Иоов 37 - Библи

¹ Тэнгэри дуугархадань, айдаһамни хүрэжэ, зүрхэмни дэлбэ гарахаа һанана.

² Энэ аймшагтай дуун Тэрэнэй аманһаа гараһан бололтой.

³ Тэнгэриин дуун дэлхэйн нэгэ захаһаа нүгөө заха хүрэтэр дуулдажа, сахилгаан нэбтэ шобто сахилна.

⁴ Энэнь хадаа Хүсэтэ Эзэн һүр жабхалантай дуу хоолойгоор үгэ хэлэһэн мэтэ. Дуу сахилгаанда хизаар байхагүй.

⁵ Тэрэ үгэеэ хэлэжэ гайхамшаг хэрэгээ бүтээдэг. Хэн энээниие ойлгожо шадахаб?

⁶ Тэрэнэй зарлигаар саһан орожо, бороо шудхана.

⁷ Тэрэнэй хэрэгүүдые бүхы зоной мэдэхын тулада хүсэ шадалаа иигэжэ харуулдаг.

⁸ Хээрын зэрлиг амитад эшээндээ хороно.

⁹ Урда зүгһөө хүсэтэ һалхин буудаг, хойто зүгһөө хүйтэн ерэдэг.

¹⁰ Тэрэнэй хүсөөр гүнзэгы уһан, үргэн гол мүльһэтэн хүрэнэ.

¹¹ Тэрэнэй хүсөөр тэнгэриин үүлэндэ ехэ уһан сугларжа, тэгэн дундань сахилгаан сахилдаг.

¹² Тэрэнэй хүсэлөөр үүлэн нүүжэ, үгэ бүхэнииень дуулан дахана.

¹³ Бурханай шиидхэбэреэр нэгэ газарта хайра, нүгөөдэ тээ хэһээлтэ буужа байдаг.

¹⁴ Иоов, та минии үгэ анхаран шагнагты. Бурханай бүтээһэн гайхамшагта юумые бодоод үзыт.

¹⁵ Тэрэнэй зарлиг үүлые захиржа, сахилгаа сахилуулха гэжэ мэдэхэ гүт?

¹⁶ Үндэр тэнгэридэ үүлэнэй хайшан гээд тогтохые мэдэхэ гүт? Тэрэнэй мэдэсэ, бүтээһэн хэрэгүүдынь гайхал түрүүлдэг.

¹⁷ Урда зүгһөө бүгшэм ерэхэдэнь, хубсаһаал тайлажа шаданат.

¹⁸ Тэрээндэ адли шудхамал толи мэтэ сэлмэг тэнгэриие бүтээжэ шадаха гүш?

¹⁹ Тэрээнтэй юугээ ярихаашье мэдэхэгүйш. Та бидэндэ заажа үгэхэ гүт? Энэ харанхыда юушье ойлгонобди.

²⁰ Би Тэрээнтэй яринаб гэжэ хэлээгүйб. Агуу хүсэниинь ерэжэ усадхана аа гү гэжэ айжа байнаб.

²¹ Үүлэнэй саанахи наран харагдахашьегүй һаань, һалхин үлеэжэ үүлые тараадаг.

²² Тэнгэриин хойто хаяада сугларһан үүлэн наранай гэрэлдэ алтан мэтэ туяаран харагдадаг. Бурханай ойро алтан үүлэнтэй жэшэхээр бэшэ бүришье һүрөөтэй.

²³ Хэн Түгэс Хүсэтэдэ ойртожо шадахаб? Агууехэ хүсэтэй аад, тэрэ хүнүүдые дарладаггүй, үнэн шударгыгаар харилсадаг.

²⁴ Тиимэ дээрэһээнь хүнүүд Тэрэниие үргэмжэлэн хүндэлдэг. Хэршье ухаатай һаа, Тэрэнэй урда юуншье бэшэбди.