Иоов 42 - Библи

Иоовой халаглал

¹ Иоов Эзэндэ иигэжэ хэлэбэ:

² – Эзэн минии! Танай хүсэлые хэншье һаа, һаатуулжа шадахагүй гэжэ би мэдэнэм.

³ Юушье мэдэхэгүй соогоо Минии хүсэл зорилго тухай яриха гэжэ оролдохо ямар эрхэтэйбши гэжэ Та намда хэлээ һэнта. Үнэхөөр би ойлгоогүй юумэеэ яряаб. Энэ гайхамшагта юумэ мэдэхэ арга үнэндөө намда үгы.

⁴ Та үгэ хэлэжэ, асуудал табин, харюу эринэт.

⁵ Энээнһээ урагша Тан тухай дуулаһан би мүнөө өөрын нюдөөр үзэбэб.

⁶ Тиимэһээ хэлэһэн үгэһөө арсажа, шорой, үнэһэн соо угаа халаглажа байнаб.

Иоовой гэм сагааруулга ба байдалынь һэргээлгэ

⁷ Иоовтой хөөрэлдэжэ дүүргээд, Эзэн Тэмаан хотын Элипаазда хандаба: – Минии зараса Иоов нам тухай үнэниие хэлэнэ. Гэхэдэш, ши хоёр нүхэдтэеэ хамта нам тухай худал үгэ хэлэһэн ушарһаа би та гурбанда уурлажа байнаб.

⁸ Иимэһээ та гурбан долоон буха, долоон тэхэ Иоовоор нядалуулан, Намда түгэс шатаалта үргэл үргэгты. Удаань Иоов таанарай түлөө Намһаа хүлисэл гуйха болоно. Таанар Иоовтой адли Нам тухай үнэн үгэ хэлэжэ шадаагүй хадаа хүндэ шиидхэл абаха ёһотойт. Гэбэшье Иоовой гуйлта Би дуулабал, таанарые хэһээлтэгүй орхихоб.

⁹ Тэмаан хотын Элипааз, Шууһаа обогой Билдаад, Наамаа обогой Цопаар Эзэнэй хэлэһэниие ёһолон дүүргэбэ. Тиигээд Иоов гурбан нүхэдэйнгөө түлөө хүлисэл гуйжа, Эзэн анхаран шагнаба.

¹⁰ Анда нүхэдэйнгөө түлөө хүлисэл гуйхадань, Эзэн Иоовто урда урданайхиһаа хоёр дахин үлүү эд зөөри үгэбэ.

¹¹ Иоовой аха дүү, анда нүхэд, танил талань сугларан, ехэ найр хэбэ. Эзэнһээ боложо асари ехэ зоболон үзэһэн Иоовто хүн бүхэн нэгэ нэгэ хэсиитэ мүнгэ, нэгэ нэгэ алтан һиихэ бэлэглэбэ.

¹² Эзэн Иоовой шэнэ байдалые урда урдынхиһаа жэшээгүй һайн болгожо үгэбэ. Иигэжэ Иоов арбан дүрбэн хонитой, зургаан мянган тэмээтэй, мянган паар сар үхэртэй, мянган элжэгэтэй болобо.

¹³ Энээнһээ гадна айл гуламта залгаха долоон хүбүүтэй, гурбан басагатай болобо.

¹⁴ Тэрэ гурбанай эгэшэнь Емимаа, дундахинь Хэциһаа, одхон басаганиинь Кээрэн-Хаппуух гэжэ нэрэтэй бэлэй.

¹⁵ Иоовой гурбан басагад шэнги гоё һайхан эхэнэрнүүд энэ дэлхэйдэ байгаагүй. Эртын заншалай ёһоор, имагтал хүбүүд лэ уг залгамжалдаг болобошье, Иоов гурбан үхиндөө хүбүүдтэеэ адли зөөри хүрэнгэ хубаан үгэбэ.

¹⁶ Тиигэжэ зоболон туйлаһанһаа хойшо Иоов зуун дүшэн жэл дэлхэй юртэмсэдэ амидаржа, гуша дүшэнэрөө нюдөөрөө хараба.

¹⁷ Тиигээд байдалдаа садажа наһа бараба.