Иоанн 7 - Библи

Иисүүс ба тэрэнэй аха дүүнэр

¹ Удаань Иисүүс Галилейгээр ябаба. Иудейдэ ошохогүй гэжэ Тэрэ шиидэбэ, юундэб гэхэдэ, Иудейн ахамадууд Тэрэниие алаха һанаатай байгаа.

² Еврейнүүдэй Отог урса табилгын һайндэрэй найр болохоёо байба.

³ Аха дүүнэрынь Иисүүстэ хэлэбэ: – Та эндэһээ гараад, Иудей ошогты! Танай бүтээдэг гайхамшаг хэрэгүүдые тэндэ ажаһуудаг һурагшадтнай хараг лэ.

⁴ Өөрынгөө үйлэ хэрэгые нюусаар хэдэг хүн алдар сууда гарахагүй бшуу. Харин Танай тиимэ гайхамшаг үйлэ хэрэгүүд тухайтнай бүхы дэлхэйн зон мэдэг лэ!

⁵ Иисүүсэй аха дүүнэрыньшье Тэрээндээ этигэдэггүй байгаа.

⁶ Иисүүс аха дүүнэртээ иигэжэ харюусаба: – Минии саг үшөөл ерээдүй байна. Таанарта ямаршье саг таараха.

⁷ Дэлхэйн хүнүүд таанарта дурагүйлхэхэгүй, харин Намда тэдэ дурагүйлхэдэг, тэдэ хүнүүдэй үйлэ хэрэгэйнь ёро муутай байһые Би гэршэлэн харуулна ха юмбиб.

⁸ Таанар һайндэртөө ошогты. Би тэрэ найрта ошохогүйб, Минии саг үшөө ерээдүй байна.

⁹ Иисүүс тиигэжэ хэлээд, Галилейдэ үлэбэ.

Иисүүс найр дээрэ

¹⁰ Аха дүүнэрэйнгээ һайндэртэ ябаһан хойно Иисүүс баһа тиишэ бэеэ мэдүүлэнгүй ошобо.

¹¹ Еврейнүүдэй ахамадууд найрай үедэ Иисүүсые бэдэрбэ, хаана байнаб гэжэ һурагшалба.

¹² Иисүүс тухай ехэ арсалдаан улад зоной дунда болобо. Зарим нэгэниинь: «Энэ һайн хүн», – гэлдэбэ. Нүгөө зариманиинь: «Үгы, энэ хүн улад зониие мэхэлнэ», – гэжэ буруушааба.

¹³ Теэд засагаархидһаа айжа, Иисүүс тухай сэхэ руунь хэншье хэлээгүй.

¹⁴ Һайндэрэй хахад сагынь үнгэршэхэдэ Иисүүс Һүмэ соо бии боложо, һургаалаа номнобо.

¹⁵ Еврейнүүдэй ахамадууд гайхалсан: – Энэ хүн хаанашье һураагүй аад, иимэ ехэ юумэ хаанаһаа мэдэнэб? – гэлсэбэ.

¹⁶ Иисүүс харюусаба: – Энэ Минии бэшэ, харин Намайе эльгээһэн Бурханай һургаал юм.

¹⁷ Тэрэнэй дура хүсэл дүүргэхэ һанаатай хүн һаа, энэ Бурханай һургаал гээшэ гү, али Би Өөрэһөөн хэлэжэ байна гүб гэжэ мэдэдэг болохо.

¹⁸ Өөрэһөөн хэлэһэн хүн өөрыгөө магтуулхаяа оролдоно, харин Намайе эльгээһэн Бурханиие алдаршуулхаяа оролдогшо үнэн зүбые хэлэнэ, тэрэнэй зүрхэ сэдьхэлдэ худал юумэн байхагүй.

¹⁹ Моисей таанарта Хуули үгөө бэшэ аал? Теэд таанарай хэнтнайшье тэрэ Хуули сахинагүйл! Юундэ таанар Намайе алахаяа һананабта?

