Иона 1 - Библи

Лүндэншэн Эзэнэй үгэ дуулангүй хэһээлтэдэ хүртэнэ

¹ Амиттайн хүбүүн Ионада Эзэнэй үгэ дуулдаба:

² – Агуу хото Нинэвээ руу зорин ошо, тэндэ номнол буулга, ушарынь гэхэдэ, тэдэ муу юумэ хэнэ гэжэ Би дуулааб.

³ Иона Эзэнһээ зугадан, Таршииш ошохоёо зорибо, Яафада хүрэжэ ерэбэ, Таршииш тээшэ тамарха онгосо бэдэржэ олобо, түлбэрииень сүм түлэбэ, онгосо руу оробо, Таршиишта Эзэнһээ хорохо зорилготойгоор бултантай хамта тамаралгада гараба.

⁴ Эзэн далай дээрэ үзэгдөөгүй шанга һалхи шуурга буулгаба, далай дээрэ болоһон тэрэ һалхи шуурганһаа онгосо шэнгэхэ туйлдаа хүрэбэ.

⁵ Онгосошод айхын ехээр айба, тиигээд тэдэнэр өөр өөһэдынгөө бурхадые дуудажа эхилбэд, онгосоёо хүнгэн болгохын тула абажа ябаһан ашаагаа далай руу хаяжа эхилбэ. Тэрэнэй тээ урдахана Иона онгосын трюм руу буужа, тэндэ хэбтээд, бүхөөр унташаба.

⁶ Онгосын дарга тэрээндэ ерээд: – Ши юундэ унтажа хэбтэнэбши? Бодо, өөрынгөө Бурханда хандан мүргыш; тиигэбэлшни, Бурхан маниие анхаран, амиды мэндэ үлөөхэ аалам, – гэбэ.

⁷ Онгосошод бэе бэедээ иигэжэ хэлэжэ эхилбэд: – Хэнһээ боложо энэ зоболон манай толгой дээрэ буубаб гэжэ мэдэхын тула жээрэб хаяя. Тиигээд жээрэб хаяба, тэрэнь Ионада тудалдаба.

⁸ Тэдэ Ионада: – Манда хэлэжэ үгыш, хэнэй, юу хэһэн нүгэлэй түлөө иимэ бэрхэшээл манда тудалдаба гээшэб? Юу хэдэгбши, хаанаһаа ябанабши, шинии орон нютаг хаанаб, ямар арадай таһардаһан гээшэбши? – гэжэ хандаба.

⁹ Тэрэ тэдээндэ: – Би еврейби. Уһан далайе, газар дайдые байгуулагша тэнгэриин Эзэндэ шүтэдэг хүнби, – гэбэ.

¹⁰ Онгосошод угаа ехээр айба. Тэдэ Ионада: – Юунэй түлөө энэниие хэбэбши? – гэлдэбэ, юуб гэхэдэ, Эзэнһээ тэрьедэжэ ябанаб гэжэ Иона тэдээндэ хэлээ бшуу.

¹¹ Тиигээд онгосошод тэрээндэ: – Далайн номгорхын тула бидэ шамайе яаха болонобибди? Далай бүри дошхоржо байна шуу, – гэжэ асууба.

¹² Тиихэдэнь тэрэ тэдээндэ: – Намайе баряад, далай руу хаягты. Тиихэдэтнай танай хажуугаар далай номгорхо. Намһаа боложо таанадтай иимэ агуу шуурган тохёолдобо гэжэ би мэдэнэб, – гэбэ.

¹³ Далайн эрьедэ хүрэхын тула эдэ зоной бүхы хүсөө гарган һэлюурдээшье һаань, тэдэнэй урдаһаа далай улам дошхорһон зандаа байба.

¹⁴ Тиихэдэнь тэдэнэр Эзэниие дуудан, иигэжэ зальбарба: – Эзэн, Танда мүргэнэбди, тэрэ хүнэй түлөө хосорхо ёһогүйбди, мүн тэрэнэй шуһа маанадта тохохо ёһогүйт; Та, Эзэн, һанаһанаал Өөрөө хэнэт!

¹⁵ Тэдэ Ионые баряад, далай руу хаяжархиба. Далай намдан номгорбо.

¹⁶ Тэдэ хүнүүд Эзэнһээ угаа ехээр һүрдэн айжа, Эзэндэ үргэл үргэбэд, тангаригаа үгэбэд.