Иоов 29 - Библи

Иоовой түгэсхэлэй үгэ

¹ Иоов дахин үгэ хэлэбэ:

² – Ай даа, Бурханай хамгаалалтада байһан сагаа тэхэрюулдэгһайб.

³ Урдань Тэрэ минии хажууда байжа, харанхы дэлхэйдэ ябаха гэрэлтэ зам заажа байгша һэн.

⁴ Шадал дундаа өөдэргэ ябаха үедэм Бурхан намһаа һалангүй орон гэрыем хамгаалдаг бэлэй.

⁵ Тэрэ саг дахин ерэбэл һайн һэн. Түгэс Хүсэтын хамгаалалта доро үри хүүгэдни хажуудам байгаа.

⁶ Мал адууһамни сагаан эдеэ элбэгээр хайрлажа, жэмэстэ модо хада хабсагайдашье тарихада, тоһоор билтаржа байгаа юм.

⁷ Минии хотын хэрэмэй хаалгын зэргэдэ ерэжэ һуудалаа эзэлхэдэм,

⁸ залуушуул замһаа зайлажа, үбгэд һууриһаа бододог һэн.

⁹ Удамаршад намайе хараад, үгэ хэлэхэеэ түбэгшөөдэг, амаа альгаараа бүтүүлдэг,

¹⁰ хэргэм зэргэтэн минии урда дуугаа хуряадаг һэн.

¹¹ Намтай бэеэрээ уулзажа, хэлэхыемни шагнаһан хүн талархан магтадаг бэлэй.

¹² Ушарынь гэхэдэ, би ядуушуулые зоболонһоо гэтэлгэжэ, үншэдтэ туһалдаг байгааб.

¹³ Бэлбэһэн абгайнар баярлажа, наһа дүүрэжэ байһан зон үршөөлтэ үгөөр дурдадаг байгаа.

¹⁴ Гэм нүгэлгүй амидарха гээшэ минии хубида хубсаһа үмдэхэтэй адли юрын нэгэ хэрэг бэлэй.

¹⁵ Би һохор хүнүүдтэ нюдэн, дохолон хүнүүдтэ хүл боложо,

¹⁶ ядуу хүниие эсэгэ мэтэ энхэржэ, зарга шүүхэдээ, танихагүй хүндэ адляар хандаха гэжэ оролдодог бэлэйб.

¹⁷ Хорото этэгээдэй шүдыень хуха сохижо, олзыень аман сооһоонь ходо татажа абаһан байнаб.

¹⁸ Гэр нютагтаа амгалан амидаржа, ута наһа наһалжа, амидаралаймни үдэрнүүд далайн элһэн мэтэ олон болохо гэжэ би найдажа байгааб.

^19-20 Һүни бүри үндэһэ мүшэрөө шүүдэрээр ундалуулха модон мэтэ алдар нэрэмни намтай хамта, хүсэ шадални буурадаггүй гэжэ би бододог һэм.

²¹ Хүнүүд намһаа зүбшэл заабари хүлеэн, шэхээ табин шагнагша бэлэй.

²² Хэлэһэн үгэш дутуу гэжэ хэншье нэмэжэ байгаагүй.

²³ Ангаһан газарай хура бороогой уһа хүлеэһэн мэтэ зон амаа нээхыем хүсэн һуудаг байгаа. Үгыем соносоһон хүн бүхэн үгэ дуугүй зүбшөөдэг һэн.

²⁴ Энеэбхилхэдэм, этигэжэ ядан урдаһаам хаража, өөг шэнги харасыем бэдэрдэг бэлэй.

²⁵ Би хаан хүнэй түмэн сэрэгээ захирһан мэтэ түрүү зэргэдэ һуужа, ядуушуулай һанааень тэгшэлдэг бэлэйб.