Иоов 33 - Библи

Элиһүүгэй хоёрдохи үгэ

^1-2 Иоов! Үгыемни анхаран шагныш. Би хэлэхэ юумэеэ хэлэхэм.

³ Үнэн шударга сэдьхэлэй оёорһоо мэдэхэ юумэеэ хэлэхэб.

⁴ Түгэс Хүсэтэ Бурханай Һүлдэ намайе бүтээн, ами наһа үгэһэн бэлэй.

⁵ Та үгэдэм харюу үгэхэ хүсэлтэй һаа, үгэ бүхэнөө һайнаар бодожо үзөөд, үнэхөөр зоригтой яряагаа эхилэгты!

⁶ Бурханай урда та бидэ хоёрой эрхэ тэгшэ. Танииешье, намайешье тэрэ шоройһоо бүтээһэн бэшэ гү?

⁷ Намһаа айн ербэхэ хэрэггүй. Би танда шанга эрилтэ табижа, хоолойдотнай хутага тулгана бэшэб.

^8-10 «Би ямаршье гэм хээгүйлби. Буруу юумэ үйлэдөөгүйб. Гэбэшье Тэрэ намайе буруудхан дайсан гэжэ тоолохо шалтаг бэдэрнэ.

¹¹ Хүлыем тушаагаар тушажа, алхам бүхэниием шалгана» гэжэ хэлэхыеш дуулааб.

¹² Үнэниие би хэлэһүү. Тиигэжэ хэлэхэшни үндэһөөрөө буруу. Бурханиие хүнтэй жэшэжэ болохогүйл.

¹³ Гомдоходош харюу үгөөгүй хадань Тэрэниие буруудхажа болохогүй.

¹⁴ Эзэнэй олон аргаар үгэеэ хэлээшье һаань, хүн өөрөө анхардаггүй.

^15-16 Харанхы һүни хүнүүдэй унтаандань, зүүдэ үзэгдэл үзүүлэн, шэхэндэнь шэбэнэн, Тэрэ аюулһаа болгоомжолдог.

¹⁷ Иигэжэ хүниие муу үйлэһөө зайлуулжа, бардамыень заһажа,

¹⁸ үхэлэй нүхэнһөө зайлуулан, ами наһыень эритэ илдэһээ хамгаалхань олон.

¹⁹ Зарим ушарта хүнэй зан заһахын тулада үбшэн хүргэнэ. Хүнэй бүхы бэе үбдэжэ, яһа уһаниинь шархиржа,

²⁰ эдеэн тээшэ харахашье дурагүй болодог.

²¹ Тарган сула байһан тэрэ хүн арһа яһан болотороо туража,

²² үхэлэй эрмэгтэ тулгана.

²³ Харин мянган Эльгээмэлнүүдэй дундаһаа үмэглэгшэ нэгэниинь тэрэ хүниие хайрлажа,

²⁴ зүб замыень заажа үгэхөөр шиидэжэ, «Нүхэндэ унахаһаань тэрэниие абарыт. Би тэрэниие шиидхэлһээ сүлөөлхэ арга олохоб» гэжэ Бурханай урда зууршалаа һаань,

²⁵ тэрэ хүн үхэлһөө сүлөөржэ, бэень тэнхэржэ, залуугайхидал адли хүсэ тамиртай болоно.

²⁶ Удаань тэрэ хүн Бурханда зальбаржа, Тэрэнэй талархал хүлеэн абаад, жаргалтай болоно. Бурхан тэрэниие гэм зэмэгүй болгоно.

²⁷ «Би нүгэл хээб, үнэн зүбые хадууруулааб, теэд Бурхан намайе хэһээгээгүй,

²⁸ үхэлһөө сүлөөлһэн ушарһаань би амиды ябанаб» гэжэ зондо бахархан яридаг.

²⁹ Бурхан иимэрхүү маягаар хүниие хэдэн удаа үхэлһөө абаржа,

³⁰ нарата дэлхэйдэ амиды ябуулха хүсэлтэйгөө харуулдаг.

³¹ Иоов! Ойро зуура амаа хабшаад, минии хэлэхые шагныш.

³² Хэрбээ үгыемни шүүмжэлхэ гээ һаа, ярихыеш хэн хорихоб даа.

³³ Би танда али болохоор үнэн шударга ханданаб. Хэлэхэ үгэгүй һаа, амаа хаа. Би ухаатай сэсэн үгэ хэлэжэ үгэхэб.