Иоов 4 - Библи

Элипаазай Иоовто хандаһан үгэ

¹ Удаань Тэмаан ороной Элипааз харюу хэлэбэ:

² – Минии үгэ тэбшэхэ гүш? Хэлэнгүй байхын аргагүй байна.

³ Ши олон хүндэ ухаа заажа, һал унаһан хүниие хүсэ оруулдаг бэлэйш.

⁴ Бүдэрһэн хүниие тэнхэрүүлдэг, сүхэрэгшые үгөөрөө тэдхэжэ туһалдаг байгааш.

⁵ Харин зоболоной өөртэшни буухадань һал унааш, зоболон бэеэрээ үзэхэдөө, урма зоригшни хухараа.

⁶ Бурханай үмэнэ бэшэрэн һүгэдэлгэ шинии этигэл, үнэн шударга замаар ябаһаншни шинии найдабари бэшэ юм гү?

⁷ Һанаад үзыш: гэмгүй аад, хэн мүхэһэн байнаб? Хаана шулуун шударга хүнүүд һүнөөгдэжэ байгаа юм бэ?

⁸ Харин би хараһан байнаб: нүгэлэй таряаланда зоболон таригшадта тэрэнь өөһэдынь толгой дээрэ буудаг.

⁹ Бурханай амисхалһаа тэдэ хосордог, Тэрэнэй уур хилэнсэгэй хүсэтэ сохилтоһоо һүнэн ошодог.

¹⁰ Дошхон арсалангууд шангаар хэрхирнэ, теэд залуу арсалангуудай шүдэнүүд һуга татуулан абтанхай.

¹¹ Эдишэеэ олохоо болиһон арсалан үхэжэ, гүлгэдынь бутаран тараба.

¹² Намда нэгэ үгэ нюусаар ерэжэ, шэхэндэмни шэбэнээн дуулдаба.

¹³ Харанхы һүни аймшагтай зүүдэ зүүдэлээд,

¹⁴ үхэн айжа, яһа мүсэмни шэшэргэнэбэ.

¹⁵ Нюурайм хажуугаар һүнэһэнэй үнгэрэн гарахада, толгоймни үһэн үрзыхэдэл гэбэ.

¹⁶ Тогтоод хажуудам байгаа, теэд түхэл дүрсыень илган танижа шадахагүй байбаб. Аниргүй байдал. Удаань би үгэ дуулабаб:

¹⁷ – Хүн түрэлхитэн Бурханай үмэнэ гэмгүй байжа шадаха гү? Хүн өөрын Бүтээгшын үмэнэ сэбэр байжа шадаха гү?

¹⁸ Тиигэжэ Өөрын зарасанарташье Тэрэ этигэдэггүй, Эльгээмэлыньшье урдань буруу байдаг.

¹⁹ Шабар гэртэ һуудаг хүндэ найдахын аргагүй. Тэдэниие усадхахань хорхой алахаһаа бэлэн.

²⁰ Үглөөгүүр амиды байһан хүн үдэшэ хосордог.

²¹ Иигэжэ амидаралай удха ушарые ойлгоогүй байтарынь, үхэл гэнтэ гэрэй тооноор сүмэрэн унахал.