Иоов 1 - Библи

Иоовой үнэн шударгые туршалга

¹ Ууц нютагта Иоов гэжэ хүн ажаһуугаа. Тэрэ нүгэл хилэнсэг гэжэ мэдэхэгүй, үнэн шударга, Бурханда бэшэрэн шүтэдэг, бузар мууһаа огто зайлаха гэжэ оролдодог хүн байгаа.

² Тэрэнэй гэр бүлэдэнь долоон хүбүүн, гурбан басаган түрэһэн юм.

³ Зөөри баялигынь гэхэдэ, долоо мянган хонитой, гурба мянган тэмээтэй, табан зуун паар ажалай сартай, табан зуун эмэ элжэгэтэй, олон тоото зарасанартай байгаа. Тэрэ хүн Дурна зүгэй хамагай суутай зоной нэгэн бэлэй.

⁴ Иоовой хүбүүд ээлжээгээр өөр өөрын үдэртэ нэгэнэйнгээ гэртэ сугларжа, найрлан сэнгэдэг, мүн баһа гурбан эгэшэнэрээ эдихэ уухыень уридаг байба.

⁵ Найр сэнгэлэйнь дүүрэхэдэ, Иоов хүүгэдээ дуудажа, арюудхалгын ёһолол бүтээдэг һэн. Мүн үглөөгүүр тэрэ эртэлэн бодожо, хүбүүдэйнгөө тоогоор түгэс шатаалта үргэл асардаг байба. Хүүгэдэйнь хэн нэгэн Эзэниие баһажа, нүгэл хэжэ байгуужаг гэжэ Иоов һанаандаа түбэгшөөдэг һэн.

⁶ Нэгэтэ Бурханай хүбүүдэй Эзэнэй үмэнэ ерэхэдэнь, тэдэнэй дунда эрлиг оролсобо.

⁷ Эзэн тэрээнһээ асууба: «Ши хаанаһаа ерэбэш?». «Газар дэлхэйгээр хэсэжэ ябаһанаа ерээб», – гэбэ эрлиг.

⁸ «Минии зараса Иоовые хараа гүш? Тэрээн шэнги гэм зэмэгүй, үнэн шударга, Бурханда һүгэдэн бэшэрдэг, бузар мууһаа зайладаг хүн дэлхэй дээрэ үгыл», – гэжэ Эзэн айладаба.

⁹ «Нэгэл удхатайгаар Бурханай урда бэшэрдэг юм бэшэ гү?

¹⁰ Та тэрэниие, орон гэр, зөөри хамагыень хэрэм мэтээр хорёолон хамгаалаа бэшэ аалта? Та тэрэнэй ажал үйлэ үреэн арьбажуулаат, зөөри баялигынь, мал һүрэгынь ехэ боложол байна.

¹¹ Харин мутараа һунган эдэ бүгэдынь үгы хэбэлтнай, Таниие хараангүй хайшаа ошохо юм?», – гэжэ эрлиг харюу үгэбэ.

¹² «Тиигэбэлнь, бүхы байһан юумэниинь шинии гарта орохо болоно. Өөртэнь лэ гар хүрэжэ болохогүй», – гэбэ Эзэн. Тиин эрлиг Эзэнэй хажууһаа зайлан ошобо.

¹³ Нэгэтэ Иоовой хүбүүд, басагадай ехэ ахындаа суглараад, эдижэ уужа байһан нэгэ үдэртэнь

¹⁴ Иоовто нэгэ хүн ерээд: – Сарнуудаар газар хахалжа байбабди. Элжэгэдтнай хажуудань бэлшэжэ ябаа.

¹⁵ Гэнтэ шэбаа угсаатан добтолон ерэжэ, малыешни буляажа, ажалшадыеш һэлмэдэжэ алабал. Гансаараа би амиды гаралсажа, шамда дуулгахаяа яаран ерэбэб, – гэбэ.

¹⁶ Тиигэжэ хэлэжэ байтарнь, баһа нэгэн ерэжэ хэлэбэ: – Тэнгэриһээ гэнтэ гал буужа, хонин һүрэгыешни адуулагша хонишодтойш дууһан үрэбхин һалгаа. Би гансаараа амиды үлэжэ, танда хэлэхээ яаран ерэбэб.

¹⁷ Хэлэжэ дүүрээгүй байтарнь, үшөө нэгэ хүн ерэжэ дуулгаба: – Халдей угсаатанай дээрмэшэд гурбан тээһээ добтолжо, ажалшадыеш жадаар хадхажа алаад, тэмээнүүдыетнай буляажа абаа. Би гансаараа амиды үлөөб.

¹⁸ Тэрэниие хэлэжэ дүүргээгүй байтарнь баһа нэгэ хүн ерэжэ мэдүүлбэ: – Шинии хүбүүд, басагадай ехэ ахынгаа гэртэ үзэмэй дараһан архи уужа, эдеэлжэ байтар,

¹⁹ сүл губиин саанаһаа ехэ һалхин бодожо, байшанай дүрбэн углуу сохибо. Байшан һандархадаа, бүхы байһан зониие үхэтэр даража унаба. Гансал би амиды гаралсааб.

²⁰ Тиихэдэнь Иоов бодожо, гадар хубсаһаяа таһар татажа, толгойнгоо үһэ хайшалуулаад, газарта үбдэглэн мүргэжэ, Эзэндэ хэлэбэ:

²¹ – Би эхын умайһаа нюсэгэн ерээ һэм, энэ дэлхэйһээ тиишээ нюсэгэн бусанаб. Эзэн намда эд зөөри, үри хүүгэдые үгөө бэлэй. Мүнөө һөөргэнь бусаажа абаа. Эдэ бүгэдые хэхэ эрхэтэй Эзэнэй нэрэ алдаршаг!

²² Иимэ юумэнэй болоходо Иоов Бурханиие нэгэш үгөөр муушалбагүй, Тэрэнэй урда ямаршье гэм хэбэгүй.