Иоов 17 - Библи

¹ Урма зоригни хухаржа, үдэр хоногуудни дууһажа, удахагүй хуурсагта орохоо бодожо байнам.

² Тойрон хамаг зон намайе наадалжа байна. Хараха нюдөө огто аняагүй сагтаа энээнииел үзэхэ хубитай болооб.

³ Та Өөрөө минии түлөө барисаа баталжа гэм зэмэгүй гэжэ гэршэлыт. Танһаа ондоо хэншье намтай иимэ хэлсээ баталжа шадахагүй.

⁴ Та тэдэнэй ухааень балартуулаат, ушар тиимэһээ тэдэндэ бахархал бү үгыт.

⁵ Олзо ашагай түлөө нүхэдтөө туһалаагүй хүнэй үри хүүгэдынь нюдэ һохор болодог гэлсэгшэ.

⁶ Тэрэ намайе хохирооходоо энэ үгые баталһан мэтэ. Намайе бултанай наадан болгоод, хүнүүд нюуртам нёлбожо байна.

⁷ Уйдхар зоболондо абтаһан би хооһон агаар шэртэжэ, бэе мүсэмни һүүдэр шэнги болоол.

⁸ Үнэн шударга зон энээниие гайхан, Бурханда этигээгүй ябадалай гай гэжэ буруу тайлбарилна.

⁹ Үнэн шударга зон замһаа хадуурхагүй, гэмгүй хүнүүд хүсэ нэмэхэ.

¹⁰ Өөһэдыгөө зүб гэжэ тоолодог тэдэ минии урда сугларбал, хэниинь мэргэн ухаатайб гэжэ би хэлэжэ шадахагүйб.

¹¹ Удахагүй би үхэжэ һалахаб. Хүсэһэн түлэблэһэн олон юумэмни хэзээшье бэелхэгүй, үгы болохо.

¹² Амидаралайм харанхыда ороходо, анда нүхэдни үдэр гэхэ юм. Гэрэлтэ үдэр ерэнэ гэжэ тэдэ сэдьхэл заһабашье, шэб харанхы шэгээрээ.

¹³ Хуурсагай нүхөөр би гэр хэжэ, тэндэл унтажа амархамни.

^14-15 Хуурсагтай нүхэндэ хандажа, «ши минии эсэгэ» гэжэ, үтэн хорхойнуудта хандажа, «таанар минии эхэ эгэшэ» гэжэ хэлэдэг болоходом, минии найдалда хэн анхарха юм?

¹⁶ Бэемни булагдаашье һаа, найдални булагдахагүй юм бэзэ.