²⁰ – Та досоогоо ада шүдхэртэй байнат! Хэн Таниие алахаяа байнаб? – гэжэ зон харюусаба.

²¹ Иисүүс харюудань иигэжэ хэлэбэ: – Би нэгэл гайхамшаг хэрэг хэбэб, тиихэдэмни таанар бултадаа ехээр гайхалдаалта.

²² Бишыхан хүбүүдэйнгөө бэлгэ отолуулха ёһо заншал таанарта Моисей захяа һэн (үнэндөө Мойсейһээ урда, үбгэ эсэгэнэр тиигэжэ захяа), тиигээд таанар субботодошье отолуулна ха юмта.

²³ Моисейн Хуули эбдэхэгүй гэжэ хүниие субботодо отолуулжа байхадаа, субботодо хүнэй бэеые сүм эдэгээхэдэмни таанар Намда яахадаа ехээр сухалданабта?

²⁴ Таанар гадаада талыень обёороод лэ, халирхайгаар бү шиидхэгты, харин үнэн зүб шиидхэбэри гаргагты!

²⁵ Иерусалимда байгшадай зариманиинь иигэжэ хэлэбэ: – Энэл хүниие засаг баригшад алахаяа һанана бэшэ аал?

²⁶ Теэд харыта, Энэ хүн һургаалаа нюунгүй сэхэ номнонол. Хэншье Тэрэниие хориногүйл… Энэ хүн үнэхөөрөө Бурханай табисуурта байна гэжэ, магад, засагаархиншье ойлгоо хаяа?

²⁷ Теэд Энэ хүн хаанаһааб гэжэ бидэ мэдэнэбди. Харин Бурханай табисууртын ерэхэдэ, Тэрэ хаанаһааб гэжэ хэншье мэдэхэгүйл.

²⁸ Тиихэдэнь Иисүүс һургаалаа Һүмэ дотор номножо байгаад: – Таанар Намайе мэдэнэ гүт? Минии хаанаһаа ерэһэн тухай баһа мэдэнэ гүт? Би Өөрэһөөн ерээ бэшэб. Намайе эльгээгшэдэ этигэжэ болохо, зүгөөр таанар Тэрээниие мэдэхэгүйт.

²⁹ Харин Би Тэрээниие мэдэхэб, ушарынь нэрлэбэл, Би Тэрээнһээ ерээб, Намайе Тэрэ эльгээгээ, – гэжэ шангаар дуугарба.

³⁰ Тиигэжэ хэлэхэдэнь Иисүүсые засагаархин барижа хаахаяа һанаба, теэд хэншье Тэрээнэй ойро хүрэбэгүй, юундэб гэхэдэ, Тэрэнэй сагынь үшөө ерээдүй байгаа.

³¹ Теэд олон юрын зон Тэрээндэ этигэһэн байна. – Бурханай табисуурта ерэхэдээ, Энэ хүнһөө үлүү ехэ дүлгэ тэмдэг харуулжа шадаха аал? – гэжэ тэдэ зон хэлсэбэ.

³² Иисүүс тухай арад зоной дунда арсалдаанай боложо байхые фарисейнүүд дуулаба. Түрүү санаартан ба фарисейнүүд Тэрэниие барижа хаагты гэжэ Һүмын харуулшадые эльгээбэ.

³³ Иисүүс тэрэ үедэ: – Үшөө нэгэ заа таанартай суг байлсахамни, тиигээд Намайе эльгээһэн Эсэгэдээ ошохоб.

³⁴ Таанар Намайе бэдэрхэт, теэд олохогүйт; Минии байха газарта ерэжэ шадахагүйт, – гэжэ хэлэбэ.

³⁵ Тиихэдэнь еврейнүүд өөһэд дундаа хөөрэлдэбэ: – Үгы, бидэнэй Тэрэниие олохогүй ямар газарта Энэмнай ошохоёо түхеэрбэб? Али грегүүдэй дунда тарашоод байһан манай улад зондо ошожо, грегүүдые һургахаяа һанаба гү?

