Исай 1 - Библи

¹ Иудын хаашуул Уззияа, Ётаам, Ахааз ба Хэзэкияагай үе сагта Амооцой хүбүүн Исайда Иудын хан түрэ ба Иерусалим тухай Бурханай үзүүлһэн үзэгдэл гэбэл, энэ.

Өөрын арад зониие Бурхан гэмнэнэ

² Огторгой, соносо, газар дэлхэй, шагна! Эзэн иигэжэ айладана: «Тэжээн үндылгэһэн хүүгэдни урдаһаамни эсэргүүсэн бодобол.

³ Сар өөрынгөө эзэниие танидаг, элжэгэншье хооллодог тэбшэеэ мэдэдэг лэ. Харин Израиль мэдэдэггүй, Минии арад түмэн ойлгодоггүй!»

⁴ Ай, халаг, таанад нүгэлтэй арад, гэм зэмэтэйт, муу зоной үринэр, муухай хүүгэдта! Эзэниие буруушаажа, Израилиин Нангин Арюуниие орхибот, Тэрээнһээ буруу харабат.

⁵ Үсэрхэлгэеэ дам үргэлжэлүүлжэл байгаашад, хаагууртнай үшөө сохимоор бэ?! Толгойтнай хуу яра шарха, бүхы зүрхэ сэдьхэлтнай үбшэ хабшан болонхой.

⁶ Толгойһоо эхилээд, хүлэй ула хүрэтэр танай бэедэ элүүр энхэ газар үгыл. Шахаагүй, боогоогүй, эм дом түрхеэгүй шарханууд, шулгархай, яранууд лэ байна.

⁷ Орон нютагтнай хооһороо, хотонуудтнай дууһан шатаагдаа, хараһаар байтартнай хариин зон танай газар эзэмдэн, бүхы юумыетнай залгина, һандаргана.

⁸ Үзэм жэмэсэй сэсэрлигэй хооһон талмай дээрэ ори гансаараа үлэһэн харууһалагшын урса гэрхэн мэтэ, ургасын таряалан дээрэ үлэгшэ үбһэн отог мэтэ Сионой басаган бүһэлэгдэн, ори гансаараа үлэбэл.

⁹ Хэрбээ Түмэн Сэрэгтэ Эзэн маанадта энэ жаахан үлэгдэл үлөөгөөгүй гээшэ һаань, бидэ Содомдол адли һүнөөгдэхэ, Гоморродол адли усадхагдаха байгаабди.

¹⁰ Иерусалим, удамаршад ба улад зонтнай Содом болон Гоморрын зондо адлил. Эзэнэй таанадта буулгаһан айладхал соносогты! Бурханайнгаа һургаал анхарагты!

¹¹ Тэрэ иигэжэ айладхана: «Танай эды олон үргэл Намда хэрэгтэй бэшэл. Хусын түгэс шатаалта үргэлдэ, тарган тобир малай өөхэндэ үни хада саданхайб. Бухын, хурьга, ямаанай шуһаншье Намда хэрэггүй.

¹² Намда мүргэхэеэ ерэхэдэтнай, эдэ бүгэдые асарагты гэжэ хэн гуйнаб?! Минии нангин үргөөгэй хашаа дэбисхэр дэбһэжэ ябахыетнай хэн баадхаа юм?!

¹³ Хэрэггүй эдэ бүхы бэлэгүүдээ бэшэ бү асарагты. Уталгануудтнай Намда жэгшүүритэй муухай. Шэнэ һара, амаралтын үдэр, шүтэлгын суглаануудыетнай Би тэсэжэ шадахагүйб, юуб гэхэдэ, тэдэ булта нүгэлөөртнай бузарлагдаа.

¹⁴ Таанадай Шэнэ һарын баярнуудые, мүргэлэй һайндэрнүүдые Би үзэн яданаб! Тэдэ Намда дарамта, Би тэдэнһээ эсэнэб.

¹⁵ Таанадай гуйжа гараа үргэхэдэ, Би харангүй байхаб. Хэдышье зальбараа хадатнай, Би шагнахагүйб. Юуб гэхэдэ, гартнай шуһанда зуурагданхай.

