Иоов 31 - Библи

¹ Өөрын эхэнэрһээ бэшые һайшааһан нюдөөр харахагүй гэжэ үнэн сэдьхэлһээ тангариглаа һэм.

^2-3 Түгэс Хүсэтын хүн бүхэнтэй тоосоо хэхэдэ, гэмтэй этэгээд гэмээ амасаха гэжэ мэдэнэб.

⁴ Тэрэ ябаһан харгыем хёрхоор адаглан, алхам бүхэниием алданагүй бэшэ аал?

⁵ Хуурмаг ябадалаар бусадые хохидооһон гэжэ намайе буруутан болгобол Эзэн минии амидаралые эхинһээнь шүүхэ ёһотой.

⁶ Үнэн шударгыгаар шүүжэ үзөөд гэмгүйемни тогтооно.

⁷ Хэрбээ замһаа хадууржа, хориглоһон хорилтодо эсэргүүсэжэ, өөрын хүсэлдэ абтан гэм хэһэн байбал,

⁸ минии тариһан ургасые ондоо хүн хуряан эдиг, минии бүхы таримал үндэһөөрөө үхэг. Би тиимэ гэм хээгүйб гэжэ мэдэхэ болоноб.

⁹ Хэрбээ би танилайнгаа эхэнэртэй һамуурха гэжэ үүдэнэйнь хажууда отон хүлеэдэг байһан һаамни,

¹⁰ – харюудань минии һамган айлай ажалда зарагдажа, ондоо хүн тэрэнэй үбэртэ хэбтэхэ болтогой.

¹¹ Иимэ һалихай ябадалай түлөө намайе хатуу шиидхэл хүлеэхэ байгаа.

¹² Намайе хэтын зоболоной галда хаяхань зүб. Тиигээд минии гэһэн юумэн һэегүй усадхагдаг.

¹³ Хэрбээ ажалшадтаа үнэн шударга буса байгаа һаам, зарасын гомдолоо мэдүүлхэдэнь, хэрэглэнгүй байгаа һаам,

¹⁴ хожомынь Тэрэнэй хэрэг шүүлгэдэ ошохо нюургүй болоноб.

¹⁵ Эзэн тэрэниие намдал адли эхын хэбэл соо бүтээжэ, хүн бэеынь адли үгэһэн бэшэ юм гү?

¹⁶ Үгытэй ядуу хүндэ туһалхаяа татагалзаагүйб. Бэлбэһэн эхэнэрнүүдые би дэмжэн тэдхэжэ, урма зоригыень һэргээдэг байгааб.

¹⁷ Өөрөө садаһан аад, үншэн ядууһаа хоол харамнажа байгаагүйб.

¹⁸ Би тэдэниие түрэһэн эсэгэһээнь өөрэгүй адли энхэрээб, бэлбэһэн эхэнэртэ түшэг тулга болооб.

^19-20 Үмдэхэ хубсаһагүй ядуушуулда хониной нооһоор хубсаһа оён үгэжэ дулаасуулхадань, тэдэ үнэн сэдьхэлһээ баяр хүргэдэг бэлэй.

²¹ Хэрбээ би танил шүүгшээр тала татан үншэн хүүгэдтэй заргалдан хохирооболни,

²² мүрни нюрганһаа һалуужаг, гарни тохоногһоо таһаруужаг.

²³ Би Бурханай шиидхэлһээ айжа, дошхон хүсэтэ шанарһаань һүрдэжэ, тиимэ гэмые тойрожо ябадаг байгааб.

^24-25 Мүнгэ зөөридэ би найдажа ябаагүйб. Баян шадалтайгаараа бардамлажа үзөөгүйб. Алта мүнгые амидаралай үндэһэн болгоогүйб.

^26-27 Гэгээн нарые, гэрэлтэ һарые хараад, бурхан болгон һүгэдөөгүйб, гараа таалан һунгаагүйб.

²⁸ Тиигэбэл гэмтэ ябадал хэһэн, Дээдэ Бурханиие доромжолһон болохо удхатай һэн хойнонь, хүн сээрлэхэ ёһотой.

²⁹ Дайсанай хосорхые хараад, би баярлажа байгаагүйб.

³⁰ Хараал табижа, тэдэнэй үхэл үзэхые хүсөөгүйб.

³¹ «Мяхыень эдижэ садабагүйлди» гэжэ ажалшадни нэгэтэшье хэлээгүй.

³² Замда ябаһан орохо газаргүй хүниие би газаа хонуулжа байгаагүйб.

³³ Ондоо хүнүүд шэнги гэмээ нюуха гэжэ оролдоогүйб.

³⁴ Зоной муу хэлэ аманһаа зайлажа, угсаатанайнгаа зоной зэбүүрхэлһээ айжа гэртээ хороогүйб.

³⁵ Хэн нэгэн намайе шагнахаяа яана гээшэб? Түгэс Хүсэтэ анхаран намда хандаг лэ гэжэ хүсэнэм. Минии гэмтэй гэмгүйе саарһан дээрэ бэшэг лэ.

³⁶ Тэрэ тэмдэгыень би энгэр дээрээ хадан, толгойдоо титим болгон үмдөөд ябаха һэм.

³⁷ Тайжа мэтэ Бурханда бараалхажа, наһан соогоо гэм нүгэлгүй ябаһанаа яриха һэм.

³⁸ Минии гэм зэмэ тухай газар орилхоор, бураздаагайнь гомдохоор

³⁹ ургасыень түлбэригүй эдижэ, таряашадые зобоогоогүйб.

⁴⁰ Тиигэһэн байбални, шэниисын орондо адаалхай үүргэнэ, ешмээнэй орондо хог үбһэн ургуужаг. Иигэжэ Иоов үгэеэ дүүргэбэ.