Иоов 21 - Библи

Иоовой Цопаарта үгэһэн хоёрдохи харюу

¹ Тиихэдэнь Иоов харюу үгэбэ:

² – Минии хэлэхые анхаралтай шагнахадаа, һанааем тэгшэлнэ гээшэт.

³ Намайе тэбшэжэ хэлүүлэгты. Һүүлээрнь наадалжа байхадатнай болоно.

⁴ Би хүндэ гомдоно бэшэб. Удаан тэбшэжэ шадахагүймни минии буруу бэшэ.

⁵ Үбшэн бэеым хараад, алмайран гайхахадаа, амаа таглаха бэзэт.

⁶ Үнэн байдалаа би бодоходоо, эрхэгүй айн шэшэрнэм.

⁷ Хэрбээ таанарай яряанай үнэн болбол, Бурхан яагаад муу хүнүүдые үтэр үхүүлдэггүй юм бэ? Тэдэ ута наһа наһалжа, улам хүсэрхэг боложол байдаг.

⁸ Үри хүүгэдэйнгээ, аша гушанарайнгаа наһа хүсэхые үзэжэ,

⁹ Бурханһаа ямаршье шиидхэл абаагүй, һанаа амар һууна.

¹⁰ Үхэр малынь үбшэндэ нэрбэгдэнэгүй, үнеэ гунжадынь дутуу түрэнэгүй, түлынь бүтэн.

¹¹ Үнэр олон үри хүүгэдынь хонин һүрэг мэтэ хушууран,

¹² хуур лимбын хүгжэмэй аялга соо сэнгэн баясана.

¹³ Тиимэ зон наһан соогоо өөдэргэ амидараад, һанаан тэгшэ үхэлэй газарта ошодог.

^14-15 «Түгэс Хүсэтэ Эзэн хэн хадаа маниие зонхилхо болооб? Тэрэниие хүндэлхэнь ямар ашагтай юм бэ? Тэрээнтэй ярилдаха ямар хэрэгтэй юм бэ?» гэжэ тэдэнэр хоорондоо хэлсэдэг, «Бидэ танай замаар ябахагүйбди, харин бидэниие бү дайра» гэжэ Бурханда хэлэхэдээ һаатахагүй.

¹⁶ Харагтыл даа, муу зоной һайн амидархань зан шанарһаань шалтагаалдаггүй байна. Гэбэшье тэдэнэй үзэл бодолые би хэзээшье зүбшөөн дэмжэхэгүй байнаб.

¹⁷ Бурхан үнэхөөр гэмтэй хүнүүдэй гал гуламта усадхадаг гэжэ гү? Тэдэ үнэхөөр хохидол үзэдэг гэжэ байха гү? Бурхан тэдээндэ хилэгнэн зоболондо оруулдаг гэжэ гү?

¹⁸ Тэдэ һалхинда хиидэхэ хатаһан һолоомо, хамагдаһан мэхиинэ мэтэ үгы болодог гэжэ үнэн гү?

¹⁹ Бурхан хүнэй гэм нүгэлые үри хүүгэдтэнь хабаадуулжа шиидхэдэг гэжэ таанар бодоно гүт? Энэ буруу. Бурхан гэмтэйл хүниие шиидхэн хохироохо ёһотой.

²⁰ Тэрэ хүн өөрын лэ бэеэр Түгэс Хүсэтэ Бурханай уур хилэнсэг амсаха зэргэтэй.

²¹ Тиин эртэ наһа барахадань, гэр бүлэнь тэрээндэ ямар хабаатай юм бэ?

²² Бурхан хамагай дээрэ байжа, тэнгэридэш байгшадые шүүн шиидхэдэг, хэн нэгэн Тэрээндэ ухаа заахам гэжэ оролдодог гү?

^23-24 Зарим хүн элүүр шамбай, тарган садхалан, һанаан тэнигэр ябаһаар үхэдэг.

²⁵ Тиихэ зуура ондоо нэгэн жаргал нэгэтэшье үзэнгүй, халагла халаглаһаар үхэдэг.

²⁶ Гэбэшье хэнииньшье үхэжэ булагдаад, үтэ хорхойдо эдюулээд үнгэрдэг.

²⁷ Таанарай намайе яажа буруудхаха, ямар харюу үгэхэ байһые би мэдэнэб.

²⁸ «Тэрэ алдар нэрэ ехэтэйшүүлэй гэрынь хаанаб, нүгэлтэнэй майхан алин бэ?» гэхэ һанаатайт.

²⁹ Газар үзэжэ, нюдөө тайлаһан хүнүүдһээ асуугаарайт.

³⁰ Гэмтэй муу хүн һүйдхэлэй үдэртэ бүтэн үлэдэг, Бурханай ууртай шиидхэлдэ тэрэ ородоггүй.

³¹ Үнэхөөр гэмтэй хүнэй хэһээлтэдэ оронгүй байха ушар олон.

³² Үхэхэдэнь, үргэн абаашаад, хүүр бунханайнь дээрэ харуул табидаг.

³³ Олон хүн ойронь ошожо хүндэлһэнөө мэдүүлдэг. Газарай зөөлэн нэмэргэдэ хушагдан, тэрэ амардаг.

³⁴ Худал үгэ ярижа, хайшан гээд һанааем тэгшэлхэ гэбэт.