¹⁶ Бэеэ угаагты. Өөһэдыгөө сэбэрлэгты. Минии хаража байһан муу муухай үйлэ хэрэгүүдээ орхигты. Мууе үйлэдэхөө болигты.

¹⁷ Һайн хэрэгүүдые хэжэ һурагты. Үнэн зүбөөр хэрэг ябуулагты: дарлалта доро байгаашада туһалагты, үншэн хэнзые аршалагты, бэлбэһэн эхэнэрые үмэглэгты».

¹⁸ Эзэн иигэжэ айладхана: «Эбээрээ хэлсэе. Таанадай улайтараа нүгэлөөр бузарлагдаһаншье һаатнай, Би саһан мэтэ сагаан болотортнай угааха бэлэйб. Хүрин улаан болотороо нүгэлдэ баригдаһаншье һаатнай, сагаан нооһон мэтэ болотортнай угаан сэбэрлэхэ һэм.

¹⁹ Минии үгэ дуулабал, энэ газарай хамаг һайниие эдлэн эдин байхат.

²⁰ Харин Минии урдаһаа эсэргүүсэн бодобол, таанад һэлмээр сабшагдан хосорхот». Эзэнэй аман иигэжэ айладхана.

Нүгэлтэй хото

²¹ Хэзээ нэгэтэ үнэн сэхэ байһан ниислэл хото янхан эхэнэртэл мэтэ яагаад болоо гээшэб?! Нэгэ үедэ тэндэ үнэн шударга хэрэгүүд ябуулагдадаг, үнэн зүб оршодог бэлэйл, теэд мүнөө гансал алууршад үлэнхэй.

²² Иерусалим, хэзээ нэгэтэ мүнгэн мэтэ толоржо байһанаа мүнөө жэбэр болоош. Урдандаа үзэмэй дараһан архи мэтэ аад, мүнөө гансал хара уһандал адли болобош.

²³ Ударидагшадтнай гэмтэд, хулгайшадай нүхэд, бэлэг, эдилгэ абаашад. Тэдэ үншэдые хамгаалдаггүй, бэлбэһэн эхэнэрнүүдэй хэрэг шагнадаггүй.

²⁴ Тиимэһээ Түмэн Сэрэгтэ Эзэн, Израилиин Хүсэтэ Бурхан, иигэжэ айладхана: «Одоо даа, эсэргүүшэдээ диилэхэб даа, дайсадһаа үһөөгөө абахаб даа.

²⁵ Таанадай урдаһаа гараа һунгажа, холисоһоо түмэр сэбэрлэдэг мэтээр таанадые сэбэрлэжэ, бүхы холисыетнай зайсуулхаб.

²⁶ Удамаршадые, зүбшэгшэдыетнай анханай удамаршадтал адли болгоходом, Иерусалим үнэн зүб, үнэн сэхэ хото гээд нэрлэгдэдэг болохо».

²⁷ Үнэн шударга хэрэгүүдээрээ Иерусалим абарагдаха, гэмшэжэ, гэмээ мэдэрһэн зон үнэн зүб хэрэгүүдээрээ өөһэдтөө абарал буулгаха.

²⁸ Буһалгаалагшад, нүгэлтэй зон усадхагдаха, Эзэниие мартагшад һалаха.

²⁹ Сарса мододто мүргэдэг байһанайнгаа түлөө таанад эшэхэт; нангин һөөгүүдые шэлэһэнэйнгээ түлөө таанад нэрээ гутаахат.

³⁰ Набша намаагайнь шарлан унажа, хатажа байһан сарса модондол, ямаршье уһагүй сэсэрлигтэл адли болохот.

³¹ Хатаһан набша намаагай ошонһоо аһажа-шатажа байһандал, хүсэ шадалтай зоншье муу муухай хэрэгүүдэйнгээ хэмээр усадхагдажа эхилхэ, хэншье энэ гай тодхор саража-болюулжа шадахагүй.