Иоов 39 - Библи

¹ Зэрлиг амитадые ши өөрын дураар захиржа шадаха гүш? Янгир ямаанай эшэгэлхэ сагые шиидхэжэ шадаха гүш? Зэрлиг һогооной тугаллаха үедэ хажуудань байдаг гүш?

² Һогоон хэды һара хээлитэй байдагынь хэлэхэ гүш? Тугаллаха сагынь тогтоожо шадаха гүш?

³ Һогоонууд үбдэжэ зобон тугалладаг.

⁴ Тугалынь хээрэ талада дураараа үдэжэ, хүсэ шадал ороходоо, унаһан газараа орхин ошодог. Ши тэдээн тухай хэр зэргэ нарин мэдэн захиржа шадахабши?

⁵ Хээрын зэрлиг элжэгэндэ тэрэ сүлөөтэ амидаралыень хэн үгэһэн бэ?

⁶ Хужартай хооһон талые тэрэнэй гэр орон болохые Би шиидэжэ тогтоогоо һэм.

⁷ Зэрлиг элжэгэн хотын шууяанһаа хулжан ошожо, хүнэй гараар тэрэниие һурган унахын аргагүй.

⁸ Уулын нюруугаар дамжан бэлшэжэ, ногоо оложо эдинэ.

⁹ Зэрлиг үхэр ажалдашни зүдхэжэ, тэбшын дэргэдэ бүхэли һүни зогсохые хүсэхэ гү?

¹⁰ Ши тэрээндэ анзаһа хүллэжэ, газар хахалжа шадаха гүш?

¹¹ Шадал ехэтэй зэрлиг үхэртэ найдажа, хүндэ ажалаа хүүлэжэ шадаха гүш?

¹² Тэрэнэй хүсөөр ургасаа хуряагаад, таряа сохидог газарта хүргүүлжэ шадаха гүш?

¹³ Тугас шубуунда үнгэтэ дали, тэмээн шубуунда ниидэхэшьегүй һаань, үдэ ши үгөө һэн гүш?

¹⁴ Тэмээн шубуун газар дээрэ үндэгэлэн хээрын дулаахан шоройдо үндэгэеэ хадагалдаг.

¹⁵ Хээрын амитан хүн үндэгыем гэшхэнэ гэжэ тэрэ һанаа зобохогүй.

¹⁶ Тэрэ шубуун өөрын үндэгые үри гэжэ тоолохогүй, бүхы оролдолгом дэмы болохо гэжэ ойлгохогүй байна.

^17-18 Бурхан тэрээндэ сэсэн ухаан үршөөгөөшьегүй һаа, хурдан хүл, мори ахиха шадабари үгөө.

¹⁹ Ши хүлэг мориндо шадал үгэжэ, хүзүүень намирһан дэлһээр хушаһан гүш?

²⁰ Шааруул мэтэ дүүлин харайха шадабари тэрээндэ үгөө гүш? Сошомо шангаар турьяха һүр солгёо ши тэрээндэ үгөө гүш?

²¹ Солгёон хөөрүүгээр туруугаараа газар сохин, шадал соогоо урагшаа тэгүүлэн байлдаанда ороно.

²² Аюул тэрэ тоохогүй, хурса һэлмэһээ багаханшье һүрдэхэгүй.

²³ Эзэнэйнь номо һаадаг һэлжэгэнэн, наранай гэрэлдэ жадань ялалзана.

^24-25 Хүлэг мориной амыень татаха хэсүү болоно. Бүреэгэй абяа дууламсаараа морид шангаар турьян дүүлинэ. Хүлэгүүд холоһоо тулалдаанай охи үнэр абажа, сэрэгэй удамаршын хашхараа соносоно.

²⁶ Харсага шубуунда урда зүг ниидэхэ ухаа ши үгөө гүш?

²⁷ Шинии хүсэлөөр бүргэд далияа дэлгэн үндэр тээшэ дүүлижэ, уулын орьёлдо уурхайгаа түхеэрдэг гү?

^28-30 Тэрэ шубуун эгсэ хабсагайда уурхайгаа барижа, тэрэ үндэрһөө олзо хараашалан, дальбараадаа шуһа амасуулна. Үхэһэн һэеын холошье һаань, хурса нюдэтэй бүргэд заатагүй ерэхэ.

Иоовой шаналалга

³¹ Эзэн Иоовто хандажа асууба:

³² – Түгэс Хүсэтэ Намтай үгэ буляалдаха һанаатай байнаш. Намайе буруу болгохо үгэ байна гү? Ямар харюу үгэхэ байнаш?

³³ Иоов иигэжэ харюусаба:

³⁴ – Танай хажууда би хэн гээшэбиб даа. Хэлэхэ юумэн намда үгы. Амаа таглаа һаамни дээрэ.

³⁵ Энээнһээ урда би Танда хандан, хэдэн удаа яриһан байнаб. Оройдоошье абяа гарахаяа болёоб.