиимэһээ Самариие шүтөөнүүдтэйнь хамта хюдаһандал адляар би Иерусалимые мүргэдэг һиилэмэл хүрэгүүдтэйнь хамта һалгаахаб!»

¹² «Сион уула дээрэ болон Иерусалимда Өөрынгөө хэрэг хэжэ дүүргэхэдөө, бардам һайрхуу зантай Ассириин хааниие хэһээхэб», – гэжэ Эзэн айладхана.

¹³ Ассириин хаан иигэжэ бардамлана: «Би гансаараал эдэ бүгэдые хээб. Би хүсэтэйб, ухаатай сэсэмби. Арад үндэһэтэнэй хоорондохи хилэнүүдые үгы хэнэб, эд баялигыень дээрмэдэн абанаб, гайхамшаг томо бэетэй баатартал адли тэндэхи зониие дэбһэн гарааб.

¹⁴ Уурхайнууд соо байгааша үндэгэ зоной абадагтал, би арадуудай эд баялиг, газарыень буляан абааб. Намда эсэргүүсэн хүдэлхэ далишье байгаагүй, хушуугаа нээн, нам руу хашхарха хэншье үгы!»

¹⁵ Сабшагша хүндөө һүхэ өөрыгөө һайрхаха гү? Үгышье һаа, хюрөө өөрыень ашаглажа байгаа хүнэй урда өөрыгөө дээгүүр үргэмжэлхэ гү? Таяг хүниие үргэхэ бэшэ, хүн таягые үргэнэ. Мүн сохидог модон һабаа өөрөө хүниие сохихо бэшэ!

¹⁶ Тиимэһээ шанга баатарнуудыень хэһээхын тула Түмэн Сэрэгтэ Эзэн үбшэ хабша эльгэхэеэ байна. Тэдэнэй бэе махабадта гал дүлэн аһажа байһандал болохо, тэдэ шатаха-зобохо.

¹⁷ Израилиин Гэрэл Бурхан гал дүлэн болохо. Израилиин арюун Бурхан гал дүлэн боложо, нэгэ үдэр тэдэниие – үүргэнэ, халаахайе шатааха!

¹⁸ Гоё һайхан ой модон, үрэ жэмэстэ сэсэрлиг үбшэн хүнэй доройтодогтол адли болохо.

¹⁹ Үлөөшэ мододынь угаа үсөөн, тэдэниие үхибүүншье тооложо шадахал.

Нэгэ хэдынь лэ һөөргөө бусаха

²⁰ Израилиин үлдөөсэ зоной, Яковай удамай үлөөшэдэй өөһэдыень хюдааша үндэһэ яһатанда бэшэ түшэхөө болихо сагынь дүтэлжэ байна. Тэдэ зүб лэ Эзэндэ, Израилиин арюун Бурханда, түшэглэн этигэжэ эхилхэ.

²¹ Үлдөөсэнь бусаха, Яковай амиды мэндэ үлэһэн зоной үсөөхэниинь лэ хүсэтэ Бурхандаа бусаха.

²² Далайн элһэндэл адли тоогүй олон зоной Израильда мүнөө байгаашье һаань, оройдоол үсөөхэниинь лэ һөөргөө бусаха. Усадхалга хамагай зүб шүүлгээр тодорхойлогдонхой.

²³ Тиимэл даа, Түмэн Сэрэгтэ Эзэн түсэблэһэн хюдалга бүхы орон дотор хэхэ.

Ассириие хэһээхэ

²⁴ Сион уула дээрэ ажаһуугша арад зондоо Түмэн Сэрэгтэ Эзэн иигэжэ айладхана: «Минии арад түмэн, Сионой ажаһуугшад! Ассириин зонһоо бү айгты! Египедэй зоной дарлан зобоодогтол адляар таанадые тэдэнэй зобоогоошье хадань.

²⁵ Удахагүй Минии сухал тараха, Би таанадые хэһээхэеэ болихоб. Тиигээд тэдэниие хюдажа эхилхэб.

²⁶ Хирээгэй шулуун дээрэ Мидианай зониие сохиһондол, Би, Түмэн Сэрэгтэ Эзэн, тэдэниие ташуураар ташуурдахаб. Египедые хэһээһэндэл Ассириие хэһээхэб.

²⁷ Тэрэ сагай ерэхэдэ, тэрэнэй ашагша хүндэ ашаан мүр дээрэһээтнай унаха, хүзүүндэтнай үмдэхүүлһэн хөөмэгшэнь хухаран һалаха».

Дайсан добтолбо

²⁸ Дайсанай сэрэг Айһаат хотые эзэлбэ! Тэдэ Мигрооноор үнгэрбэл! Михмаашта нөөсэеэ хадагалба!

²⁹ Тэдэ дабаа дабаад, Гээбэдэ хоножо байна! Рамаа хотын зон шэшэрэлдэнхэй, Саулай түрэһэн хото болохо Гибаагай ажаһуугшад тэрьедээ.

³⁰ Галлиимай зон, хашхаралдыт! Лааһишай зон, шагнагты! Анатоодой зон, харюусагты!

³¹ Мадмэнаагай болон Гэбиимэй зон бэеэ абаран зугадана.

³² Мүнөөдэртөө дайсан Нообто байха. Иерусалимай толгой болохо Сион уула руу тэдэ нюдаргаа зангидан занана.

³³ Хараарайгты, Түмэн Сэрэгтэ Эзэн мододой мүшэр хухалдагтал агууехэ хүсөөрөө тэдэниие хухалан доошонь хаяха. Эгээл омог бардам, эгээл үндэрынь баһагдан доромжолуулагдаха.

³⁴ Ойн шэрэнгидэ мододой отологдоһондол, Эзэн тэдэниие түмэрөөр отолхо! Ливаанайшье үнэтэ сэнтэ модод тайрагдадаг шуу.