Иоов 10 - Библи

¹ Өөрын амидарал үзэн ядадаг болоһон би гомдолоо Бурханда мэдүүлхэмни.

² «Эзэн минии! Намайе иигэтэр бү гэмныт! Харин юундэ намай үзэн ядаһанаа хэлээд үгыт!

³ Та Өөрөө намайе бүтээһэн аад, иигэжэ үзэн ядахадаа, адагай муу этэгээдүүдэй бахаа ханахые хангажа байхадаа зүб юумэ хэнэ гээшэ гүт?

⁴ Амитай хүндэ адляар Танай нята харадаггүй,

⁵ Танай үдэрнүүд мүнхэ бэшэ хүнүүдэй үдэрнүүдтэ адли бэшэ, Танай жэлнүүд хүнэй жэлнүүдһээ ондоо.

⁶ Та юундэ иитэрээ минии үйлэ үзэжэ бурууемни бэдэрнэт, нүгэлтэй байһыемни элирүүлхэ гэжэ оролдонот?

⁷ Иихэдээ эгээлэй хүнүүдтэ адляар намда хандахадаа хамагые хаража байдаг Бурхан бэшэ болоно гүт? Буруугүй болохыем Та мэдэнэт. Танай мутарһаа хэн намайе һалгажа шадахаб? Хэншье һалгажа шадахагүй.

^8-9 Та Өөрөө намайе газар шоройһоо бүтээһэн аад, шорой болгохо гэжэ юундэ хүсэбэт?

¹⁰ Та намайе һүн шэнгеэр юулэжэ, ээзгэй шэнги бүрилдүүлжэ,

¹¹ арһа мяхыем суглуулжа, яһа шүрбэһөөр холбоогүй һэн гүт?

¹² Танай бэлэглэһэн хайраар би амиды ябанаб.

¹³ Гэбэшье сэдьхэл соогоо далдалһан бодолыетнай би ойлгоном.

¹⁴ Алибаа гэм үйлдэбэлни, Та анхарангүй үнгэрхэ ушаргүйт.

¹⁵ Гэмтэй болобол шиидхэл үзэнгүй би гарасалдахагүйб гэжэ мэдэнэм. Гэмтэй болоболни гай гашуудал намда бууха. Гэмгүйшье һаа, толгойгоо үргэжэ зүрхэлхэгүйб. Иигээд оройдоо гэмгүй хүндэ зоболон амасуулха эрхэтэйт.

¹⁶ Зобохын ехээр зобожо байхадам, арсалан мэтэ добтолжо, үрсэгэнүүлэн тамалнат.

¹⁷ Та намайе дахин дахин гэмнэжэ, уур хилэнсэгтнай улам ехэдэнэ.

¹⁸ Тиигэбэл юундэ Та намайе эхын умайһаа түрүүлээ гээшэбта? Хүнэй нюдэндэ харагдахын урда үхэһэмни дээрэ байгаа.

¹⁹ Тиигээд оршолонто юртэмсэдэ огто ерээгүй мэтэ эхын хэбэлһээ унамсаараа үхээриин газарта ошохо һэм.

²⁰ Удангүй үхэхэ намайе удаан бү тамалыт. Ойро зуура һэргэжэ, амяа абаха сүлөө олгыт.

²¹ Хизааргүй харанхы ба гүн һүүдэрэй орон руу ошохымни урда хэшээгыт.

²² Нюдэ балай һүни тэрэнэй хажууда юуншье бэшэ. Эхи захагүй байдал, гүн харанхы тэндэ зонхилно» гэжэ хэлэнэм.