Иоов 32 - Библи

Элиһүүгэй Иоовто болон тэрэнэй гурбан нүхэдтэ хандаһан үгэ

¹ Иоовой өөрыгөө гэмгүйдэ тоолоһоор байхадань гурбан нүхэдынь арсалдахаяа болибо.

² Тиихэдэнь арсалдааень шагнажа байһан Раам обогой Бүүзэй удам Барахээлэй хүбүүн Элиһүү гэжэ хүн оролсобо. Бурханиие бэшэ, өөрыгөө зүбтэн болгоходонь, Иоовто сухалдаа.

³ Гурбан нүхэдэйнь Иоовые буруу болгожо шадаагүй дээрэһээнь тэдээндэ бүришье уурлаба.

⁴ Тэрэ гурбаниинь өөрһөөнь аха байһан хадань Элиһүү Иоовые дуугайхан шагнажа, ээлжээгээ хүлеэгөөд байгаа.

^5-6 Ахамад гурбанай Иоовто зохистой харюу үгэжэ шадахагүйдэнь, Элиһүү уурлаад, дуугаржа эхилбэ. Бүүзэй удам, Барахээлэй хүбүүн Элиһүү иигэжэ хэлээ: – Ахамад таанарай урда би амаа нээхээ аягүйрхэжэ байгааб.

⁷ «Эдэ үбгэд сэсэн һургаал хэлэхэ ёһотой» гэжэ хүлеэһэмни буруу гээшэ ха.

⁸ Һүлдэ һүнэһэн гэжэ хүндэ байха, Түгэс Хүсэтын амисхал тэрээндэ ухаа оруулдаг.

⁹ Гансал үндэр наһан хүндэ мэргэн сэсэниие үгэдэг бэшэ.

¹⁰ Тиимэ хадань таанар миниишье хэлэхые шагнагты.

¹¹ Үгыетнай хүсэн хүлеэжэ, Иоовто харюу үгэхыетнай тэсэбэритэй шагнааб.

¹² Үгэ бүриие соносоходом, Иоовой гэмтэйе хэншье баталжа шадаагүй, үгэһэн харюудатнай зүб юумэн үгы.

¹³ Өөһэдыгөө сэсэн гээд, «Хүн боложо түрэһэн бидэ Иоовой буруу зүбые баталжа шадахагүйбди, Бурхан лэ шадана» гэжэ болохо юм гү? Энээниие баталхань танайл хэрэг бэшэ юм гү?

¹⁴ Иоов намда юушье хэлээгүй ушарһаа намда хамаагүй. Харин тэрэнэй намда хандаа һаань, би таанартай адли харюу үгэхэгүй һэм.

^15-16 Иоов! Эдэ гурбан хэлэхэ үгэгүй болоһон ушарһаань минии ээлжээн ерээ.

¹⁷ Бишье өөрын хуби харюулжа,

¹⁸ һанал бодолоо хэлээгүйдэм, сэдьхэлни амар бэшэ.

¹⁹ Үзэмэй дараһан архинай һабыень онгойлгоогүй сагта дэлбэ һүрэгшэтэй адли,

²⁰ һанамжаяа хэлэжэл һанаам амарха. Хэлэхэ юумэн олон.

²¹ Намайе шагнагты, хэнэйшье тала би барихагүйб.

²² Хүн болоһоор би нюур сахижа һураагүйб. Намайе бүтээгшын шиидхэхэ ушарһаа би энээниие тойрожо ябагшаб.