Иоов 22 - Библи

Элипаазай гурбадахи үгэ

¹ Тэмаан хотын Элипааз Иоовто хандаба:

² – Хүнэй мэргэн ухаан өөртэнь лэ хэрэгтэй, Бурханда хүнһөө ямар ашаг байба гээшэб.

³ Шинии гэмгүй байдал Түгэс Хүсэтэдэ ямар хэрэгтэйб? Бэеэ сагаадхаха гэжэ оролдохошни Тэрээндэ ямар хэрэгтэй юм бэ?

⁴ Тэрэ шамһаа түбэгшөөжэ, шамтай адли болошоод, заргалдажа байха гэжэ бодоно гүш?

⁵ Үгы, шинии хэһэн муу хэрэгүүд олон, мянган гэмэйнгээ түлөө шиидхэлдэ орожо байнаш.

⁶ Зээли абаха гэһэн хүнһөө барисаагаар мүнгэ эдижэ, хүнүүдые нюсэгэлдэг бэлэйш.

⁷ Ядарһан хүндэ ши уһа һарбайгаагүйш, үлдэһэн хүнһөө талха харамнааш.

⁸ Тиихэ хирэдээ хүсэ шадалтай хүн газар эзэлдэг, нэрэтэй солотой зон тэндэ һуудаг гэжэ тоолодог байгааш.

⁹ Ядуу бэлбэһэн һамгадай гар сайлгангүй бусаажа, үншэн дорой хүүгэдэй эрхэ хаһажа байгааш.

¹⁰ Тэрэнэй түлөө ши урьхада орожо, элдэб аюул аймшагаар хүреэлүүлжэ, гэнэ зоболондо унааш.

¹¹ Гүн харанхыда ороод, үзэжэ хараха аргагүй боложо, зоболон дүүрэн амсажа, үерэй уһанда абтаһан мэтэ болоош.

¹² Бурханай оршодог газар холо байна. Аласай одод тээшэ хара, тэдэ ямар үндэр бэ?

¹³ Ши тэрэниие мэдээд, ман тухай Тэрэ юу мэдэхэб даа. Үзэгдэхэгүй ушарһаа харанхытай адли. Тэрэ гүн харанхые нэбтэлэн бидэниие хинажа шадаха гү? гэжэ хэлэхэш.

¹⁴ Шинии хэлэһээр, Бурхан оршолонто юртэмсын хизаарые хараха шадабаригүй.

¹⁵ Адагай муу хүнүүдэй гэмтэ замаар ябахада шамда ямар хамаатайб?

¹⁶ Тиимэ хүнүүд сагһаа урид үхэжэ, амидаралайнь үндэһэн үерэй уһанда ходор татуулһан мэтэ болодог.

¹⁷ «Түгэс Хүсэтэ Хамагые баригша бидэндэ хэрэгтэй бэшэ» гэжэ бодоод, холохон байхые Тэрээнһээ гуйдаг.

¹⁸ Үнэндөө Тэрэл үйлыень бүтэмжэтэй, гэрыень баялигаар дүүрэн болгоо юм. Муу хүнэй бодол би зүбшөөжэ шадахагүй байнаб.

^19-20 Гэмгүй хүн гэнтэ муу хүнэй һүйдхэл хараад, «Бидэнэй дайсад һүнэжэ, эд хүрэнгэнь шатаа» гэжэ баярладаг.

²¹ Түгэс Хүсэтэ Тэрээнтэй ойртон эблэрһэншни дээрэ. Тиигэбэл ши Тэрээнһээ һайн хандаса хүлеэхэ зэргэтэйш.

²² Тэрэнэй хэлэһэн үгэ заабари хүлеэн абажа, сэдьхэлдээ хадуун дэмжэ.

^23-24 Түгэс Хүсэтэдэ хандаба, ажал үйлэшни бүтэмжэтэй болохонь дамжаггүй. Гэм хэхээ болижо, үнэтэй гэжэ тоолодог эд баялигаа бог нобшо дээрэ хая. Опиир нютагай эрхим шанарай алтые голой элһэ шулуунтай худхажа орхи.

²⁵ Газар дэлхэйн Түгэс Хүсэтэ Эзэн лэ шинии найдабари болоһон үнэтэ баялиг байха ёһотой.

²⁶ Тиигэбэл ши Түгэс Хүсэтэдэ түшэг тулга оложо, сэдьхэлшни тэнигэр болохо, Бурхан тээшэ харахаш.

²⁷ Тиигээд зальбарһан бүхэнэйнгөө харюу Тэрээнһээ абахаш. Харин ши талархалаа элирхэйлхын тулада хэлэһэн үгэ тангаригаа һүүлээрнь бэелүүлжэ бай.

²⁸ Тиигэбэл һанаһан бүхы һанааншни бүтэжэ, амидаралайш зам гэрэлтэй болохо.

²⁹ Хэсүү үедэ Тэрээнһээ туһаламжа эрибэлшни, даруу зантай шамда Тэрэ туһалхал ёһотой.

³⁰ Тэрээнһээ байтагай гэмтэй хүнэй зүгһөө шинии зууршалбал, Тэрэ шамайе һанан шиидхэлһээ тэрэниие сүлөөлхэ.