Иоов 8 - Библи

Билдаадай Иоовто хандаһан үгэ

¹ Шууһаа угай Билдаад харюудань хэлэбэ:

² – Ши хэр удаан иигэжэ дуугархабши? Гэмнэлгын үгэнүүдшни хүсэтэ һалхин мэтэл.

³ Бурхан шударга ёһые забхайруулдаг гү? Түгэс Хүсэтэ үнэниие буруу болгодог гү?

⁴ Үри хүүгэдшни Тэрэнэй урда гэм хэхэдэнь, Тэрэ нүгэлэйнь хүсэндэ тушаагаа ха юм.

⁵ Тиимэ хадань ши Түгэс Хүсэтэ Бурханһаа хүлисэл гуйгыш.

⁶ Хэрбээ ши үнэхөөр арюун шударга байбалшни, Тэрэ шинии түлөө Өөрөө бодожо, шинии үнэн шударгые гэршэлхэл.

⁷ Тиин урдынхиһаа үлүү өөдэргэ болоно бэзэш.

⁸ Эртын зоной ухаанһаа һуража, элинсэгүүдэй үзэжэ мэдэһэниие ойлгожо аба.

⁹ Бидэнэй мэдэсэ һая түрэһэн хүүгэдэйхи шэнги багахан, һүүдэр шэнги газар дээгүүр үнгэрхэдөө, юушье мэдэнэгүйбди.

¹⁰ Элинсэгүүдэй үлөөһэн ухаанһаа һура.

^11-12 Уһагүй газарта хулһан ургадаггүй. Уһанай шэргэбэл, энэ ургамал үбһэнһөө түргэн хатана.

¹³ Бурханда бэшэрдэггүй хүн энээнтэй адли юм.

¹⁴ Тиимэ хүнэй этигэл найдабари абаахайн шүлһэндэл хэбрэг ушарһаа хатаһан хулһанһаа бэлэхэнээр хухарна.

¹⁵ Абаахайн шүлһэндэ үлгэлдэһэн хүндэ ямар найдабари байхаб даа? Найдаһан гэрынь тогтодоггүй, хэдышье шагтагалдаа һаань, даахагүй.

¹⁶ Бурханда үлэ анхардагууд хог үбһэн мэтэ. Халуун наранда үдхэрэн ургажа, мүшэрнүүдынь сэсэрлигээр таража,

¹⁷ үндэһэнүүдынь хүрьһэн доогуур аһалдадагшье һаа,

^18-19 үндэһөөрнь һугалан байраһаань хүдэлгэбэл, оро мүргүй үгы болоод, орондонь ондоо үбһэн ургана. Амидаралайнь баясхалан энээгээр дүүрээ.

²⁰ Гэмгүй хүниие Бурхан бүримүһэн орхихогүй гээшэ үнэн, гэмтэ хүндэ туһалдаггүй гэдэгынь баһал үнэн.

²¹ Үнэхөөр ши гэмгүй һаа, Тэрээнһээ баяр жаргал оложо,

²² шамайе үзэн ядагшадые аягүй байдалда оруулхаш. Муу хүнэй гал гуламта хэзээ нэгэн сагта унтардаг.