Иоов 24 - Библи

¹ Түгэс Хүсэтэ яагаад саг хугасаае тогтоогоогүй гээшэб? Бурханиие мэдэхэшье хүнүүд Тэрэнэй үдэрнүүдые юундэ мэдэнэгүй гээшэб?

² Хүршэ айлайнгаа үмсын газарые эзэлхын тула табигдаһан мужаа абаад хаяха юм. Хүнэй хони туугаад, өөрынгөө һүрэг соо нюуха юм.

³ Үншэн хүүгэдэй ганса элжэгые хайрлаха сэдьхэлгүй буляан абаашана. Бэлбэһэн эхэнэрэй зээли гуйхада, ганса үнеэень барисаанда абана.

⁴ Муу хүнүүдэй хашалтаһаа боложо, үгытэй ядуушуул бэеэ нюухаһаа ондоо аргагүй болодог.

⁵ Иигэжэ эзэгүй талада хоол бэдэрһэн зэрлиг элжэгэн шэнги үгытэй ядуушуул тэнэжэ үл залгадаг. Хээрын үбһэнһөө бэшэ ондоо эдихэ юумэн тэдээндэ олдохо бэшэ.

⁶ Хээрэ талаһаа зэрлиг ногоо, гэмтэ муу баяшуулай уһан үзэмэй сэсэрлигһээ хаягдаһан үжэһэн жэмэс суглуулна.

⁷ Һүниин хүйтэндэ үмдэхэ хубсаһагүй дагжа һүрэн,

⁸ уулын бороодо нороод, хабсагайн үбэртэ шэшэрэн зогсоно. Ондоо хоргодохо газар тэдээндэ байхагүй.

⁹ Бэлбэһэн эхэнэрэй үритэй болоходонь, хүхөөр хүүгэдыень һалган абажа, богоол болгодог гэмтэн байдаг. Зээлеэр гуйһан ядуу хүнһөө хэтэрмэ ехэ барисаа эридэг.

¹⁰ Энээнһээ боложо ядуушуул үмдэхэ хубсаһагүй нюсэгэ шабган ябана, эдеэн болохо таряа зөөгөөшье һаа, эдихэ хоолгүй хүдэлнэ.

¹¹ Баяшуулда жэмэсэй тоһо, үзэмэй дараһан архи шахан үгэбэшье, үлэн хооһон, аманайнгаа сангаа гаргаха аргагүй байдаг.

¹² Хотодо усалда ороһон, үхэхэ туйлдаа хүрэгшэдэй ёолоон, туһа эриһэн мүргэл Эзэнэй анхаралда абтанашьегүй.

Гэрэл туяагай дайсад

¹³ Гэмтэй хүнүүдтэ гэрэлтэ амидарал таарахагүй. Тэрэнэй замаар тэдэ ябажа шадахагүй.

¹⁴ Алууршан хүн үүрээр бодожо гараад, ядуу дорой хүнэй ами хороон дээрмэдэнэ, харин һүнинь хулгай хэнэ.

¹⁵ Забхай хүн үдэшын боро харааниие хүлеэжэ, «Намайе хүн танихагүй» гэжэ нюураа далдалан гаража ошодог.

¹⁶ Хулгайша хүн харанхы болохые хүлеэгөөд, үдэр хаража абаһан бусадай гэртэ нүхэ малтадаг. Тэдээндэ гэрэл хэрэггүй.

¹⁷ Бусад зондо сэл харанхы һүни аймшагтай, харин хуурмаг хүнүүдтэ гэгээн үдэр мэтэ һайхан.

¹⁸ Тиимэ хүнүүд уһан дээрэ хөөрэһэн хөөһэн мэтэ түргэн арилха болтогой. Тэдэнэй эзэлдэг газар хараалда хүртэг. Тэдэ түргэн үхэжэ, уһан үзэмэй сэсэрлигтээ ажаллажа шадахагүй болог.

¹⁹ Ган болон халуунай уһа саһа хайлуулан шэргээһэндэл адли нүгэл үйлэдэгшэд һүнэжэ, Үхэлэй орон тэдэниие залгиг.

²⁰ Түрэһэн эхэнь тэдэниие мартаг. Үтэ хорхой үхэһэн бэедэнь найрлан сэнгэг. Тиин хамаг муу муухай хатан үмхирһэн модон шэнги унаг.

²¹ Үри хүүгэдгүй эхэнэрые доромжолон гутаажа, бэлбэһэн абгайн зоболон хараагүй хэбэртэй үнгэрһэнэй түлөө хүн иимэл шиидхэл абаха ёһотой.

²² Юртэмсын Эзэн тиимэрхүү бардам этэгээдүүдые хуха нуга дарадаг. Тэрэнэй бодоходо ямаршье хүсэтэй хүн ута наһа наһалха найдабаригүй болодог.

²³ Тэрэнэй хүсэтэ гарай хүндөөгүй сагтал хүн тайбан байдаг, Тэрэ харасаяа тэдэнэй харгыһаа холодуулдаггүй.

²⁴ Түр зуура дээшээ гараад, бусадтал адли үгы болодог. Хиргуулһан хоолос мэтэ унаад бусадта адли обоологдохо. Үхэхэдөө, тэдэ бусадһаа ямаршье илгаагүй байдаг.

²⁵ Минии энэ үгые хэн буруушаажа, намайе худалша гэхэ байнаб?