Иона 3 - Библи

Иона Нинэвээ хотынхидые гэмээ наманшалхыень уряална

¹ Эзэнэй Ионада хоёрдохиёо айладаһан үгэ:

² – Агуу хото Нинэвээ руу зорин ошо, Минии шамда айладаашые тэндэ номнохош.

³ Эзэнэй айладаһанай ёһоор Иона түхеэрээд, Нинэвээ ошобо. Бурханда агуу хото Нинэвээ байгаа, хэмжээниинь гэбэл, гурбан хоногой туршада алхаад гаталхаар бэлэй.

⁴ Иона нэгэ үдэрэй туршада хото соогуур ябаха үедөө номнол буулган иигэжэ хэлэбэ: – Дүшэн хоногой үнгэрхэдэ Нинэвээ һандаргагдаха!

⁵ Нинэвээ хотынхид Эзэндэ этигэбэ, масаг соносхобо, багашуулһаа эхилээд, бүхы зон шэрүүн бүдөөр оёгдоһон гашуудалай хубсаһа үмдэбэ.

⁶ Энэ хэрэг Нинэвээгэй хаанда дуулдаба, тэрэ өөрынгөө хан шэрээһээ бодобо, үмдэжэ ябаһан хубсаһаяа тайлаад, гашуудалай шэрүүн бүд хубсаһа үмдөөд, шандаруу дээрээ һууба.

⁷ Тэрэ хаанай болон түшэмэлнүүдэй үмэнэһөө Нинэвээдэ зарлиг болгон иигэжэ соносхохые захирба: «Зон, тиихэдэ бодо ба жэжэ мал юумэ эдихэгүй, бэлшээридэ гарахагүй, уһа уухагүй.

⁸ Зон гашуудалай шэрүүн бүд хубсаһа үмдэг, мүн мал иимэ бүдөөр хушагдаг, Бурханда хандан, бии шадалаараа зальбараг, хүн бүхэн гэмтэ ябадал, буруу хэрэгүүдые хэхэеэ болиг.

⁹ Хэн мэдэбэб, Бурхан үршөөжэ, Өөрынгөө һүрөөтэ уур сухалые манһаа зайсуулжа, бидэ хосорхогүйл ааламди».

¹⁰ Бурхан тэдэнэй хэрэгүүдые хараба. Харата муухай замһаа тэдэнэй холодоходо, Бурхан хайрлажа, тэдэниие хэһээхэ гэһэнээ болюулба.