Иоов 18 - Библи

Билдаадай хоёрдохи үгэ

¹ Шууһаа нютагай Билдаад Иоовто хандаба:

² – Хэлээ бүлюудэхэтнай хүрөө бэшэ гү? Хэзээ амаа хааха гээшэбта, бодожо үзөөд дуугардаг болоёл.

³ Ши юундэ бидэниие малһаа дородо тоолонобши?

⁴ Бардам омогһоо боложо, ши өөрынгөө бэеые таһа татахаһаа холо бэшэ байнаш. Шамһаа боложо оршолон юртэмсын зүй тогтоол хубилжа, амитай бүхы усадхагдаха, хада шулуун байраһаа хүдэлхэ юм гү?

^5-6 Гэмтэй этэгээдүүдэй гэр гэрэлгүй боложо, гал гуламтань һүнэхэ болоно. Тиимэ муу хүнэй хохиржо муу шиидхэл үзэхэнь зүб гээшэ.

⁷ Элүүр энхэ байһанаа алхадалынь һуларжа, хорото хэрэгүүдынь өөртэнь эсэргүү болодог.

⁸ Өөрынь хүлнүүд тэрэниие, муу бодолынь тиимэ хүниие урьхадан торгожо, зангада хүлөө шэхэһэнтэйнь адли болгоно.

⁹ Ороһон зангаһаа тэрэ мултаржа шадахагүй.

¹⁰ Тиимэ хүниие зам дээрэнь далда занга үргэлжэ отожо байдаг.

¹¹ Тиимэ хүн аюул аймшагта бүһэлэгдэн, гараха газаргүй болоно.

¹² Тэрэнэй шадалынь барагдажа, зоболонһоо бэшэ юумэ үзэнэгүй.

¹³ Арһа мяхан хүрэтэрни үхэлэй үбшэндэ эдигдэнэ.

¹⁴ Орон гэртээ тэнюун һууна гэжэ найдажа байһанаа гэнтэ аймшагтай хаанай олзо болоһон мэтэ болоно. Тэрэ хаанай нэрэ «Үхэл» гэдэг.

¹⁵ Танигдаагүй хүнүүд гэртэнь орожо һуухадаа, үмхэй үнэрынь арюудхаха гэжэ арса хүжэ шатаана.

^16-17 Тэрэ хүн үндэһэ мүшэрынь хатаһан модонтой адли боложо, түрэһэн нютагтань тэрэниие таниха хүн үгы болошодог.

^18-19 Тиимэ муу хүн гэрэлтэ дэлхэйһээ харанхы оршондо түлхигдэн орожо, уг галгаха гансашье үригүй үхэнэ.

²⁰ Энээниие дуулаһан хүн бүхэн гайхан жэхыдэг, хамаг зон айхын ехээр айдаг.

²¹ Бурханиие тоодоггүй иигэжэ хохирдог байха юм.