Иоов 6 - Библи

Иоовой харюу

¹ Иоов иигэжэ харюусаба:

² – Минии зоболон жэнгээр хэмнэбэл, далайн бүхы элһэнһээ хүндэ байхал.

³ Тиимэһээ би дэмы шашажа һуунаб даа.

⁴ Түгэс Хүсэтын һомонууд минии дотор, тэдэнэй хорые һүнэһэмни уужа байна. Намайе айлгаха бүхы аргануудые Тэрэ хэрэглэхэ мэтэ.

⁵ Ногоондо бэлшэһэн хулан хашхарха гү? Үбһэ тэжээлэй тэбшын хажууда үхэр мөөрэхэ гү?

⁶ Дабһагүй хоол хэн эдихэб? Үндэгэнэй сагаанда амтан байха гү?

⁷ Үгэшни намда иимээр лэ һанагдажа байгаа ушартаа би хүлеэн абажа шадахагүй байнам. Ойшоон үзэбэл, хоротой хоол эдиһэн мэтэ болоно.

⁸ Минии хүсэһэниие Бурхан юундэ үгэнэгүйб даа?

⁹ Ами наһыем Тэрэ абаа һаань, би ехэ баярлаха байгааб.

¹⁰ Дууһашагүй зоболон минии эсэс болоно. Ямаршье хэсүү үедэ би арюун Эзэнэй үгэдэ зүрилдөөгүйб даа.

¹¹ Энээнһээ үлүү тэсэбэри намда байхагүй. Этигэл найдабаримни мүхэжэ, минии үхэлэй ямар хадань би тэсэхэ болонобиб?

¹² Би хада шулуун шэнги шанга бэшэб, минии бэе хүрэлөөр шудхаһан бэшэ.

¹³ Туйлдаа хүрэтэр ядарһан намда тулаха найдабари үгы.

¹⁴ Сүхэрһэн хүн Түгэс Хүсэтэһөө һүрдэхэ, гэбэшье анда нүхэдһөө энэрэл байха бэлэй.

¹⁵ Гэхэдэш таанар хаа-яа шэргэһэн, хаа-яа үерлэһэн горхон мэтэ найдабаригүй байнат.

¹⁶ Уулын саһа мүльһэнэй хайлахада иимэ горхон сэлхэлзэн харлабашье,

¹⁷ халуун наранай гарахада хатажа шэргэдэг.

¹⁸ Тэмээн хамбы тиимэ горхонһоо уһа ууха гэжэ зорин ошоходоо, ангажа үхэхэ туйлдаа хүрэдэг.

¹⁹ Тэмаа хотын тэмээн хамбышадай, Шэбаа хотын аяншадай дэмы найдаһан ушар олон.

²⁰ Губиин элһэн соо үгы болоһон уһа горхондо найдаһандаа тэдэ сүхэрөө.

²¹ Таанар мүнөө тиимэшүү байдалтай хадаа намда туһалжа шадахагүйт. Минии зоболон хараад һүрдэжэ байнат.

²² Би таанарһаа мүнгэ эринэ гүб? Өөрын зөөриһөө минии түлөө үргэ гээ һэн гүб?

²³ Үгы гэбэл, дошхон дайсанай һабарһаа абарыт гэжэ гуйгаа һэн гүб?

²⁴ Намайе һургагты, тиихэдэтнай би абяагүй болохоб. Гэмыем заажа үгэгты.

²⁵ Үнэн үгэ тэсэжэ шагнахань хэсүү байна, теэд тэрээнһээ ямар үрэ гарахаб? Минии бурууе баталаа бэшэт.

²⁶ Сүхэрһэн хүнэй үгэ һалхин мэтэ үнгэрдэг гэжэ бодоод, үгыем буруудхаха гэжэ байна гүт?

²⁷ Таанар үншэн хүнэй түлөө жээрэб хаяжа, анда нүхэрөө богоол болгон худалдаха этэгээд мэтэ хатуу сэдьхэлтэй байнат.

²⁸ Намайе харагты. Би таанарта худал үгэ хэлээгүйб. Минии урда бурууе хүлеэжэ, шударга бэшээр хандахаяа болигты.

²⁹ Энэ байдалые эрьюулэн бодобол, гомдохо хүниинь би гээшэб.

³⁰ Хэлэһэн үгэнүүдтэм худал бии гү? Буруу зүбые илгаха шадабарияа би алдаа гүб? Үгы, тиимэ бэшэ.