Иоов 15 - Библи

Элипаазай хоёрдохи үгэ

¹ Удаань Тэмаан хотын Элипааз Иоовто дахин хандажа хэлэбэ:

² – Зүүн зүгэй хуурай һалхяар дотороо дүүргэхые сэсэн хүн хүсэхэгүйл, тэрээндэ адли хооһон үгөөр харюу үгэхэнь хэн хэндэмнай ашаггүй бэшэ юм гү?

³ Сэсэн хүн дэмы үгэ алдахагүй.

⁴ Шинии хэлэһээр, Бурханиие хүндэлхэ хэрэггүй болоно.

⁵ Харатай хүнүүд лэ иигэжэ дуугардаг, гэм гэмшэлһээ хулжахын тулада залитай үгэ хэлэжэ байнаш.

⁶ Шамайе заатагүй буруудхаха гэнэгүйб. Хэлэһэн бүхы үгэшни шамайе элишэлжэ байна.

⁷ Энэ дэлхэйдэ эгээл түрүүшын хүн ши юм гүш? Бурхан газарай нюруу бүтээхын урда шамайе бүтээгээ юм гү?

⁸ Тэрэнэй бүхы нюусые ши мэдэнэ гүш? Хүнһөө үлүү сэсэн ухаанда хүртэбэ гүш?

⁹ Бидэнһээ үлүү юу мэдэхэбши?

¹⁰ Буурал үбгэд бидэнэй үгэ зүбшөөнэ. Тэрэ эсэгэһээш үндэр наһатай бшуу.

¹¹ Бурханай шамайе дүмэхэнь багадаа гү? Бидэнэй зөөлэн үгөөр хэлэһэмнай шамда дээрэ бэшэ гү?

¹² Ши юу һанаархаһандаа нюдэншни омогоор ялалзанаб?

¹³ Юундэ уурлан, Бурханда муу үгэ хэлэнэш?

¹⁴ Тэрэнэй урда хүнүүд арюун сэбэр байжа шадаха гү? Энэ дэлхэйдэ эхэнэрһээ түрэһэн хүн түгэс гэмгүй байжа шадахагүй.

¹⁵ Эзэн бидэнһээ байтагай Өөрынгөө гэгээнүүдтэ бата найдадаггүй. Тэрэнэй урда юрэ бусын юртэмсэшье арюун бэшэ.

¹⁶ Харин хүн гэжэ бузар амитанда найдалтай гү? Булагай уһанай гараһантай адли хүнэй гэм буруу таһархагүй.

¹⁷ Иоов хэлэһэн үгэдэм анхара. Үзэһэн хараһанаа ярихамни.

¹⁸ Урданай ухаантан мэргэдэй хэлэһэн үгэ бшуу даа. Үбгэдһөө тэдэ һуража, энэ болотор дамжуулаа.

¹⁹ Урдын тэрэ сагта гадаадын ондоо омогтон үзэл бодолыень бузарлаагүй байгаа.

²⁰ Нүгэлтэй хүнүүд наһан соогоо зобожо, үргэлжэ аймшаг үзэнэ. Дарлагшын наһанай эсэс тэдээндэ мэдэгдэхэгүй.

²¹ Хуряажа суглуулһан зөөринь дээрмэшэнэй гарта гэнтэ ороно.

²² Хэһэн үйлэдөө тэнсүү шиидхэл абахаа тэдэ ойлгожо, гунигта бодолдо абтана.

²³ Мяхаша шубуунай үхэл хүлеэдэгтэл Эзэнэй шиидхэл буухые тэдэ мэдээд,

²⁴ дайнда бэлдэһэн хаан мэтэ айн һандарһаар амидаралаа үнгэргэнэ.

²⁵ Юундэб гэхэдэ, тэдэ энэ дэлхэйн Түгэс Хүсэтэ Бурханда бардам хандажа байна.

²⁶ Халхабша дуулга барин дайсан тээшэ зоригтой дабшаһан сэрэг мэтэ тэдэ эсэргүүсэн тэмсэнэ.

²⁷ Гэдэһэ садхаланһаа нюурынь мяхалиг, ташаа нюрганиинь өөхэлиг болонхой.

²⁸ Хото һууринуудынь хооһорон үгыржэ,

²⁹ хүрэнгэ зөөринь үригдэн барагдана.

³⁰ Тэрэнэй шиидхэлһээ тэдэ зайлажа шадахагүй, үхэлэй харанхыда орожо, галда шатаһан сусал мэтэ үгы болоно. Иигэжэ Тэрэнэй уур хилэнсэг тэдэниие усадхана.

³¹ Нүгэлтэн хооһон найдалаар бэеэ бү мэхэлэг, эсэстээ юушьегүй үлэхэ.

³² Сагһаа урид гэнтэ муудажа, ургажа байгаад хатаһан модон мэтэ болоно. Тиимэ модоной мүшэр дахин сэсэглэжэ шадахагүй.

³³ Түүхэй жэмэстэй мүшэрөө таһалуулһан уһан үзэмэй модон, эртэ үхэһэн алимай модон иимэ болодог.

³⁴ Нүгэлтэ зон һайн һайханиие үзэхэгүй, үри хүүгэдгүй үхэдэг. Эдилгэ абагшын гэр гал түймэртэ хосорно.

³⁵ Иимэ хүнэй һанаанда муу үйлын үрэ һуурияа оложо, хожомой нэгэ сагта хүүгэдэй түрэһэн мэтэ гэнтэ гаража ерэдэг.