Иоов 16 - Библи

Иоовой харюу

¹ Иоов харюу үгэбэ:

² – Иимэрхүү үгэ би урдань оло дахин шагнаһан байнаб. Хүнэй сэдьхэл заһахын орондо таанар улам зобоодог байнат.

³ Дэмы донгодожо дууһаба гүш? Юундэ үргэлжэ тоосолдоо хүмши?

⁴ Таанарай нам шэнги болоо һаа, бишье тархяа һэжэрэн зэмэлхэ байгааб.

⁵ Би һанааетнай заһажа, сэдьхэлыетнай уужам болгожо шадаха һэм.

⁶ Хэды хөөрэлдэбэшье, минии зоболон бага болоногүй. Баһа үгэ дуугүй һуухань мүн лэ хэсүү.

^7-8 Эзэн намайе туйлдам хүргэжэ байна. Гал гуламтыем усадхаһанаар дүүрэхэгүй, ахирхан бэеым гартаа оруулан зобоожо байна. Үбшэн зоболондо нэрбэгдэн, арһа яһан болооб. Бусад хүнэй урда гэмтэ амитан болооб.

⁹ Уурлан хилэнлэһэн Тэрэ намайе зэрлиг амитаниие мүрдэһэн ангуушан мэтэ намнажа, үбшэн бэеым шүдөөрөө удар татахаар бэлэн байна. Дайсад болон бусад нам тээшэ нюдөө хёлойлгон, ама шүдөө арзайлгана.

¹⁰ Хасар нюурым альгадахаар барахагүй өөһэд хоорондо эбсэн доромжолно.

^11-12 Өөрыень сэгнэдэггүй зоной гарта Эзэн намайе оруулжа, гэнтэ бахалуурдан абажа, бүхы бэеым нюхажа хаяад, бай болгобо.

¹³ Һурша номо агсаһан сэрэгүүдынь намайе тойрон зогсоод, доторым хаха харбажа, шуһа нүжыем гоожуулһан мэтэ.

¹⁴ Тэрэ намайе хайрлаха шэнжэгүй. Харин дошхон сэрэгшэ мэтэ дахин дахин нам тээшэ добтолно.

¹⁵ Иигэжэ би эгүүридэ гашуудалай шэрүүн хубсаһа үмдэһэн мэтэ болооб. Духаараа газар мүргэжэ,

¹⁶ нюдэнэйнгөө хабдатар, нюурайнгаа улайтар бархирааб.

¹⁷ Гэм хэхэһээ зайлажа, Бурханда сэхэ сэбэр сэдьхэлһээ зальбардаг байһандаа би иимэ зоболондо орооб.

¹⁸ Минии арюун шуһые газар шорой нюуха ёһогүй. Үнэн шударга бэшэ байдалда эсрэг би бодожо байнам. Минии дуу хоолой хэншье таглаха ёһогүй.

¹⁹ Гэмгүйем баталха гэршэ юрэ бусын юртэмсэдэ олдохо. Тэрэ намайе хамгаалха.

²⁰ Анда нүхэдни намайе наада барижа байна. Тиимэһээл би Бурханай урда нулимсаяа гарганам.

²¹ Анда нүхэрөө хамгаалан зууршалһан мэтэ тэрэ гэршэ тэнгэридэ намайе Бурханай урда хамгаалхань болтогой.

²² Удангүй би үхэжэ, энэ дэлхэйдэ дахин бусажа ерэхэгүй ушарһаа энэл намда шухала байна.