Иоов 36 - Библи

Элиһүүгэй түгэсхэлэй үгэ

¹ Элиһүү үгэ хүүрээ үргэлжэлүүлэн, иигэжэ хэлэбэ:

² – Тэсэжэ шагнабалшни, Бурхан тухай юу хэлэхэ һанаатай байһанаа шамда харуулхаб.

³ Би мэдэлгэеэ алас холоһоо абажа, зүб байдалые Бүтээгшэдэ хамааруулнаб.

⁴ Би гансашье худал үгэ аманһаа унагаангүй, үнэнииел харуулнаб.

⁵ Түгэс Хүсэтэ болобошье, Тэрэ хатуу сэдьхэлтэй хүниие хүлеэн абаха.

⁶ Гэмтэй хүнүүдые удаан амиды байлгадаггүй, зобожо дарлагдаһан хүниие шударгы хамгаалдаг.

⁷ Гэмгүй хүндэ тэрэ хайраяа үршөөжэ, хаан мэтэ хүндэтэй болгодог.

⁸ Зарим нэгэниинь нэрэтэй болоходоо, бэеэ магтан һайрхаһаар буруутажа, түрмэдэ хаагдаһан гэнжэтэй гэмтэн мэтэ болоходонь,

⁹ бардам занһаа боложо гэм хэһыень Тэрэ харуулжа,

¹⁰ буруу замһаа зайлаха эрилтэ табина.

¹¹ Хэрбээ тэдэ Тэрэнэй үгэ дуулан, зааһан замдань оробол, байдалынь һайжаржа, үлэһэн наһа үедөө элбэг жаргалтай болоно.

¹² Тэрэнэй үгэ дуулаагүй һаа, үнэн байдалаа ойлгонгүй ябаһаар эритэ зэбсэгһээ наһа барана.

¹³ Бурханиие сэгнэдэггүй зон хоро һанажа ябадаг, түрмын оёорой гэмтэн болоһоншье һаа, Тэрээнһээ туһаламжа эридэггүй.

¹⁴ Тиигэжэ тэдэ эдир наһандаа янхан эрэшүүлэй дунда худхаһаар үхэдэг ушар олон.

¹⁵ Гэбэшье зобоһон хүниие Тэрэ абардаг, зобохо үедэнь дарлагдагшатай ярилсадаг.

¹⁶ Тэрэ таниие зоболонһоо абаржа, аюулгүй, түбшэн зохид, унда хоолтой элбэг дэлбэг амидарал үгэхэ хүсэлтэй.

¹⁷ Харин та гэмтэн мэтэ шиидхүүлхэ тухай бодожо байнат. Хуули шүүлгэ, шиидхэл сааза тухай һанаа сэдьхэлээ табинат.

¹⁸ Хэзээ нэгэтэ хэрэг шүүхэдээ эдилгэ абаһан байжа болоо хат. Харин мүнөө шүүлгэбэл, зөөри хүрэнгэтнай таниие хамгаалжа шадахагүй. Иигэжэ бэеэ бү мэхэлэгты.

¹⁹ Хүнэй эд хүрэнгэ, хүсэ шадал Бурханай шиидхэлһээ зайлуулхагүй. Тиимэ аргаар хосоролһоо холодохогүйт.

²⁰ Һүни дунда наһа бараашье һаа, шиидхэлһээ зугадахагүйт.

²¹ Зоболон гаталхын тулада ондоо зам шэлэхэ болонош. Тиигээгүй һаа, Бурханай үмэнэ улам буруутахат. Таниие ондоо замда оруулхын тулада Тэрэ туршалга хэжэ байна.

²² Тэрэнэй хүсэ шадалай хэр зэргые мэдэнэ гээшэ гүт? Тэрээнтэй тэнсэхэ багша үгы.

²³ Хүнэй ухаан хажуудань юуншье бэшэ. Хэн Тэрэниие һургажа шадахаб? Хэн Тэрэниие буруудхаха эрхэтэйб?

²⁴ Хүнүүд хэһэн юумыень магтан дурдадаг. Танайшье тиигэбэл, зохистой.

²⁵ Бүхы хүнүүд тэдэ хэрэгүүдые хаража болоно.

²⁶ Түгэс Хүсэтэ Тэрэниие гүйсэд ойлгохын аргагүй. Эгүүридэ оршодог Бурханиие ойро зуура амидардаг бидэ ухаандаа багтаажа шадахагүйбди.

²⁷ Бурхан газар дэлхэйһээ уһа уурал дэгдэхээжэ, бороогой үүлэн болгон хубилгана.

²⁸ Тэрэ үүлэнһээ хура бороо орожо, бүхы дэлхэйе уһална.

²⁹ Бурханай бороогой үүлэ нүүлгэжэ, тэнгэри дуугаргадагыень хэн ойлгожо шадахаб?

³⁰ Үүлэнэй забһараар наран харагдажа, хүрьһэтэ дэлхэйдэ, далайн гүндэ гэрэл тудана.

³¹ Иимэ аргаар Тэрэ хүнүүдые шиидхэхын зэргэ элбэг дэлбэг ургаса хайрладаг.

³² Бурханай гарта сахилгаан байха, Тэрэнэй зааһан тээшэ буудал буудаг.

³³ Хүхэ тэнгэридэ һүрөөтэ абяанай дуулдахада, һалхи шуурган эхилхэнь гэжэ үхэр малшье ойлгодог.