Иоов 11 - Библи

Цопаарай Иоовто хандаһан үгэ

¹ Наамаан обогой Цопаар хэлэбэ:

² – Мянга түмэн үгэдэш харюу үгэхэнь зүб. Олон үгэтэй хүн зүб гээд бусадай ама таглаха хэрэггүй.

³ Ши хэндэш зэмэлүүлэнгүй, Эзэниие торгоохо гэжэ бодобол эндүүрнэш.

⁴ Үнэн һургаалытнай батаар дахадаг ушарһаа Танай урда гэмгүйб гэжэ хэлээш.

⁵ Тэрэнэйш түлөө Бурхан эрид буруушааха ёһотой.

⁶ Шамда харюусаа һаа, мэргэн ухаанай нюусануудые Тэрэ нээгээд үгэхэ һэн. Тэрэнэй оюун ухаанда хизаар байхагүй. Шинии гэмэй ехэ хубиие хэлээгүй гэжэ мэдэ.

⁷ Ши өөрөө Бурханай гүн ухаае, Хамагые баригша Түгэс Хүсэтын хизаарые оложо шадаха гүш?

⁸ Тэнгэри мэтэ хизааргүй Тэрэнэй үндэртэ хүрэжэ шадаха гүш? Үхэлһөө гүнзэгы бодолыень түгэс ойлгожо шадаха гүш?

⁹ Түби дэлхэйһээ, тэнгис далайһаа үргэн ехэ ухаандань ши хэрхэн хүрэхэбши?

¹⁰ Хэрбээ Тэрэ шамайе хорижо шиидхэхэ гэбэлнь хэн зогсоожо шадахаб?

¹¹ Хуурмаг хүниие тэрэ ядахагүй танидаг, хүн бүхэнэй гэм Тэрэнэй нюдэндэ эли.

¹² Харин зэрлиг элжэгэнһээ хүнэй түрэхэнь шам мэтын тэнэгэй ухаатай бологшоһоо хилбархан.

¹³ Ши нүгэлөө наманшалжа, үршөөл хайра Тэрээнһээ гуйгаад,

¹⁴ хожомынь гэм үйлдэхэеэ болииш. Бишыханшье бурууһаа һалаха гэжэ оролдо. Нүгэлһөө зайлажа, майхангуудтаа хорон муугай оршон усадхабал,

¹⁵ толгойгоо дээшэнь үргэжэ үнэхөөр шадаха, айха эшэхын үндэһэгүй болохош.

¹⁶ Зоболоншни бүримүһэн мартагдажа, голой уһанай урдан үнгэрһэн мэтэ һанагдахал.

¹⁷ Амидаралшни үдын наран мэтэ гэрэлтэжэ, харанхы соо үүр сайһан мэтэ болохо.

¹⁸ Тиин этигэл найдабари бии боложо, сэдьхэл амарха. Эрьен тойрогшоо хараад, ши айха юумэгүй амар унтахаш.

¹⁹ Иигэжэ һайн һуухышни хүнүүд хараад, хүндэлэн туһаламжа эридэг болохо.

²⁰ Харин муу этэгээд тэрэ үедэ хэсүү байдалһаа гараха аргагүйгөө мэдээд, сэдьхэлээ муудажа, тэдэнэй гансал найдаха юумэн үхэлэй урда дүүрэн сээжээр ами абахань лэ үлөө.