Иоов 35 - Библи

Элиһүүгэй дүрбэдэхи үгэ

¹ Элиһүү үргэлжэлүүлбэ:

² – Иоов, Бурхантай өөрыгөө сасуулан, өөрыгөө Бурханһаа үлүү шударга гэжэ тоолохо хэрэггүй.

³ «Минии нүгэл хилэнсэгүй амидарал намда ямар ашагтай юм?» гэжэ хэлэнэш.

⁴ Би энээндэшни, шамда ба шинии нүхэдтэ харюу үгэхэм:

⁵ Хүхэ тэнгэри өөдэ харыт. Хүрэжэ болошогүй үндэртэ үүлэнүүд хөөбэлзэн байна.

⁶ Энээндэл гэмтэ амидаралтнай Бурханда хүрэшэгүй холо. Тооложо барашагүй нүгэл хээшье һаа, Тэрэниие хохироожо шадахагүй.

⁷ Мүн баһа гансашье гэм хээгүйб гээд, Тэрээндэ юу үгэхэбши? Энээгээрээ та Тэрээндэ туһа хүргэнэ бэшэт.

⁸ Гэмтэ ябадалаараа өөртэйгөө адли бусад хүнүүдыел хохирооно бэзэт. Һайн үйлэ хэбэл, хүнүүдтэ туһатай. Харин юртэмсын Эзэндэ энэ бүхэн хамаагүй.

^9-11 Зобожо дарлагдаһан хүнүүд уйлан ёоложо, хархис этэгээдүүдэй һабарһаа гараха гэжэ тэгүүлбэшье, тэдэниие Бүтээгшэ хэсүү үедэ туһалжа шадаха гү гэжэ ойлгодоггүй. Хүнүүдые бүтээхэдээ, арьяатан амитантай, жэгүүртэн шубуунтай жэшэмээр бэшэ ехэ ухаа үгэһэниинь ушартай гэжэ ухаалдидаггүй.

¹² Тэдэ Тэрэниие тоонгүй омог бардам байдаг ушарһаа хэсүү үедэ туһа гуйхадаа Тэрээнһээ харюу абажа шадахагүй хадаал дэмы уйлан ёололдоно.

¹³ Түгэс Хүсэтэ Бурхан хүнүүдэй гуйлтые хэрэгсээдэггүй.

¹⁴ Тэрэниие харанагүйб, Тэрэниие хэрэг шүүлгэдэ ерэхыень хүлеэнэб гээ хадаа хүлеэхэл болоош.

¹⁵ «Тэрэ хадаа гэмтэ хүниие анхарангүй, гэмтэ хэрэгые шиидхэнгүй үнгэрдэг» гэжэ дэмы хэлэхышни тоохо болихо хэрэг үнэндөө Тэрээндэ байна гү?

¹⁶ Иоов үнэндөө юушье мэдэхэгүй аад, дэмы үгэ дуугаржа байна.