Иоов 13 - Библи

¹ Эдэ бүгэдые би нюдөөрөө хаража, шэхээрээ шагнааб.

² Би таанарай мэдэхэ юумэ хуу мэдэнэм.

³ Гэбэшье намда маргаха хэрэг байхагүй. Би Түгэс Хүсэтэ Эзэнтэй ярилсахые хүсэжэ байнам. Тэрээнтэй арсалдаха дуран хүрэнэ.

⁴ Таанарай һанаанһаа баалажа зохёоһон үгэ эмээ мэдэхэгүй эмшэнэй үгэһэн эм шэнги.

⁵ Иимэһээ амаа татан дуугай шарайлхадаа, таанар хүнэй нюдэндэ ухаатай харагдажа магадгүйт.

⁶ Минии сэдьхэл ойлгожо, хүсэл бодолыем мэдэжэ абагты.

⁷ Эзэнэй түлөө худалаар хэлэхэ ямар хэрэг байгаа юм, Эзэндэ танай хуурмаг хэрэгтэй юм гү?

⁸ Тэрэнэй талые бариһан аад, зорёолхоно гүт? Бурханай түлөө тэмсэхэ гээ гүт?

⁹ Тэрээгээр шалгуулбал, буруугүй гаража шадаха гүт? Хүниие мэхэлһэн шэнгеэр Тэрэниие мэхэлжэ шадаха гүт?

^10-11 Хэрбээ таанар нюусаар нэгэнэйнь тала барижа, үнэн бэшээр шүүбэл, Тэрээнһээ шиидхэл абажа, гайхамшагта хүсыень хараад, айн һүрдэхэт.

¹² Һургаалайтнай үгэнүүд һалхинда хиидэхэ үнэһэн мэтэ. Баталһан тогтоолтнай шабар хэрэм мэтэ хэбрэг.

¹³ Амаа хаажа, минии хэлэхэ ээлжээ үгэгты. Удаань болохо юумэн болуужаг.

¹⁴ Үхэлшье намда хамаагүй. Үхэлһөө зугадаха хэрэг намда үгы.

¹⁵ Амиием абаашье һаань, этигэһэн хэбээрээл байхаб. Ямаршье һаа, би Тэрэнэй үмэнэ ошоод, өөрыгөө хамгаалхаб.

¹⁶ Бурхангүй хүнүүд Тэрэнэй урда ошожо шадахагүй, би урдань ошобол – абарал олохоб.

¹⁷ Минии үгэ анхаралтай шагнагты.

¹⁸ Би мүнөө хэрэг шүүлгын газарта Тэрэнэй урда ошоод өөрыгөө үмэглэхөөр бэлэн байнам. Гэмтэй бэшэеэ би батаар мэдэнэм.

¹⁹ Эзэн минии, хэн нэгэнэй минии бурууе гэршэлжэ шадабал, би үгэ дуугүй үхэхөөр бэлэнби.

²⁰ Хоёрхон лэ юумэ гуйха һанаатайб. Гуйлтыем зүбшөөбэл, Та намтай уулзан хөөрэлдэхэт.

²¹ Өөрын мутар намһаа холодуулжа, айлган шиидхэхэеэ болиит.

²² Асууһан бүхэндэтнай би харюусахаб. Амаа нээхэ сүлөө үгэгты. Үгы гэбэл, минии һурахада, Та харюусагты.

²³ Танай урда би ямар гэмтэй гээшэбиб? Хамаг нүгэлыем нюултагүй хэлэгты.

²⁴ Юундэ өөрын нюур нюужа, намайе дайсан мэтээр үзэнэт?

²⁵ Танай урда минии бэе һалхинда хиидэхэ хамхуул, хатаһан набша мэтэ бишыхан бэшэ юм гү? Бишыхан намайе гартаа адхан иигэжэ тамалха ушар бии юм гү?

²⁶ Шиидхэлтнай хатуудажа байна. Эдир залуугай алдуу мүнөөдэрэй шиидхэлые хүндэ болгожо байна.

²⁷ Хүлыем гэнжэдэ уяжа, хэһэн юумыем нарин ажаглажа, гэшхэһэн мүрыем шалган үзэжэ байнат.

²⁸ Амидарал гээшэ табиһан хоол мэтэ муудажа, хадагалһан хубсаһан мэтэ хорхойдо эдюулжэ дууһадаг.