Иоов 20 - Библи

Цопаарай хоёрдохи үгэ

¹ Удаань Наамаа хотын Цопаар Иоовто хандаба:

² – Сэдьхэлэйм зоболон харюу хэлэхыем эрилтэ табижа байна.

³ Намайе доромжолһон зэмэлэл дуулаад, уурлахаһаа ондоо аргагүй.

^4-5 Оршолондо хүниие бүтээжэ үгэһэн сагһаа хойшо Эзэндэ һүзэглөөгүй этэгээдүүд ойро зуурын жаргал эдлэнэ гэжэ мэдэхэ бэшэ аалши?

⁶ Тиимэ хүн тэнгэридэ тулатараа бахархабашье,

⁷ нэгэ сагта үмхэй бааһантаяа адли эгүүридэ үгы болоходонь, «Үнөөхимнай хаанаб?» гэжэ өөһэд хоорондоо гайхан асуухалта.

⁸ Тиимэ хүнэй амидарал зүүдэн мэтэ үнгэрдэг.

⁹ Орон нютагтань тэрэниие дахин оложо харахагүй.

¹⁰ Тэрэ хүн ядуушуулые мүнөө дарлабашье, хожомынь тэрэнэй үри хүүгэд булхайлжа абаһан зөөрииень бусаан үгэжэ, үршөөл туһаламжа эрихэ саг болохо.

¹¹ Шадал дундаа бэень эртэ булагдан, газар шоройдо шэнгэхэ.

¹² Муу юумэ хэхэдээ, тиимэ хүн амаа тамшаан хорхойтодог.

¹³ Амандаа хэһэн шэхэр амтархан хүхэһэндэл, гэнтэ ябадалаа орхихо гэжэ байхагүй.

¹⁴ Гэбэшье хэһэн гэмынь хожом хоротой хоол мэтэ боложо,

¹⁵ эдиһэн хоолоо бөөлжэн гаргаһантай адли, абаһан хүрэнгэеэ хаяха баатай болохо. Үнэн шударга байдалай түлөө Бурхан энээниие хэдэг.

¹⁶ Муу хэрэг үйлэдэхэ гээшэ могойн хоро ууһантай адли.

¹⁷ Иимэ хэрэг үйлэдэһэн хүн түргэн үхэжэ, зүгын бал, үрмэ тоһоор билтарһан элбэг амидаралые эдэлжэ шадахагүй.

¹⁸ Наһан соогоо суглуулһан зөөринь ямаршье жаргал үгэхэгүй.

¹⁹ Ушарынь хадаа тэрэ ядуушуулые дарлажа, өөрөө бодхоогоогүй гэрнүүдые буляажа абадаг байгаа.

²⁰ Садаха гэдэхые тэрэ мэдэдэггүй, сэдьхэлынь ханаха гэжэ байдаггүй.

²¹ Үрэбхигшэ аманһаань юуншье зайлаагүй. Бусадые хайрлаха сэдьхэлгүй тэрэ хүнэй баян, тарганиинь удаанай бэшэ.

²² Элбэг дүүрэн амидаржа байһанаа тэрэ гэнтэ хохидожо, туйлай ехэ зоболон үзэхэ.

²³ Сэнгэлэн байдалдаа ханажа байтарынь Бурханай уур хилэнсэгэй хатуу шиидхэл гэнтэ бууна.

²⁴ Тэрэ хүнэй байдал һэлмэһээ зайлаад, хүрэл һуршада оногдоһондо адли.

²⁵ Хурса һомоной нюргандань зоогдожо, бэеынь шобто гарахада, хүрэл булсагарынь эльгыень биса татажа, тэрэ хүндэ айдаһан ерэнэ.

²⁶ Досоонь захалһан гал тэрэниие үрэбхихэ, гэр бүлэнь суглуулһан зөөритэеэ баһал галда хуйхалагдаха.

²⁷ Тэнгэри тиимэ хүнэй гэм элишэлхэ, газар дэлхэй эсрэг гэршэлхэ.

²⁸ Эзэнэй уур хилэнсэг эд зөөрииень үерэй уһан мэтэ хаман аршана.

²⁹ Гэмтэй хүн Эзэнһээ иимэл шиидхэл абадаг юм. Тэрэниие шударга байдалай түлөө хэнэ.