Иоов 27 - Библи

¹ Иоов дахин хэлэбэ:

² – Эрхыемни хаһаһан Түгэс Хүсэтэ Эзэнэй, сэдьхэлэй голхорол намда асарһан Хамагые баригшын байгаа сагта,

^3-4 амияа табяагүй, һүнэһэ һүлдөө алдаагүйдэмни минии аманһаа хуурмаг үгэ дуулдахагүй, минии хэлэн худалаар хэлэхэгүй.

⁵ Таанарай үгэ зүб гэжэ хэлэхэгүйб. Үхэн үхэтэрөө өөрыгөө гэмгүйдэ тоолохоб.

⁶ Би өөрын үнэн зүбые баримталхадаа, һөөргэ сухарихагүйб. Сэдьхэлни амидаралай нэгэшье үдэрһөө халаглахагүй.

⁷ Намда эсэргүү хүн бүхэндэ гэмтэн мэтэ хандахые би Эзэнһээ хүсэжэ байнаб.

⁸ Тэрэнэй харгые дахаагүй хүнүүд наһа бараха туйлдаа хүрэхэдөө, юундэ найдаха гээшэб?

⁹ Тэрээндэ зоболоной тохёолдоходо, Бурхан хашхархыень дуулаха гү?

¹⁰ Түгэс Хүсэтын ойро байхадаа ярихые түбэгшөөһэн аад, үхэхынгөө урда гуйхадаа өөдэтэй харюу абаха гү?

¹¹ Би Түгэс Хүсэтын хүсэтэ гар, зан шанар тухай нюултагүй хэлэхэб.

¹² Таанад өөһэдөө Тэрэнэй хүсые мэдэхэ байгаад, юундэ намайе буруутан болгоно гээшэбта?

Гэмтэдэй ба дарлагшадай хойшолон

¹³ Түгэс Хүсэтэ бусадые дарладаг гэмтэй хүнүүдые хэр шиидхэдэгынь хэлэхэ хэрэгтэй болоно.

¹⁴ Тиимэ хүндэ үри хүүгэд олоншье һаа, үлэн хооһон ябажа, дай дажарта хосорно.

¹⁵ Үлэһэн нэгэниинь үбшэндэ нэрбэгдэнэ. Бэлбэһэн эхэнэрынь уйлахашье шадалгүй болохо, ээлжээгээр хүүгэдынь үхэжэ эхилхэ.

^16-17 Шорой мэтэ ехэ мүнгэтэй, шабар мэтэ олон хубсаһа дараһан гэмтэ хүнүүдэй наһа барахада, үнэтэ хубсаһыень ондоо шударга хүнүүд үмдэжэ, гэмгүй зон мүнгыень хубаажа абана.

¹⁸ Өөрынь гал гуламта илааһанай шүлһэн тор мэтэ тогтоогдодог, харуулшанай обоохой шэнги түр зуура бодхоогдодог.

¹⁹ Тиимэ хүн орон дээрээ баян унтабашье, нюдөө нээхэдэнь, зөөри гэжэ үгы.

²⁰ Тэрэ үедэ үерэй уһан мэтэ айдаһаниинь нэмэрин ерэжэ, хүсэтэ шуурганда харанхыгаар туугдаһан мэтэ болохо.

²¹ Дурна зүгэй хара һалхин тэдэниие байраһаань хобхо татаһан мэтэ.

²² Тэрэ шуурган хүниие хайрлахагүй, зугадан зайлаха ямаршье аргагүй.

²³ Хара һалхин тэрэниие наада барин, альга ташаһан мэтэ эшхэрэн, байраһаань хобхо татан үлдэнэ.