Иоов 28 - Библи

Сэсэн мэргэндэ магтаал

^1-2 Уурхайн гүн сооһоо хүн алта мүнгэ олзолдог, газарһаа түмэр абадаг, шулуунһаа зэд хайлуулдаг.

³ Тиихын тулада агы нүхэн соо гэрэлтүүлэн,

⁴ нюдэ балай харанхы соогуур газарай гүн руу доошоо дүүлижэ, улһа дамжан дүүжэндэдэг.

⁵ Газарай хүрьһэндэ хүн таряа таридаг, гэбэшье гүн соонь һэндэжэ, урбуулан уурхай малтадаг.

⁶ Газар дорохи хадын хара шулуун соо үнэтэ миндарга шулуун, алтан нюугданхай.

⁷ Жэгүүртэнэй хаан бүргэд тиимэ гүнзэгые үзөөгүй, харсагын нюдэндэ тэрэ харагдаагүй.

⁸ Араатанай хаан арсаланшье тиимэ харанхыда ороогүй.

⁹ Хүн ган булад мэтэ хада шулууе хахалжа, уула хабсагайе урбуулжа хаяна.

¹⁰ Хабсагай соо харгы гаргажа, оёорынь нюдөөрөө харана.

¹¹ Уһанай эхиие газар дороһоо оложо, уурхайда оруулхагүйн тулада таглажа, нюугдаһан юумые гэрэлтэй газарта гаргадаг.

¹² Сэсэн ухаае хүн хаанаһаа оложо шадахаб? Олохын тулада хаана ошохо ёһотойб?

¹³ Сэсэн ухаанай хэр зэргэ үнэтэ зүйл болодогые хүнүүд ойлгодог юм гү? Хүн түрэлтэнэй нютагта тэрэ олдохогүй.

¹⁴ Далайн гүнзэгыдэ тэрэ байхагүй, далай дээрэшье үгы.

¹⁵ Тэрэниие алта мүнгөөр худалдан абажа болохогүй.

¹⁶ Опиир нютагай шэжэр алтаар, үнэтэ мана, эрдэни шулуугаар тэрэ үнэлэгдэхэгүй.

¹⁷ Үнэтэ алтан болон тунгалаг уһан шэнги шэл тэрээндэ хүрэхэгүй, шэжэр алтаар бүтээһэн шэлдэг һайхан эдлэлшье тэрээнтэй зэргэсэхэгүй.

¹⁸ Хоморой оюун шүрэ, болор шулууе дурдалтагүй. Сэсэн ухаан бадмараагаһаа үлүү.

¹⁹ Эфиопиин молор эрдэни, шэжэр алтаар тэрэниие сэгнэхэ аргагүй.

²⁰ Тиигэбэл мэргэн ухаан хаанаһаа ерэдэг юм бэ? Амидаралай удха ойлгохын тулада хайшаа ошобол зохид гээшэб?

²¹ Хүхэ тэнгэри дорохи хамаг амитанай, жэгүүртэ шубуунай нюдэнһөө тэрэ нюугдаатай.

²² Һүйдхэл ба үхэл хоёр тэрээн тухай хэлэхэ: «Бага зэргэ дуулаа һэмди».

²³ Гансахан лэ Бурхан тэрээниие хаанаһаа олохые мэдэхэ.

²⁴ Гансахан лэ Тэрэ оршолон дэлхэйе нэгэ амяар хаража, тэнгэри дорохи бүхы хэрэгые үзэдэг.

^25-27 Тэрэ һалхинай хүсэ, уһанай хэмжээ, аадар бороогой орохые, сахилгаанай замые шиидхээд, оршолонгые бүтээһэн тэрэ ухаае ондоо юунтэйшье жэшэшэгүй гэжэ үнэлөө һэн.

²⁸ Тиигээд өөрынгөө бүтээл болохо хүндэ хандажа, «Ехэ Эзэн намайе хүндэлхэ гээшэ таанарай хубида эгээл сэсэн зүйл болохо. Тиин гэмтэ байдалһаа зайлажа ябахань хүнэй амидаралда хамагһаа ухаатай шухала» гэбэ.