Иоов 5 - Библи

¹ Дуудахадаш харюусаха хүн байгаа юм гү? Гэгээнүүдэй алиндань хандаха болонош?

² Уур сухалынь тэнэгые үхэлдэ асарна, атаархал гэнэн нэгэниие үхүүлнэ.

³ Тиимэ нэгэ тэнэг баяниие хараа һэм. Һуурижажа үрдеэшьегүй байһан тэрэнэй гэрынь уданшьегүй хараалда ороо бэлэй.

⁴ Тэрэнэй хүүгэдтэ хэншье туһалхагүй, гэмнэлгын газарта хүүгэдыень шүүн шиидхэхэдэнь, үмэглэхэ хүн олдохогүй.

⁵ Ядуушуул тариһан таряаень хуряан эдихэ, хадхууртай хашаа дээгүүрнь үбһэ ногоо хулгайлан шэдэхэ. Мүнгэндэ уланхатагшад зөөридэнь һанаархаха.

⁶ Гай зоболон газар дороһоо ургадаггүй, гашуудал шоройһоо бии болодоггүй. Хүнэй буруу ябадалһаа гарадаг.

⁷ Галай ошоной дээшээ харбадагтал хүн зоболонгой түлөө түрэдэг.

⁸ Би шам шэнги һаа, Бурханда хандажа, ушараа хэлэхэ һэм.

⁹ Тэрэнэй хэрэгүүд агууехэ, ухаанда орошогүй, гайхамшаг зүйлнүүдынь тоо томшогүй.

¹⁰ Тэрэ газар дэлхэй дээрэ хура бороо оруулна, таряалан дээрэ уһа эльгээнэ.

¹¹ Доройтоһониие өөдэнь татажа, бэлбэһэн ядууе хамгаалан тэдхэдэг.

¹² Мэхэшэдэй түсэб нураажа шадана, тэдэнэй гарһаа амжалта алдагдана.

¹³ Тэрэ мэргэн ухаантайшуулые мэхэ гохоорнь баридаг, хэдышье сог залитайгаар забдаа һаань, тэрээнииень үрэ дүнгүй болгодог.

¹⁴ Тэдэндэ гараха газар үгы боложо, гэгээн үдэр гэнтэ харанхы боложо, наран шэнгэһэн мэтэ болодог.

¹⁵ Хүсэтэй нэгэнэй хүсэгүйе дарлахада Тэрэ зогсоожо, ядуушуулые хүсэтэнэй һабарһаа абардаг.

¹⁶ Тэрэшэлэн ядуушуул этигэл найдабари абажа, бузар булайе үүсхэгшэд амаяа хаахаһаа ондоо үгы болоно.

¹⁷ Бурханһаа һургаал абажа, зан заншалаа заһуулһан хүн үнэхөөр азатай. Тиимэһээ Түгэс Хүсэтын хэһээлтэһээ бү жэгшэ.

¹⁸ Тиигэжэ үбэдхөөдэг ба шархые боожо үгэдэг. Тэрэнэй мутарһаа гэмтээд, Тэрэнэй хүсөөр эдэгэһэн мэтэ болодог.

¹⁹ Долоон гай гамшагһаа доройтоошье һаа, удаань ши сэхэрхэш.

²⁰ Үлэсхэлэнэй үедэ үхэлһөө Тэрэ абарха, дайнай үедэ эритэ мэсэһээ зайлуулха.

²¹ Энгэй үдэрнүүдтэ хоб жэбһээ хамгаална. Тойроод хамаг юумэнэй һүнөөшье һаа, ши тэрээнһээ бү ай.

²² Үгырэл сүйрэл, үлэсхэлэн зоболон, зэрлиг арьяатан – алинһааншье айха хэрэггүй.

²³ Шулуу шоройшье һаа, шамда түшэг болохо, хээрын амитан шамтай эбтэй байха.

²⁴ Орон гэртээ тайбан һуужа, хашаа һарабшашни бүтэн байха.

²⁵ Үрэ хүүгэдшни үдхэн үбһэ ногоон шэнги үнэр олон байха.

²⁶ Амидаржа ханаад, наһанай туйлда ши хүрэхэш.

²⁷ Энэ үнэниие арайхан ухаалдижа олоһомнай энэл даа, шишье баһа мэдэжэ абабал, үлүү болохогүй.