Иоов 19 - Библи

Иоовой харюу

¹ Иоов харюу үгэбэ:

² – Таанар хэр удаан муу үгөөр намайе дайлан зобоохобта?

³ Таанар намайе арба дахин доромжолбот, тэрээнһээ эшэхэгүй байна гүт?

⁴ Үнэхөөр минии эндүүрһэн байгаашье һаа, танда ямар хамаатайб?

⁵ Хэрбээ таанар өөрыгөө намһаа дээгүүр үзэн, минии амсаһан зоболон ашаглан, намайе гэмтэн болгохые баталха гээ һаа, нэгэ юумэ ойлгогты.

⁶ Бурхан намайе нэрбэжэ унагаагаа. Иигэжэ би Тэрэнэй торто баригдаһан ушарһаа зугадаха газарни үгы.

⁷ «Алабал!» гэжэ минии хашхархада, ямаршье харюу үгы. «Гомдолым хаража шүүгыт, туһалыт!» гэхэдэм, үмэглэл байхагүй.

⁸ Харин Тэрэ зам дээрэм шулуу хаяжа, манан харанхы буулгаба.

⁹ Гэм зэмэгүй би хүндэ ямба хүлеэн абадаг байгааб, теэд Эзэн бүхы нэрэ хүндыем хухалаа.

¹⁰ Бүхы тээһээм Тэрэ намайе нэрбэжэ, этигэл найдабариием модоной үндэһэн шэнгеэр ходо татажа хаяа.

¹¹ Өөрын дайсадай тоодо оруулжа, уур хилэнсэгээ нам тээшэ шэглүүлээ.

¹² Юрэ бусын сэрэгүүдынь гэрыем хүреэлэн дайраһан мэтэ.

^13-14 Аха дүүнэрни, түрэл саданарни намайе орхижо, анда нүхэд, танил таланууд тоохоо болёо.

¹⁵ Гэртэм хонолго һурадаг байһан зон мүнөө намтай мэндэшэлхэеэ болижо, зарасанарни намайе хари хүн гэжэ тоолодог болоо.

¹⁶ Тэдээнһээ туһа эрижэ дуудахадам, тоожо үгэнэгүй.

¹⁷ Үмхэй үнэртэй аминһаам һамгамни хулжан зайлажа, түрэһэн хүүгэдни ойртохо дурагүй болоо.

^18-19 Балшар хүүгэд намһаа жэгшэжэ, бии болоходом наадалдаг болоо. Хамагай дүтэ нүхэдни үзэн ядадаг болоо.

²⁰ Мүнөө намһаа арһа яһан хоёр үлэжэ, амиды голтойхон байнам.

²¹ Бурханай мутар намайе сохёод байхадань, анда нүхэдни, таанар, юундэ хайрлахагүй байнат?

²² Тэрээнтэй хамһажа намайе хашаха хэрэг бии гү?

^23-24 Өөрыгөө би гэмгүй гэжэ тоолодог һэн тула минии үгые номой хуудаһанда бэшээд, хадын шулуун дээрэ һиилээд, туулгаар барлаад, эгүүридэ үлөөбэл – һайн байгаа.

²⁵ Юундэб гэхэдэ, намда Абарагша бии. Тэрэ һүүлдэнь намайе хамгаалхаа ерэхэл.

^26-27 Арһа мяхамни үбшэндэ эдюулжэ үгы болоошье һаань, хожомынь би дахин ами орожо, бэеэрээ Бурханай урда ошохом зайлашагүй. Үхэн үхэтэрөө би энээнииел хүсэхэ байнаб.

²⁸ Нүхэдни, таанар намайе буруудхажа, зоболон дээрэм зоболон нэмэхэеэ болигты.

²⁹ Эзэнэй уур хилэнсэгһээ болгоомжологты. Тэрэнэй уур хилэнсэгэй хурса һэлмэдэл сабшахада, шиидхэлынь ямар болохые таанар мэдэхэт.