Иоов 9 - Библи

Иоовой харюу

¹ Иоов харюудань хэлэбэ:

² – Хэлэһэн үгэшни үнэн гэжэ мэдэнэм. Гэбэшье ахирхан амидардаг бидэ Бурханай урда түгэс гэмгүй байжа яажа шадаха бэлэйбди?

³ Тэрээнтэй үгэ буляалдаха гэбэл, мянган асуудал табихадань, нэгэньдэншье зүб харюу олохогүйлди.

⁴ Тэрэнэй оюун ухаан, хүсэ шадалынь хизааргүй. Хэн Тэрээндэ эсэргүүсээд, бүтэн үлэһэн юм?

⁵ Уур хилэнсэгээрээ уула хабсагай бутаргахань Тэрээндэ юуншье бэшэ.

⁶ Газар дэлхэй хүдэлгэхэдэнь дэлхэй бүмбэрсэг үндэһөөрөө шэшэрэн һалганана.

⁷ Тэрэнэй зарлигаар наран хиртэжэ, одо мүшэд бүхэдэг.

⁸ Огторгойн түмэн одо мүшэдые бүтээһэн агуу хүсэниинь далайн мандал дээгүүр аялан зорино.

⁹ Тиигэжэ Долоон үбгэдые, Гурбан һогоониие, Зургаан мүшэдые, тэнгэриин бүхы ододые Тэрэ бүтээгээ.

¹⁰ Хүнэй ойлгохын аргагүй үй түмэн гайхамшаг юумэ бүтээжэ байдаг.

¹¹ Хажуугаарни үнгэрхэдэнь би Тэрэниие ажаглахагүй, алхасынь шэмээе дуулахашьегүй байнаб.

¹² Юушье абаа һаань, Тэрэниие һаатуулха арга байхагүй. «Юундэ энээниие абабат?» гэжэ хэн асууха эрхэтэйб?

¹³ Уурлажа эхилээ һаань, номгоруулха арга байхагүй. Рааһаб шүдхэрэй урда һүгэдэгшэд бүгэдэ Тэрэнэй урда сүхэрөө юм.

¹⁴ Тиимэһээ би Тэрээнтэй тоосолдохогүйб. Хэлэхэшье үгэ алга.

¹⁵ Буруу бэшэшье һаа, би харюу үгэжэ шадахагүйб. Агуу шүүгшэһээ үршөөл гуйхамнил үлэнэ.

¹⁶ Тэрээндэ хандахадамни, Тэрэ харюусабашье гэлэй, харин минии үгэ Тэрэ соносоо гэжэ би этигэхэгүй байнам.

^17-18 Шуурган мэтээр добтолжо, ушар шалтаггүй зобоожо, амилхашье сүлөө олгохогүй гэбэл Тэрэнэй эрхэ.

¹⁹ Эрхэ шадалынь хизааргүй ехэ, хэншье Тэрээндэ эсэргүүсэхэ шадалгүй. Шүүлсэхэ гээ һаа, хэн Тэрээниие дуудажа шадахаб?

²⁰ Би хэды буруу бэшэшье һаа, урдань мунхаг үгэ хэлээд лэ буруутан болохоб. Гэмгүйшье һаа, гэмтэн болохоб.

²¹ Үнэхөөр буруугүй байнам, теэд тэрэ шухала аал? Үхэхэм намда дээрэ байна.

²² Хүнэй гэмтэй гэмгүйнь үнэндөө ямар илгаатай юм бэ?

²³ Бүгэдэ адлихан Тэрэнэй гараар усадхагдадаг. Гэмгүй хүнэй гэнтэ үхөө гэхэдэ, Тэрэ шоглон энеэжэ байхал.

²⁴ Адагай муу хүмүүс энэ дэлхэйе зонхилжо, шүүгшэ, шүүмжэлэгшэдынь һохор мэтэ болонхой. Энэ байдалые Тэрээнһээ ондоо хэн бии болгоо юм бэ?

²⁵ Амидарални гүйгшэдэй урилдаан мэтэ хурдан үнгэрнэ. Тэрэ һайниие юрэдөө үзэнэгүй.

²⁶ Хүнэй амидарал гээшэ уһан дээгүүр һолжорһон хулһан онгосонууд мэтэ, олзодо шунаһан бүргэдэй дайраад гараһан мэтэ нюдэ сабшаха зуурын хэрэг.

^27-28 Зоболон гунигаа мартажа, уруу дуруу шарайгаа орхижо, энеэшье гээ һаань, шадахагүй байнам. Би үбшэ зоболонһоо айдаг ба таанар намайе буруутан гэһээр байнат.

²⁹ Тиимэ хадань минии дэмы зүдхэһэнэй ямар хэрэг байгаа юм?

^30-31 Үльгэрлэбэл, үбшэн бэеэ саһанай уһаар угаажа, гараа сабандан сэбэрлээшье һаам, намайе угаадаһанай нүхэндэ хаяхадатнай, үмдэһэн хубсаһандам хүрэтэр үмхэй бэеым үзэн ядаха болоһонтой жэшээтэй.

³² Тэрэнэй хүндэ адли байгаа һаань, би шүүлгын газарта заргалдан, Тэрээндэ харюу үгэжэ болохо байгааб.

³³ Зүгөөр хэншье бидэ хоёрой дунда зууршалан гараа табихагүй.

³⁴ Тэрэ һүлдэ барюулаа намһаа холодуулжа, һүрдүүлэн шиидхэхэеэ болиг лэ.

³⁵ Тиигэбэл айнгүй хэдэн үгэ хэлэмээр байна. Үгэ хэлэхэгүй шалтагаан үнэндөө намда байхагүй.