Иоов 41 - Библи

¹ Тэрэниие барижа номгоруулна гэжэ бодохошье аргагүй. Харахадаа, зүрхэ алдахаар.

² Тэрэниие уурлуулхаһаа түбэгшөөхэгүй хүн гэжэ байхагүй. Тиимэ һэн хойноо минии урда хэн ерэжэ эсэргүүсэжэ шадахаб?

³ Намһаа урид тэрэ амитаниие номгоруулһан хүндэ шагнал үгэхэб. Хүхэ тэнгэриин доро оршодог юумэн хуу Минии.

⁴ Левиатан гэжэ тэрэ амитан тухай бодоходоо, тэгшэ бэе, шадал тэнхээ тухайнь хэлэхэһээ бэшэ юумэн үгы.

⁵ Хэн тэрэнэй хубсаһанай захаһаа үргэжэ шадахаб? Хэн тэрээндэ хазаар углахаб?

⁶ Хэн тэрэнэй хурса шүдэтэй амые ангайлгахаяа зүрхэлхэб?

^7-9 Нюргандань сэрэгэй хуягуудые зэргэлүүлэн табиһан мэтэ харагдадаг, хоорондонь агааршье орохо зай байхагүй.

¹⁰ Тэрэнэй найтаахань сахилгаан сахилһан мэтэ һүрөөтэй. Нюдэниинь мандажа байһан наран мэтэ.

¹¹ Аманһаань гал дүлэн гаража, ошо бутарһандал үзэгдэнэ.

¹² Хамарынь бусалжа байһан уһатай тогоонһоо уурал һабһаха мэтэ харагдадаг.

¹³ Амилхадань аманһаань гараһан галһаа нүүрһэ носоожо болохоор.

¹⁴ Адар хүсэтэ хүзүүтэй тэрэниие хараһан бүхэн үхэтэрөө айна.

¹⁵ Олон дабхар мяханиинь булшан шүрбэһөөр нягта холбогдожо,

¹⁶ тээрмын шулуун мэтэ хатуу зоригыень элишэлнэ.

¹⁷ Энэ дэлхэйн хамагай шадалтай хүнүүдшье тэрээнһээ айн шэшэрнэ.

¹⁸ Тэрээндэ эсэргүү байлдаха гэбэл, һэлмэ жада, һурша, хуяг хэрэгтэй бэшэ.

¹⁹ Хүхэ түмэр тэрээндэ үбһэнэй һолоомо мэтэ, хүрэл зэбсэг үмхирһэн модон мэтэ.

²⁰ Харбаһан һуршаһаа тэрэ дальтирхагүй. Шэдэһэн шулууе таряанай хальһан гэжэ тоолоно.

²¹ Мунса модые һолоомо гэжэ һанадаг, шэдэһэн жадын эшхэрээнһээ энеэдэниинь хүрэхэ.

²² Гэдэһэниинь хахархай шаазанай эри шэнги, ябахадань газар шорой анзаһаар хахалагдаһан мэтэ болодог.

²³ Тэрэнэй умбан ороходо, нуурай уһан бусалһан тогоон мэтэ бурьялна, далайн уһан хоро эдьхэһэн уһатай горшоогтой эрьюулгэ мэтэ хуйлана.

²⁴ Араһаань уһан арьялан, сагаан хөөһэн хахарна.

²⁵ Энэ дэлхэйдэ тэрээн шэнги зориг шадалтай амитан байхагүй.

²⁶ Амитадай хаан энэ гэжэ дэлхэйн бултанһаа бардам амитаншье хэлэдэг.