Иоов 12 - Библи

Иоовой Цопаарта үгэһэн түрүүшын харюу

¹ Иоов харюу үгэбэ:

² – Дэлхэйдэ гансал таанар ухаатай юм гүт? Таанарай наһа барахада хүн түрэлтэн ухаагаар дутаха гү?

³ Харин би таанарһаа дутуугүй алибаа юумэ ойлгоноб. Энэ мэтые хэн мэдэдэггүй юм?

⁴ Танил талануудай наада зугаада би оронхойб. Урдань би Бурханһаа гуйлтадаа харюу абадаг бэлэйб. Мүнөө гэм хээгүй, үнэн шударга би бултанай доро болоо хэбэртэйб.

⁵ Зоболон үзөөгүй сагтаа таанар зобоһон хүниие наадалжал шаданат.

⁶ Үнэн шударга минии зобожо байхада дээрмэшэн этэгээдүүд баяжажа, Бурханиие тоодоггүй зон амар һууна. Тэдэ өөрын хүсэ шадалые бурхан болгон үргэмжэлнэ.

^7-8 Ан араатан, жэгүүртэн, загаһа жараахайһаа, газар дэлхэйһээ асуугаад үзыш!

⁹ Тэдэ нэгэл юумэ баталан хэлэхэ. Хорбоо юртэмсын хуули гурим Эзэн зохёогоо гэжэ тэдэ мэдэнэ.

¹⁰ Амитан бүриин амидарал, хүнэй ами наһан Тэрэнэйл гарта байна.

¹¹ Харин эдэ бүгэдэ таанарта хамаагүй. Аманшни амтан хоолдо дуратайдал адли шэхэншни дэмы үгэ соносохо дуратай.

^12-13 Үндэр наһатан уужам мэргэн ухаантайшье гэгдээ һаа, Эзэндэл оюун ухаан, хүсэ шадал түгэс байдаг.

¹⁴ Тэрэнэй усадхаһаниие хэншье дахин бодхоожо шадахагүй. Тэрэнэй хааһаниие хэншье сүлөөлжэ шадахагүй.

¹⁵ Тэрэнэй уһа тогтоохо гэбэл, ган болохонь зайлашагүй, уһа табибалнь дэлхэй дүүргэхэ.

¹⁶ Хэмжээгүй ехэ хүсөөрөө хамагые Тэрэ диилэжэ шадаха, мэхэлэгдэһэн ба мэхэлһэн хүнүүд барандаа Тэрэнэй гарта ородог.

¹⁷ Түшэмэл ноёдые гар хооһоор ябуулжа, шүүгшэдэй мунхагые харуулан тушаалһаань үлдэжэ болохо.

¹⁸ Хаад ноёдые шэрээһээнь буулган, шорондо оруулжа шадана.

¹⁹ Һүмын санаартад, изагуур ехэтэн Тэрэнэй хүсэһэн сагта доошоо бууна.

²⁰ Ухаатай түшэмэд хэлэхэ үгэгүй боложо, сэсэн үбгэд хүгшэд дэмы гайхан хосорно.

²¹ Хэргэм зэргэтэйшүүл зоной наадан болоно, хүсэтэн хүсэһэн сагтань доройтоно.

²² Хамагай далда зүйл эли болгожо, гүн харанхые гэрэлдэ абажа ерэдэг.

²³ Зарим улас үндэһэтэниие хүсэтэй болгожо, нүгөөдүүлынь нураан унагаадаг. Зарим уласай газарынь үргэдхэнэ, зариманай газар буляан абадаг.

²⁴ Арад олоной ударидагшад ушараа олохоо болижо, сүл губида харгыгаа төөрижэ жолоогоо алдана.

²⁵ Иигэжэ Эзэнһээ боложо, тэдэ харанхыда тэмтэрэн, һогтуу хүн мэтэ гуйбажа ябадаг.