Иоов 38 - Библи

Бурхан Иоов хоёрой үгэ андалдаан

¹ Хара һалхин сооһоо Иоовто Эзэн харюусаба:

² – Ши юумэ мэдэхэгүй аад, Минии хүсэл зорилго тухай яриха гэжэ оролдохо ямар эрхэтэй юмши?

³ Зориглон бүһэеэ бүһэлжэ, Минии табиһан асуудалда харюуса.

⁴ Энэ дэлхэйе бүтээжэ эхилхэдэм ши хаана байгаа юмши? Оршолоной яажа бүтэдэгые ойлгодог һаа, ши тайлбарилжа үгэ.

⁵ Дэлхэйн хэмжээ хизаарые хэн тогтооһон бэ? Бүтээхэдээ, хэн ооһор татажа хэмжэһэн юм бэ?

⁶ Газар дэлхэйн үндэһэн юун дээрэ табигдаһан бэ? Хэн дэлхэйн тулаха углуугай шулуу тогтоогооб?

⁷ Тэрэ үедэ үглөөнэй одод баярлан дуулажа, Бурханай хүбүүд согтой хашхаржа байгаа.

⁸ Гүн далайн газар дороһоо нэбтэрэн гарахадань хэн үүдыень хаажа хизаарлаһан байнаб?

⁹ Тэрэ үедэ Би захагүй далайда үүлэн хушалта нэмэржэ, харанхы оршон тогтоогооб.

^10-11 Би Өөрөө далайн үүдэ хаагаад, «Хүсэтэ долгиншни энэ хүрэтэр хүрөөд, саашаа дэлбэржэ болохогүй» гэжэ зарлиг буулгахадам, хэн гүйсэдхөөгүй байгааб?

¹² Иоов, ши наһан соогоо зарлиг буулган үүр сайлгажа үзэһэн гүш?

¹³ Гэрэлтэ үглөөе дэлхэйдэ түхөөжэ, дэлхэйн захаһаа барижа һэжэрээд, харанхы һүни гэм хэдэг хүнүүдые тонилгоһон гүш?

¹⁴ Үүр сайхада, хада уулын, тала хүндын илгаань шабар дээрэ тамга табижа зураһан мэтэ тодорно.

¹⁵ Үдэрэй һаруул ерэхэдэнь гэмтэ хэрэгтэн хорото ажалаа хэхэ аргагүй боложо, хүсэ шадалынь бууража, гарынь хухарһан мэтэ болодог.

¹⁶ Ши далайн гүнзэгыдэ орожо, эхи захыень үзөө һэн гүш?

¹⁷ Үхэлэй үүдэн гэжэ мэдэхэ гүш, шэб харанхын үүдэ хэн шамда харуулааб?

¹⁸ Дэлхэй юртэмсын хэр зэргэ уужам болохые ши мэдэхэ гүш? Эдэ бүгэдые ши мэдэхэ һаа, Намда харюу үгэ.

¹⁹ Гэрэл харанхы хоёрой хаанаһаа ерэдэгые ши мэдэхэ гүш?

²⁰ Тэдээниие өөрын дураар захиржа шадаха гүш?

²¹ Энэ дэлхэйе бүтээхэ үедэмни ши хажуудам байжа, хизааргүй үндэр наһа наһалһан мэтэ яридаг ушарһаа энэ бүхэниие мэдэхэл ёһотойш.

²² Дай дажар зогсоохын тулада зарим үедэ саһа мүндэр оруулдагби.

²³ Тэрэниие хаана бэлдэн нөөсэлдэгым ши хараһан гүш?

²⁴ Ямар ушарһаа сахилгаан сахилжа, зүүн зүгһөө һалхин үлеэдэг бэ?

^25-27 Бороогой ороходо эзэгүй тала губинууд ундалдаг. Уһа уужа садахадаа, үбһэ ногоо ургуулдаг. Хэн энэ бороогой орохо, шуурганай хүдэлхэ нүхэсэл тогтоодог бэ?

²⁸ Хура бороо, шүүдэрэй уһан хүнтэй адли түрэдэг гэжэ гү?

²⁹ Гол нуурай уһанай, газарай хүрьһэнэй шулуун мэтэ хүлдэхэдэ,

³⁰ тэрэ саһан мүльһэн сэбдэг хүйтэн эхын хэбэлһээ түрэнэ гэхэ гүт?

³¹ Ши Зургаан мүшэдые хоорондонь холбожо, Гурбан һогоониие һалган илгажа шадаха гүш?

³² Жэлэй дүрбэн уларил соо одо мүшэдые зохихо байрадань табижа шадаха гүш? Долоон үбгэдые ши захиржа шадаха гүш?

³³ Тэнгэриин хуули ши түгэс мэдэжэ, дэлхэйн зүй гурим тогтоожо шадаха гүш?

³⁴ Үүлэдтэ захиралта үгэжэ, бороо оруулжа шадаха гүш?

³⁵ Сахилгааниие зонхилходош,

³⁶ тэрэ «Зай, би бэлэн» гэжэ хэлэхэ гү?

^37-38 Энэ ехэ оюун ухаае хэн бии болгоһон бэ? Хүхэ тэнгэриһээ уһа сүршэжэ, хуурай шоройе норгохо гээшэ хэнэй захиралтаар хэгдэһэн бэ?

^39-40 Арсаланай үлэн гүлгэдэй эшээндээ хоол хүлеэхэдэнь, ши эхэ арсаланда хоол олгожо шадаха гүш?

⁴¹ Хирээгэй үлэн дальбараахайнуудай хоол эрин хушуугаа ангайлгахадань, ши эхэ хирээдэ хоол үгэжэ шадаха гүш?