³⁶ «Таанар Намайе бэдэрхэт, теэд олохогүйт», «Минии байха газарта таанар ошожо шадахагүйт» гэхэдээ, ямар удхатайгаар Тэрэ хэлэбэб?

Амидаралта уһан

³⁷ Иисүүс һайндэрэй һүүлшын эгээл ехэ үдэрынь зондо иигэжэ айладхаба: – Ангаһан хүн Намда ерээд, ундаа харяаг!

³⁸ Намда этигэдэг хүн тухай Нангин Бэшэг соо «Тэрэнэй зүрхэнһөө амидаралта урадхал уһан урдаха» гэжэ бэшэгдэнхэй.

³⁹ Иисүүс тиигэжэ хэлэхэдээ, Арюун Һүлдэ тухай хэлэбэ гээшэ: Иисүүстэ этигэһэн хүнүүд хожомынь Арюун Һүлдэтэй болохо ёһотой байгаа. Тэрэ үедэ Арюун Һүлдэ үшөө үгтөөдүй һэн, юундэб гэхэдэ, Иисүүс алдар солодо хүртөөгүй байгаа.

⁴⁰ Сугларһан зоной зариман Иисүүсэй үгэнүүдые шагнаад: – Энэмнай хүнүүдтэ ерэхэ ёһотой тэрэ Лүндэншэ байнал! – гэлсэбэ.

⁴¹ Нүгөөдэ зариманиинь: – Энэмнай Бурханай табисуурта байнал! – гэлсэбэ. – Теэд Бурханай табисуурта Галилейһээ ерэхэ аал? – гэжэ бэшэ зариманиинь буруушааба. –

⁴² Бурханай табисуурта болбол Давидай үри һадаһан мүн, Давидай түрэһэн Бэтлэһээм хотоһоо ерэхэ ёһотой гэжэ Нангин Бэшэг соо хэлээтэй ха юм.

⁴³ Тиин зон Иисүүс тухай арсалдан, тэдэнэй һаналнуудынь тудалдаба.

⁴⁴ Зариманиинь Иисүүсые барижа тушаахаяашье һанаба, теэд Тэрээндэ хэншье гар хүрэбэгүй.

⁴⁵ Һүмын харуулшадай түрүү санаартанда, фарисейнүүдтэ бусажа ерэхэдэнь: – Юундэ таанар Тэрээниие наашань асараагүйбта? – гэжэ һураба.

⁴⁶ – Энэ хүндэ адляар нэгэшье хүн хэзээдэшье номноогүйл! – гэжэ харуулшад харюусаба.

⁴⁷ – Тэрэ хүн иихэдээ таанарыешье мэхэлбэ гү? – гэжэ фарисейнүүд харуулшадһаа асууба. –

⁴⁸ Теэд ахамадуудай дундаһаа гү, али фарисейнүүдэй дундаһаа нэгэшье хүн Тэрээндэ этигээ аал?

⁴⁹ Хуули мэдэдэггүй харанхы мунхаг зон лэ Тэрээндэ этигэбэ гээшэ, тэдэ зон Бурханай хараалда хүртөө!

⁵⁰ Нэгэтэ Иисүүстэй ерэжэ уулзаһан тэдэнэй нэгэн болохо Никодим бэшэндээ иигэжэ хэлэбэ:

⁵¹ – Хүниие гэмнэхэ гээ һаа, түрүүн тэрэ хүнэй хэлэһые шагнангүйгөөр, зэмыень тодоруулангүйгөөр шиидхэбэри гаргахые манай Хуули зүбшөөдэг юм гү?

⁵² – Зай, ши тиихэдээ баһал Галилейһээ хаяаш? Ши өөрөө Нангин Бэшэг шудала, тиибэл Галилейһээ нэгэшье лүндэншэ гарахагүй гэжэ өөрөө мэдэхэш, – гэжэ тэдэнь харюусаба.

Иисүүс ба эрэдээ урбаһан эхэнэр

⁵³ Удаань бултадаа гэр гэртээ хариба.