Иоов 34 - Библи

Элиһүүгэй гурбадахи үгэ

¹ Элиһүү саашань үргэлжэлүүлбэ:

² – Сэсэн мэргэн таанар, намайе шагнагты.

³ Хэлэн, тангалайн хоолой амта танидаг шэнги шэхэн хүнэй үгэ шагнаха дуратай байдаг.

⁴ Бидэ өөһэд соогоо Иоовой зүб бурууе шиидхэхэ ёһотойбди.

⁵ «Гэм зэмэгүй намда Бурхан үнэн шударга бэшээр хандажа байна.

⁶ Өөрын зүбые баталһан би худалшан болохоёо байна гүб? Засаг хуулидань зааханшье зүришөөгүй байхадам ами наһыем абажа байна» гэжэ Иоов хэлэбэ.

⁷ Иоов шэнги уһа ууһандал бэлэхэнээр нүгэлтэй юумэ хэлэжэ байдаг,

⁸ хоро һанаашадтай, этэгээд үйлэ үүсхэгшэдтэй хослодог хүн хаанашье үгы.

⁹ «Бурханай замаар ябахань ямаршье ашаггүй» гэжэ тэрэ хэлээ.

¹⁰ Сэсэн мэргэн таанар, шагнагты! Бурхан буруу, Түгэс Хүсэтэ шударга бэшэ хэрэг үйлэдэхэ гэжэ байгаагүй.

¹¹ Хүн хэһэн бүхы хэрэгтээ тэнсүү харюу Тэрээнһээ абадаг.

¹² Бурхан муу үйлэ үнэхөөр хэдэггүй, үнэн шударгые хуурмагшалха шанар Түгэс Хүсэтэдэ байхагүй.

¹³ Хэн Тэрээндэ газар дэлхэйе захирха эрхэ үгөө юм? Хэн Тэрээндэ юртэмсэ бүгэдые дамжуулаа юм?

¹⁴ Дураа хүрөө һаа, Эзэн ами наһа үгэдэг, Өөрынгөө Һүлдэ, Өөрынгөө амисхал хүн бүхэнһөө һөөргэнь бусааха шадалтай.

¹⁵ Тиигээ һаань, амитай голтой хамаг юумэн хумхиин тооһон болохол.

¹⁶ Иоов, та өөрыгөө сэсэн мэргэн гэжэ тоолодог хадаа намайе шагнагты.

¹⁷ Үнэн шударга байдалые үзэн ядадаг Эзэн юртэмсые яажа зонхилхо болоноб? Түгэс Хүсэтэ Эзэниие буруу болгохомной зүб юм гү?

¹⁸ Хаанда «ши нүгэлтэйш», тайжа ноёдто «хуули эбдэнэш» гэжэ хэлэжэ болодог гү?

¹⁹ Эзэн тайжанарай нюур харадаггүй, баян хүниие ядууһаа үлүүгээр үзэхэгүй. Юундэб гэхэдэ, хүн бүхэниие Тэрэ Өөрөө бүтээгээ.

²⁰ Гэнтын үхэл һүниндөө ерэдэг. Хүлгөөн соо угсаатан арадууд талиидаг. Хүсэтэниие хүсэн унагаадаг бэшэ.

²¹ Эзэнэй мэлмы хүн бүхэнэй замые ажаглан байдаг.

²² Хэншье харааһаань зайлажа шадаагүй, гүн харанхыдашье нюугдаха газар байхагүй.

²³ Иимэһээ Бурханай үмэнэ шүүлгэдэ ошохо саг болзор хүндэ тогтоогдоогүй.

²⁴ Хүсэтэниие асуултагүйгөөр усадхан хаяжа, орондонь ондоо хүнүүдые табидаг, урда тээнь хинан шалгаха хэрэг Тэрээндэ гарахагүй.

²⁵ Хүн бүхэниие онсогой наряар мэдэхэ ушарһаа, муу этэгээдые һүни дунда усадхадаг.

²⁶ Олоной урда гэмтэниие усадхадаг.

²⁷ Тиимэ хүнүүд зааһан замһаань хадууржа, хэлэһэн үгыень тоонгүй,

²⁸ ядуу зондо дээрэлхүүгээр хандахадань, ядуушуулай орилоон Тэрээндэ дуулдадаг.

²⁹ Тэрэнэй харюу үгөөгүй байхада хэн буруушааха юм? Бидэнһээ нюураа нюун байхадань, хэн Тэрэниие хараха юм? Арад үндэһэтэндэшье, хүндэшье адли,

³⁰ замһаа хадуурһан нүгэлтэнэй зониие худхуулан хаан шэрээдэ һуухагүйнь түлөө энээниие үйлэдэнэ.

³¹ «Нээрээшье би гэмтэй гээшэ хаб. Гэм хэхэеэ болихом.

³² Ойлгоогүй юумыем ойлгуулжа, зүб зам заажа үгыт. Би хэһэн гэмээ дахин дабтахагүйб» гэжэ Бурханда та хэзээ нэгэтэ хэлээ һэн гүт?

³³ Хэрбээ та буруугаа мэдэрэн зүбшөөхэ дурагүй юм һаа, Эзэнһээ һайн харюу абаагүйдөө гайхаха хэрэггүй. Энэшни намда хамаагүй, танайл шиидхэхэ хэрэг. Энэ үгыем та буруушаахагүй ёһотойт.

^34-35 Минии үгэ шагнаһан ухаатай зон «Иоов гээшэ юумэ мэдэхэгүй хүн байна» гэжэ хэлэхэдээ болохо байна.

³⁶ Бурханиие тоодоггүй зондол адли харюусадаг ушарһаа Иоовой Тэрээнһээ хатуу сээрлэл абаха зүб.

³⁷ Иоов өөрөө нүгэл шэбэл үйлэдэжэ тогтоогүй, бидэнэй урда Бурханиие наадалжа, зүрилдэжэ байна.