Иоов 23 - Библи

Иоовой харюу

¹ Иоов харюу үгэбэ:

² – Би Бурханда гашуун гомдолоо мэдүүлхэмни. Иимэ байдалые зүб гэхэгүй ушарһаа бэшээр аргагүй байна.

³ Тэрэниие хаанаһаа оложо болохые би мэдэдэгһэйб, байдаг газартань дүтэлбэл, ямар һайн гээшэ һэм.

⁴ Тэрэнэй үмэнэ хэрэгээ мэдүүлжэ, шүүн сэгнэхынь хүлеэбэл, бүришье һайн байгаа.

⁵ Би гомдолоо ойлгуулаад, өөрыгөө үмэглэхэ байгааб. Тэрэнэй харюу шагнажа, хэлэһэн бүхы үгыень ойлгохо һэмби.

⁶ Хизааргүй хүсөөрөө намтай заргалдаха юм гү? Үгы даа, Тэрэ намайе усадхахагүй, анхаран шагнаха ёһотой.

⁷ Хэншье шударга үнэн хэрэгэй түлөө Тэрээнтэй арсалдахадань яахаб. Тиин минии гэмгүй болохымни хүлеэн зүбшөөжэ, Өөрын шүүлгэһээ намайе сүлөөлэн табиха һэн.

⁸ Баруун, зүүн зүг тээшээ хайшаашье ябахадам, Тэрэ үзэгдэнэгүй.

⁹ Урда, хойто зүгтэ хүсэ шадалынь харагдабашье, намда Өөрөө үзэгдэхэ гэжэ алга.

¹⁰ Үзэгдэхэгүйнь шухала бэшэ юм бэзэ, гэшхэһэн бүхы мүрым Тэрэ һайн мэдэнэ. Намайе шалган туршаад, холисогүй шэжэр алта элирүүлһэндэл хэлэхэ.

¹¹ Би Тэрэнэй замһаа нэгэшье хадуураагүйб.

¹² Хэлэһэн үгэдэнь зааханшье зүреэгүйб, үгэһэн заабариһаань нэгэхэншье хадуураагүйб.

¹³ Оршолон юртэмсэдэ ганса Бурхан байдаг. Тэрэнэй шиидхэбэриие хэн өөршэлэн хубилгажа шадахаб, хүсэһэн бүхэнөө Тэрэ хэдэг. Намда дүүрэн зоболон амасуулха гээ һаань, хэн боли гэхэб,

¹⁴ Тэрэнэй нөөсэдэнь тиимэ юумэн ехэ.

¹⁵ Мүнөө би Тэрэнэй урда айн шэшэржэ байнаб.

¹⁶ Бурхан урма зоригымни мохообо, Түгэс Хүсэтэ намайе һүрдөөн айлгаба.

¹⁷ Харанхыда оруулжа хаяхын урда һүнөөхэеэ яагааб даа. Манан харанхы соо юушье харахаа, юушье ойлгохоо болёод байнаб.